ඔබේම අන්තර්ජාල නිවහනක්!

කවුද අකමැති තමන්ගේම කියලා වෙබ් අඩවියක් නිර්මාණය කරගන්න.  ලෝකයේ වෙබ් අඩවි අතුරින් තමන්ගේම කියලා වෙබ් අඩවියක් නිර්මාණය කරගෙන් අන්තර්ජා‍ලයේ තමන්ගේම අනන්‍යතාවක් නිර්මාණය කරගැනීම තුලින් වාසි රැසක් හිමිවෙනවා. ඒ වගේම, සල්ලි හොයන්නත් පුළුවන් කියලා අමතක කරන්න එපා 😀 . අන්තර්ජාලයට මේ වන විට දිනෙන් දින තොරතුරු රාශියක් එකතුවෙනවා. මේ විනාඩිය තුලදීත් අන්තර්ජාලයට එක්වන දත්ත ප්‍රමාණය ගණනය කළ නොහැකි තරම්. ඉතින් මේ දත්ත හරිද, වැරදිද කියලා බලන්න කවුරුවත් නෑ. ඇත්තෙන්ම කියනවානම් අන්තර්ජාලය තුල කිසිවෙකුට ඒකාධිකාරයක් නෑ. නමුත් ඔබටත් පුළුවන් අන්තර්ජාලයට ඒ විවිධ දේ එකතු කරලා තමන්ටම කියලා රසික පිරිසක් එකතු කරගන්න. ඔබ සමහර විට ගායකයෙක්, චිත්‍ර ශිල්පියෙක් වෙන්න පුළුවන් එහෙමත් නැත්නම් දක්ෂ රචකයෙක් වෙන්නත් පුළුවන් ඔබට මාධ්‍ය අනුග්‍රහයක් ලබා ගැනීම අපහසු නම්, අන්තර්ජාලය තමයි ඒකට නියම තැන. ඉතාමත් සුළු මුදලක් වියදම් කරලා, එහෙමත් නැත්නම් නොමිලේම ඔබේම වෙබ් අඩවියක් අන්තර්ජාලයේ මේ වන විට විවෘත කරගන්න පුළුවන්. මේ වන විට ලෝකයේ මාස 1ක් වයසැති දරුවෙක් ඉඳලා වයසක සීයා ආචිචි කෙනෙක් වෙනුවෙන් වෙබ් අඩවි නිර්මාණය වන බව ඔබ දන්නවාද?. ඒ වගේම පුරවැසි මාධ්‍යකරණය පුළුල්වීමෙන් නිර්මාණය වන්නාවූ බ්ලොග් අඩවි වලටද මේ වන විට අති විශාල පිළිගැනීමක් තිබෙනවා.

ඔබේම කියලා වෙබ් අඩවියක් නිර්මාණය කරගැනීමට නම් ඔබට යම්තාක් දුරකට වෙබ් පිටු නිර්මාණය කිරීමට යොදාගනු ලබන භාෂාවක් පිළිබඳ දැනීමක් තිබීම වැදගත්. මේ වෙබ් පිටු නිර්මාණයට යොදා ගන්නා භාෂාවන් කිහිපයක් HTML, PHP, ASP ලෙස දැක්විය හැකියි. මේ අතුරින් HTML සරල, පහසු භාෂා ක්‍රමයක්. PHP හා ASP භාවිතයට නම් යම් කිසි විශේෂ දැනුමක් තිබීම වැදගත්. එමෙන්ම Database පිළිබඳ දැනීමක්ද ඔබ සතු වනවානම් එය ඔ‍බේ වෙබ් අඩවියට වටිනාකමක් එක් කිරීමට සමත් වේවි.

වෙබ් අඩවි නිර්මාණයට විශේෂ මෘදුකංග අත්‍යවශ්‍යම නෑ. ඔබගේ පරිගණකයේ නෝට්පෑඩ් (NotePad) මෘදුකාංගය භාවිතයෙන්ම වෙබ් පිටු නිර්මාණය කරගැනීමට හැකියාව තිබෙනවා. එමෙන්ම වෙබ් අඩවි නිර්මාණය සඳහා ඔබට Adobe / Macromedia Dreamweaver මෘදුකාංගයද මයික්‍රෝසොෆ්ට් ෆ්‍රන්ට්පේජ් මෘදුකාංගයද භාවිතා කිරීමට හැකියාව තිබෙනවා. ඩ්‍රීම්වීවර් මෘදුකාංගය තුලින් නම් ඔබට විශේෂාංග රැසක් ලබා ගැනීමට හැකියි.

වෙබ් පිටු නිර්මාණය කරාට විතරක් නම් මදි. මේ වෙබ් අඩවි අන්තර්ජා‍ලයේ ස්ථාපනය කරන්නත් ඕනේ. අන්තර්ජාලයේ ස්ථාපනය කිරීමට ඔ‍බට ඔබේ පරිගණකය වුනත් පාවිච්චි කරන්න පුළුවන්. ඒත් ඒක ටිකක් කරදරකාරී වැඩක්. මේ සඳහා ඔබේ පරිගණයක අවුරුද්ද පුරාම, පැය 24පුරාම අන්තර්ජාලය සමඟ සම්බන්ධ කරන්න අවශ්‍යයි. ශ්‍රී ලංකාවේ ජීවත් වෙන සාමාන්‍ය පුද්ගලයෙක්ට නම් මේක හරිම අමාරු අපහසු දෙයක්. පැය 24 පුරාම අන්තර්ජාල සම්බන්ධතාවය තිබුනත්, ඔබට පැය විසි හතර පුරාවටම විදුලිය ලබාගැනීම අපහසු දෙයක්. මේ නිසා හොඳම ක්‍රමය තමයි, ඔබේ වෙබ් අඩවිය පැය 24 පුරාවටම අන්තර්ජාලයට සම්බන්ධ, නොකඩවා විදුලිය ලබාගන්නා අන්තර්ජාල සේවාදායකයක් (Server) මෙම සේවා වලට භාවිතා කරන වදන තමයි වෙබ් සංග්‍රාහක සේවා එහෙමත් නැත්නම් වෙබ් හෝස්ටින්ග් සේවා (Web Hosting Services). වර්තමානයේ වෙබ් ‍හෝස්ටින්ග් සේවා විශ‍ාල ප්‍රමාණයක් දැකිය හැකියි. මෙම සේවාවන් අතුරින් සමහරක් සේවාවන් ඉතාමත් උසස්ගණයේ සේවාවන් වන අතර සමහරක් නම් සේවාව අතින් අන්තිමයි. ලාභයි වගේ පෙනුනාට මෙම සේවාවන්හි, පාරිභෝගික සහය අන්තිමයි. එමෙන්ම සේවාදායකය ක්‍රියාවිරහිත වීමේ කාල පරාසය, (Downtime) සම්භාවිතාවය අධිකයි. එම නිසා වඩා ‍හොඳ වෙබ් හෝස්ටින්ග් සේවාවක් තෝරාගැනීම වැදගත් වෙනවා. ඔබ ගූගල් හෝ එවැනි සෙවුම් යන්ත්‍රයක Web Hosting වදන යොදා සෙවූ සැනින් ඔබට වෙබ් අඩවි සපයන ආයතන ගනනාවකම වෙබ් ලිපින දැක ගැනීමට හැකියි. එම නිසා ‍ඔබේම වෙබ් අඩවියක් ආරම්භ කිරීමට කලින්, වෙබ් හෝස්ට්න්ග් සේවා ගැන හොඳින් දන්නා මිතුරෙකුගෙන්, ඔබ මිළදීගැනීමට අදහස් කරන ආයතනය පිළිබඳ විමසා දැනගැනීම වැදගත් වෙනවා. වර්තමානයේදී ඔබේ වෙබ් අඩවි ස්ථාපනය සඳහා මුදල් අය නොකරන සමාගම් රාශියක් බිහි වෙලා තිබෙනවා. මෙම සේවාවන් මුළදී කිව් ආකාරයේ මුදල් ගෙවා ලබාගන්නා සේවාදායක වලට වඩා සාපේක්ෂව අඩු පහසුකම් තමයි ලබා දෙන්නේ. මෙම නොමිලේ වෙබ් ඉඩ සපයන ආයතන මුදල් සපයාගනු ලබන්නේ. ඔබට ලබාදෙන වෙබ් අඩවියේ ඔවුන්ගේ දැන්වීම් ප්‍රදර්ශනය කරමිනුයි එසේත් නැතිනම් ඔවුන් ඔබට සපයන වෙබ් අඩවි Control Panel එක තුල ඔබට දැන්වීම් ප්‍රදර්ශනය කරනු ලබනවා. එහෙමත් නැතිනම් ඔබේ විද්‍යුත් තැපැල් ලිපිනයට නිතිපතා දැන්වීම් යොමු කරනවා. එසේත් නැතිනම්, ඔබේ විද්‍යුත් තැපැල් ලිපිනය ස්පෑම් කිරීමකටද ලක් කර හැකියි. මෙනිසා නොමිලේ වෙබ් ඉඩ සපයන වෙබ් අඩවි පිළිබඳ මඳක් සොයා තෝරාගන්නවානම් හොඳයි.

මීළඟට වැදගත් වෙනුයේ ඩොමේන් නාමයයි. උදාහරණයක් විදිහට ඔබ ඔ‍බගේ ඔබ ගැන එහෙමත් නැත්නම් ඔබේ පුද්ගලික වෙබ් අඩවියක් නිර්මාණය කරනවානම් ඔබේ නම ඇතුලත් කර ඩොමේන් නාමයක් ලබා ගැනීමට හැකියි. උදාහරණයක් විදිහට මගේ වෙබ් අඩවියේ ඩොමේන් නාමය වන www.sudaraka.com හා මලින්ත සමරකෝන්ගේ අයියාගේ වෙබ් අඩවියේ ඩොමේන් නාමය වන www.malinthe.com දැක්විය හැකියි. එමෙන්ම ඔබට පුළුවන් ඒ ඩොමේන් නාමයට තවත් සබ් ඩොමේන් නාමයන් එකතු කරගන්න. සබ් ඩොමේන් නාමය කෙටියෙන් හැඳින්වුවොත් හරියට ඩොමේන් නාමයක් ඇතුලේ ඩොමේන් නාමයක් වගේ එකක්. ඒ කියන්නේ ඔබට ඔබේ අඩවියට තවත් උප අංශයක් ඇතුලත් කොට එයට පහසුවෙන් පිවිසීමට අන් අයට උපකාරී වීමක් තමා සාමාන්‍යයෙන් සබ් ‍ඩොමේන් නාමයක් තුලින් කෙරෙන්නේ. මේ සඳහා උදාහරණයක් විදිහට ඔබ දැන් පිවිසී සිටින මගේ පුද්ගලික බ්ලොග් අඩවිය වන http://blog.sudaraka.com හා මලින්‍තගේ සටහන http://blog.malinthe.com දැක්වීමට හැකියි. මේ ඩොමේන් නාම සාමාන්‍යයෙන් නොමිලේ නම් ලැබෙන්නේ නෑ. ඩොමේන් නාම වල විවිධ extension තියෙනවා. උදාහරණ වශයෙන් .com , .net, .info, .org, .asia, .lk ලෙස දැක්විය හැකියි වර්තමානයේ ‍ඩොමේන extension විශාල ප්‍රමාණයක් දැකීමට හැකියි. නමුත් වැඩියෙන්ම ජනප්‍රිය extension එක වෙලා තියෙන්නේ මොකක්ද කියලා ඔබ දන්නවාද? ඔව් ඔබ හරි! .com තමයි වර්තමානයේ ජනප්‍රියම Domain Extension එක වෙලා තියෙන්නේ.  විවිධ රටවලට මේ වන විට Domain Extension වෙන වෙනම දක්නට ලැබෙනවා. ඒ අතුරින් අපේ ශ්‍රී ලංකාවට ලැබිලා තියෙන .Domain Extension එක තමයි .lk කියන extension එක. චීනයට .cn, ඉන්දියාවට .in විදිහට ඒ ඒ රටවලට ආවේණික extension තිබුනත්, මෑතක් වෙනතුරුම අමෙරිකාවට නම් වෙනම extension එකක් තිබුනේ නෑ. අමෙරිකාව කෙලින්ම භාවිතා ‍කරේ .com කියන extension එකම තමයි. ඒකට හේතුව වුනේ අමෙරිකාවේ තමයි මුලින්ම අන්තර්ජාලය භාවිතයට පැමිණීම. නමුත් මේ ඩොමේන් නාම එක් එක් අයට බෙදී යාමේ සීඝ්‍රතාවය නිසාම අමෙරිකාවත් තමන්ගේම ඩොමේන අනන්‍යතාවක් නිර්මාණය කරගෙන තිබෙනවා. ඔවු‍න්ගේ ඩොමේන extension එක තමයි .us කියන්නේ. ඒ වගේම ඩොමේන් නාමය තමයි වෙබ් අඩවියක තියෙන අනන්‍යතාවය සනිටුහන් කිරීමේ ප්‍රධාන සාධකය. ඒ කියන්නේ ඩොමේන් නාමය තමයි වෙබ් අඩවියක හැඳුනුම්පත. සාමාන්‍යයෙන් බොහෝ වෙබ් ඉඩ සපයන සමාගම් තමන්ගේ පාරිභෝගිකයින්ට ඩොමේන් නාම ලියාපදිංචි කරදෙනවා. සමහර ආයතන තමන්ගේ සේවාවන්ට පාරිභෝගිකයින් ඇද ගැනීමට ඔවුන්ගේ වෙබ් ඉඩ ලබාදීමේ පැකේජ සමඟ අමතර ගාස්තුවකින් තොරවම ඩොමේන් නාමයන් ලියාපදිංචි කර ලබාදෙනවා. නමුත් ඔබට හැකියාවක් තියෙනවානම් ඔබටම පුළුවන් ඔබේ ඩොමේන් නාමය ලියාපදිංචි කරගන්න. ඔබටම එය එසේ ලියාපදිංචි කරගත හැකිනම් එය ඉතාමත් වැදගත් වනවා. එසේ ඔබම ඔබේ ඩොමේන් නාමය ලියාපදිංචි කරගැනීම තුලින් ඔබේ ඩොමේන් නාමයේ පාලනය ඔබ අතට පහසුවෙන් ලබාගත හැකියි. අන්තර්ජාතිය ඩොමේන් නාම ලියාපදිංචියේදී නම් පෙරමුණෙන්ම සිටින්නේ ගෝඩැඩී (GoDaddy) හා නේම්චීප් (NameCheap) යන ආයතන තමයි.  .lk ඩොමේන නාම ලියාපදිංචි කරගැනීමට අවශ්‍ය නම් www.nic.lk වෙතට පිවිසෙන්න.  (.lk ඩොමේන් නාම ලියාපදිංචියේ ක්‍රමවේදය නම් මගේ කිසිම පැහැදීමක් නෑ. මම ඒ ගැන පසුව ලියන්නම්.) ඔබට ඩොමේන් නාමයක් මිළදී ගැනීමට අපහසු නම් ඔබ පුළුවන් www.co.cc සබ් ඩොමේන් නාමයක් නොමිලේම ලබාගන්න. මෙහිදී ඔබට මුදල් දී ලබාගන්නා ඩොමේන් නාමයක ඇති පහසුකම්ම ලබාගැනීමට හැකියාව තිබෙනවා. මෙයට අමතරව බොහෝ නොමිලේ වෙබ් ඉඩ සපයන වෙබ් අඩවි තුලින්ද නොමිලේ සබ් ඩොමේන් නාම ලබා දෙනවා. උදාහරණක් විදිහට නොමිලේ වෙබ් ඉඩ ලබාදෙන http://www.freelk.info වෙබ් අඩවිය වෙතින් ඔබට http://you.freelk.info හෝ http://example.freelk.info වැනි නොමිලේ සබ් ඩොමේන් නාමයක් ලබාගැනීමට හැකියි.

මේ ලිව්වේ මූලික කරුණු කිහිපයක් විතරයි. මේ ක්ෂේත්‍රය මතුපිටින් සරල වුනාට, ටිකක් බැරෑරුම් දෙයක්. වෙබ් අඩවියක් නිර්මාණය කරලා, ඩොමේන් නාමයක් ඇරගෙන, වෙබ් ඉඩත් ඇරගෙන වෙබ් අඩවිය පටන්ගත්තායි කියමුකෝ. එ‍තකොට ඔක්කොම ඉවරයි දැන් හරි කියලානම් හිතන්න එපා. නියම යු‍ද්දේ පටන් ගන්නේ එතකොට තමයි. ඒවා ගැන මම පසුවට ලියන්නම්. එතෙක්  http://www.w3schools.com වෙබ් අඩවියට පිවිසිලා වෙබ් අඩවි නිර්මාණය හා අනෙකුත් දෑ පිළිබඳ දැනුවත් වෙන්න. හොඳ හොඳ දේවල් එළිවෙන ජාමෙට කිව්වාලු!

අලුත් අවුරුදු සුබපැතුම :D

මේක මට ලැබුනේ අපේ අයියා කෙනෙක්ගේ ජංගම දුරකථනයක SMS එකක් විදිහට ඇතුළේ තිබිලා! කොහොමද කියලා කියවලාම බලන්නකෝ! 😀

හිසට රන්පත් (Gold Leaf 😀 ) පයට බෙන්සන් තබා, තැබෑරුමක් දෙස බලා. ඕල්ඩ් රිසර්ව් මිශ්‍ර නානු බී කබරයා දැමීම මැනවි. සුභ අලුත් අවුරුද්දක් වේවා!

මේක අලුත් තාලේ සුභපැතුමක්! අලුත් අවුරුද්දට රත්වෙන අයට කියාපු සුභ පැතුම.
😀 😀

ඒහි පස්සිකෝ බ්ලොග් මැරතන්!

බ්ලොග් මැරතන් වලට තව දින කිහිපයයි. සිංහල බ්ලොග්කරුවන්ගේ සංසදයේ කට්ටිය ගජරාමෙට හිටු කියලා වැඩ. හැම දෙනාම අඩු වැඩි වශයෙන් වැඩ. ඒ අතුරින් අපේ ආනන්දවර්ධන, මලින්ත, කාලිංග, වරුණ කනිෂ්ක නම් අමතක කරන්න බෑ. ඒ වගේම ඔක්කොම දමලා ගහලා ගියපු ටිරෝන්වත් (ටිරොන්ගේ අදහස හරිද වැරදිද කියලා ඔබත් සිංහල බ්ලොග්කරුවන්ගේ සංසදයේ වෙබ් අඩවිය බලලා තීරණය කරන්න) අමතක කරන්න බෑ. ඇමරිකන් කුස්සි අම්මාගේ මැරතන් දායාදය අපේ කරගන්නයි මේ හදන්නේ. අළුත් අවුරුද්දේ සාමයෙන් සමඟියෙන් කට්ටිය එකතු වෙලා බ්ලොග් මැරතන් එකටයි ලියන්න සූදානම. තමන් කැමති දෙයක්, කැමති විදිහකට, තමන්ගේ විදිහට ලියන්නයි තියෙන්නේ. බ්ලොග් මැරතන් එකේ ප්‍රධාන ‍අරමණු කිහිපයක් තියෙනවා.

ඒවා නම්,

  • බ්ලොග්කරුවන් අතර සහයෝගීතාවය වර්ධනය කිරීම
  • සිංහල භාෂාවට අන්තර්ජාතික මට්ටමින් ප්‍රචාරණයක් ලබාදීම
  • සිංහල අන්තර්ජාල, පුද්ගලික, පුරවැසි මාධ්‍යකරණය පුළුල් කිරීම
  • සහ තවත් බොහෝ දෑ…

සිංහල භාෂාවෙන් බ්ලොග් ලියන බොහෝ දෙනෙක් මෙවර ප්‍රථම සිංහල බ්ලොග් මැරතන් ඉසව්වට සහභාගී වන බවට දන්වා තිබෙනවා. ඔබ තාමත් ප්‍රමාද නෑ. 18වෙනිදා උදාවෙන්න කලින්ම ඔබේ සහභාගීත්වය සනිටුහන් කරන්න. ඒ වගේම ඔබට මේ ඉසව්ව මඟ‍ දෙපස හිටගෙන, හාන්සි වෙලා, දන ගහගෙන ඕන විදිහකට නැරඹීමට හැකි වන විදිහට සියලුම වැඩ කටයුතු සලස්වලායි තියෙන්නේ. ඔබට මේ තරඟය නැරඹීමට තිබිය යුතු එකම සුදුසු කම තමයි, සිංහල යුනිකේත සහය ඔබගේ පරිගණකයේ තිබීම. ඒ වගේම මේ තරඟය නැරඹීමේදී ඔබට පූර්ණ නිදහස තියෙනවා මැරතන් දුවන අයව දිරිගන්වන්න, වතුර ගහන්න (හැබැයි මොනිටර් එකට වතුර ගහලා මොනිටර් එක නම් නාස්ති කරගන්න එපා!) විතරක් නෙමෙයි බනින්නත් පුළුවන් (අසභ්‍ය වචන නම් පාවිච්චි කරන්න එපා) ඒ වගේම බෝම්බ වලට බයවෙන්න ඕනෙත් නෑ, කට්ටිය පෙරළගන්න ඕනෙත් නෑ. නිවි සැනසිල්ලේ තේකක් බොනගමන් වුනත් මේ තරඟය බලන්න පුළුවන්. ඒ තරමට මේ අවරුදු මැරතන් එකේ ප්‍රේක්ෂකයන්ට පූර්ණ නිදහස තියෙනවා. ඒ වගේම වෙනදා ගම හරහා, රට හරහා මැරතන් දුවපු අයට පුළුවන් සියළු බාධක බිඳලා ලෝකේ හරහාම මැරතන් දුවන්න. කම්මැලි කමක් දැනු‍නොත් (කම්මැලි කමක් දැනෙන එකක් නෑ. ඒත් හදිස්සියේ දැනුනොත්?) චිත්‍රපටියක් බලන්න, යූ ටියුබ් එක පැත්තේ යන්නත් පුළුවන්. ඒ එක්කම අපේ පාර්ලිමේන්තුව ඇතුලේ කතා ඇතුලත් වීඩියෝ පට තියෙනවානම් ඒවා බලන්නත් අමතක කරන්න එපා හො‍‍ඳේ..’

බ්ලොග් මැරතන් එක ගැන වැඩියෙනු‍ත් එක්ක කිව්වාද මන්දා… ඔන්න එහෙනම් බ්ලොග් මැරතන් බලන විදිය පිළිබඳව පොඩ්ඩක් දැනගන්න…

පළමු ක්‍රමය – මැරතන් සින්ඩ්කේටරය.

http://marathon.sinhalabloggers.com වෙබ් අඩවියට පිවිසීම තුලින් ඔබට විනාඩි පහළෙ‍ාවෙන් පහළොවට යාවත්කාලීන වල, බ්ලොග් මැරතන් වලට සහභාගී වන සියළු දෙනාගේ සටහන් රසවිඳීමට හැකියි. මේ අඩවිය Bookmark කරගන්න අමතක කරන්න නම් එපා!

දෙවන ක්‍රමේ – යාහූ පයිප්පේ!

මේ පයිප්පේ අපේ සීයලා පාවිච්චි කරපු වගේ පයිප්පයක් වගේ නම් නෙමේ. ඒකට වඩා ගොඩක් දියුණ පයිප්පයක්. හැබැයි මේ පයිප්පෙන් මැරතන් බලලා මත් වුනොත් එහෙම ඕන් අපිට කරන්න නම් දෙයක් නෑ (විහිළුවක් කරේ!) මම නම් ඉතින් පොඩි එක‍ානේ, ඒක නිසා සුරාමේරය මජ්ජපමාදට්ඨානං වේරමණී සික්ඛාපදං සමාදියාමි! අහ් මැරතන් මාර්ගයෙන් පැන්නා නේද? එහෙනම් නැවත මාතෘකාවට පිවිසෙමු. යාහූ පයිප්පෙන් මැරතන් රසවිඳින්න පිවිසෙන්න;

තුන්වන පිම්ම! – ගූ-කතා හරහා!

කැතයි වගේද දන්නේ නෑ. ඒත් ඉතින් සිංහල ක්‍රමේට Google Talk කෙටි කරා එහෙම නේද කියන්නේ? ඔබ Google Talk භාවිතා කරනවානම්, marathon@sinhalabloggers.com
විද්‍යුත් තැපැල් ලිපිනය මිතුරෙකු ලෙසට එකතු කරගන්න. මේක තමයි මම අංක එකට නිර්දේශ කරන ක්‍රමය. ලේසියි. පහසුයි.

සිව් වැනි ක්‍රමේ – ට්වී‍ටරේ මැරතන්!

වැඩි විස්තරයක් ඕනේ නෑ http://twitter.com/BlogMarathon පස්සෙන් මැරතන් දුවන්නයි ඕනේ (Follow කරන්න) වැඩිය මහන්සි වෙන්න ඕනේ නෑ. පුටුවේ ඉඳගෙනම ෆලෝ එකක් දෙන්නයි ඕනේ.

ඔන්න ඔහොමයි පින්වතුනි බ්ලොග් මැරතන් බලන්නේ.  ඉතින් මැරතන් දුවන හැමෝටම චියර් එකක් දෙන්න අමතක කරන්න එපා. මම දුවනකොට මෙන්න මෙහෙම චියර් කරන්න…

කවුද බෝයි! – සුදාරක…

තව පාරක්! – සුදාරක…
තව හයියෙන් – සුදාරක…

සු…!
දා…!
ර…!
ක…!

සුදාරක!
අනිත් අයටත් මේ විදිහම චියර් කරන්න හොඳේ!

ජබ් වී මෙට් (Jab We Met)

Jab We Met Hindi Movie Poster

ඔන්න මීට කලින් සැලසුම් කරපු විදිහටම ජබ් වී මෙට් (Jab We Met) චිත්‍රපටිය ඊයේ (2008.04.12) රාත්‍රී 9.30ට ස්වර්ණවාහිනියෙන් සිංහල උපසිරැසි සමඟින්ම නැරඹීමට හැකියාව ලැබුනා. ඇත්තෙන්ම මේ චිත්‍රපටිය සරල, එහෙත් ආකර්ෂණීය සිනමා නිර්මානයක් ලෙස සැලකීමට හැකියි. චිත්‍රපටියේ ගීත සියල්ලම ඉතාමත් වින්දනීය ආකාරයෙන් නිර්මාණය කර තිබෙන ඇති අතර එහි සියළුම ගෞරවය හිමිවන්නේ මෙම චිත්‍රපටියට සංගීතයෙන් දායකත්වය දැක්වූ “ප්‍රීතම්” , “සන්ජෝයි චවුද්‍රි” හා “ඉර්ෂාඩ් කමිල්” වෙතටයි.

මෙම චිත්‍රපටියේ ප්‍රධාන චරිත වන්නේ…

Shahid Kapoor

ආදිත්‍ය කාශ්‍යප් (සායිඩ් කපූර්) – තරුණ ව්‍යාපාර හිමියෙකු වන මොහුගේ පි‍යාගේ අභාවයෙන් පසු මුළු ව්‍යාපාරයම කඩාවැටෙනවා. ඒ අතර තම පෙම්වතියද තමාගෙන් ඉවත්වී ‍අන් පුද්ගලයෙකු විවාහ කරගැනීම නිසා මානසික වශයෙන් ඇද වැටීමකට ලක් වනවා නමුත් ගීත් ගේ අහඹු මුනගැසීමෙන් පසු සියල්ලම වෙනස් වනවා. ඔහුගේ සියළුම ව්‍යාපාර තිබූවාටත් වඩා හොඳින් ගොඩනැගීමට ඔහුට හැකිවනවා.

ගීත් දිලොන් (කරීනා කපූර්) – ජීවිතයම ක්‍රීඩාවක් කරගත් ඇත සියල්ල සරලව, යහපත්ව සිදුවේයැයි විශ්වාස කරන්නාවූ කටකාර තරුණියක්.  ඇය නිසා ආදිත්‍යගේ ජීවිතය වෙනස් වූ නමුත් ඇය විශාල ඇදවැටීමකට ලක්වෙනවා. නමුත් නැවතත් ආදිත්‍යගේ හමුවීම නිසාවෙන්ම ඇගේ ජීවිතය ආලෝකමත් වෙනවා.

මෙහි තවත් චරිත කීපයක් එක් එක් අවස්ථාවලදී ඉස්මතු වූවත් ඉහතින් දැක්වූ චරිත 2වටා පමණක් චිත්‍රපටියේ කතාන්දරය ගලා යැවීමට මෙහි අධ්‍යක්ෂකවරයා වශයෙන් ඉමිතියාස් අලී සමත් වී තිබෙනවා. එමෙන්ම මේ චිත්‍රපටියේ කැමරාකරණය වෙනත් හින්දි චිත්‍රපටි වලට වඩා ස්වල්ප වශයෙන් වෙනසක් තිබෙනවා.

ස්වර්ණවාහිනියේ මේ චිත්‍රපටිය නැරඹීමට ඔබට නොහැකි වුනානම් DVD හෝ VCD එකක් හරහා මේ චිත්‍රපටිය රසවිඳින්න අමතක කරන්න එපා. චිත්‍රපටිය සිනමාහල්වල ප්‍රදර්ශනයට පැමිණි මුල් කාලයේ මෙම චිත්‍රපටිය ආදායම් වශයේ යම් සාර්ථකත්වයක් ලැබූවත් අතිවිශිෂ්ට නිර්මාණයක් වූ ඕම් ශාන්ති ඕම් චිත්‍රපටිය හා සාවරියා චිත්‍රපටිය මේ කාලයේම ප්‍රදර්ශනයට පැමිණීම නිසා එම මහා පරිමාණ නිෂ්පාදන සමඟ තරඟවැදීමට අපහසු වීම නිසා සිනමාහල් වලින් චිත්‍රපටිය ඉවත් වුනා. නමුත් මෙම චිත්‍රපටියේ ඇති සුන්දර බව නිසාම මෙම චිත්‍රපටිය සම්මාන කිහිපයකින්ම පිදුම් ලැබීමට සමත් වුනා. ඒ අතර…

2007 හොඳම නිළිය ෆිල්ම් ෆෙයාර් සම්මානය (කරීනා කපූර්)
2007 හොඳම දෙබස් සඳහා ෆිල්ම් ෆෙයාර් සම්මානය (ඉමිතියාස් අලි)
2007 හොඳම නිලිය සඳහා HT Café සිනමා සම්මානය (කරීනා කපූර්)

ප්‍රධාන වෙනවා. මේ සම්මාන ත්‍රිත්වයට අමතරව තවත් සම්මාන කිහිපයක්ද සම්මාන සඳහා නිර්දේශිත නාම අතරටද මෙම චිත්‍රපටිය පැමිණීමට සමත් වි තිබෙනවා. මෙහි ප්‍රධාන චරිතයකට පන පොවන කරීනා කපූර්ගේ සිනමා දිවියේ එක් සන්ධිස්ථානයක්ද මෙම චිත්‍රපටියෙන් සනිටුහන් වෙනවා. මෙම චිත්‍රපටියෙදීත් සත්‍ය ජීවිතයේදීත් පෙම්වතා වූ සායිඩ් කපූර්වත් අත්හැරීයේද මේ චිත්‍රපටියෙන් පසු වීමද තවත් විශේෂත්වයක්. මෙම චිත්‍රපටියේදී සිය රංගනයෙන් සාර්ථකත්වය ලැබීම නිසා මේ දිනවල ඉන්දියාවේ නිෂ්පාදකවරු, අධ්‍යක්ෂවරු බොහෝ දෙනෙක් ඇය පස්සෙන් යන බවනම් හැමෝටම ආරංචි ඇති. එමෙන්ම කරීනා කපූර් තමයි මේ දිනවල වැඩියෙන්ම ගාස්තු අය කරන බොලි‍වුඩ් නිළිය.

එතකොට සායිඩ් කපූර්?
සායිඩ් කපූර්ට නම් වැඩිය සම්මාන ලැබිලා නෑ. නමුත් මේ දිනවල ඔහුගේ රසිකාවියන්ගෙන් ලැබෙන පැසසුම් නම් එන්න එන්නම වැඩිවෙනවා කියලා තමයි ආරංචිය. කෙසේ වෙතත් චිත්‍රපටියට ඔහුගෙන් ලැබෙන රංගන දායකත්වයේ නම් කිසිම අඩුපාඩුවක් නම් මා දකින්නේ නෑ. කෙසේ වෙතත් සායිඩ් කපූර් තමයි මේ චිත්‍රපටියේ මේ චරිතයට ගැලපෙනම නළුවා කියලා තමයි මගේ විශ්වාසය.

වෙනදා වගේම චිත්‍රපටියේ කතාව නම් මම කියන්නේ නෑ. ඔබම මේ චිත්‍රපටිය නරඹලා රසවිඳින්න. දැනට ජබ් වී මෙට් ගැන මෙපමණයි. ඊළඟ සටහන ලියන තෙක් මේ චිත්‍රපටියේ “නගාඩා නගාඩා” පන්ජාබ් ගීතය රසවිඳින්න…

වෙනත් යොමු: විකීපිඩියානිල වෙබ් අඩවිය

SPEED නියතං BANDWIDTH අනියතං

ඔන්න ඉතින් අන්තර්ජාලයේ භාවනා කරපු මට ඔන්න අන්තර්ජාලයේ පාවෙන්න චාන්ස් එක ලැබුනා. ගත්තා මොබිටෙල් Broadband එත් ඉතින් හිතෙන හිතෙන විදිහට පාවෙන්න නම් බෑ. මොකද ඉතින් Bandwidth එකක් තියෙනවානේ. ඒක නිසා මැණිකක් රකිනා නා රජි‍ඳෙකු සේ Bandwidth එක රැකගන්න ඕනේ. නැත්තන් ඉතින් මාසේ අන්තිමට නුගේගොඩ හන්දියට වෙලා හිඟාකන්න තමා වෙන්නේ. කොහොමවුනත් තාම මොඩම් එක ලැබුනේ නෑ. මොඩම් එක ලැබුනට පස්සේ වැඩියෙනුත් එක්ක කියන්නංකෝ! 🙂

සාමය සතුට පිරි සුභ නව වසරක් වේවා!

මේ ලබන්නාවූ ශ්‍රී සුභ නව වසර සමස්ත ශ්‍රී ලාංකීය ජනයාට සෞභාග්‍යයෙන් සපිරි, සාමයෙන් සතුටෙන් පිරි සුභ නව වසරක් වේවායි ඉත සිතින් ප්‍රාර්ථනා කරමි.

මේ නව වසරේ වාද භේද අත්හැර සියල්ලන්ම ශ්‍රී ලාංකිකයන් සේ ජාතිකාභිමානයෙන් එක්වී සාමය උදෙසා කැපවී දේශයට සාමය ළඟ කරවා ගැනීමට කටයුතු කරන්නේද, එය තුලින් අප හට ඉදිරිය යහපත්වූ සාමකාමී දේශයක් ගොඩනැගීමට අනිවාර්යයෙන් හැකිවනු ඇත. අවුවක් වැස්සක් නොතකා දේශයේ සාමය රකින අපේ මහා අරක්ෂක මුර දේවතා පවුර‍ට මේ වසර සුභම සුභ නව වසරක් වේවායි පතනුයේ රටට වින කරන ත්‍රස්තවාදී බල සේනා සුනු විසිනු වී ‍දේශයට සාමය ළඟා වේ යැයි පරම පවිත්‍ර වූ චේතනාවෙනි.

ඔබ සැමට සුභ හෙට දිනයක් දැකීමට හැකිවන, සාමය-සතුට-සෞභාග්‍ය පිරි සුභම සූභ නව වසරක් වේවා!

අන්තර්ජාලය සමඟ භාවනා කිරීම

Sri Lanka Telecom

ඔන්න ඉතින් කාලෙකට පස්සේ ආපහු ලියනවා. ලියන්න බැරිවුනේ අපේ පළමු වාර විභාගේ නිසා. විභාගේ නම් දැන් ඉවරයි. ඇඟට නොදැනීම අප්‍රේල් නිවාඩුවටත් ටිකෙන් ටික ළඟා වෙනවා. ජීවිතේ කියන්නේ ඔහොම තමයි කාලය යනවා තේරෙන්නෙම නෑ. සාමාන්‍ය පෙළ ලියන්නත් තව මාස කිහිපයයි තියෙන්නේ. මම තාම පාවිචිචි කරන්නේ ශ්‍රී ලංකා ටෙලිකොම් සී. ඩී. එම්. ඒ දුරකතනයක්. ඒකෙන් තමයි මේ ඔක්කොම වැඩ ටික අමාරුවෙන් හරි කරන්නේ. මට දැන් අන්තර්ජාලය සමඟ කටයුතු කිරීම නම් හරියට භාවනාවක් වගේ. පුදුම ඉවසීමක් තියෙන්න ඕනේ මේ සී. ඩී. එම්. ඒ එකෙන් අන්තර්ජාලයට සම්බන්ධවෙන්න. ඒක නිසාම මම මාස තුනකට කළින් (2008 ජනවාරි) නුගේගොඩ ටෙලිකොම් එකට ගිහිල්ලා කිව්වා මට දැන් තියෙන්නේ CDMA දුරකතනයක්, මට ඒක ස්ථාවර දුරකතනයකට මාරු කරගන්න ඕනේ කියලා. ඊට පස්සේ ඒ අය ලියුමක් ඉල්ලුවා. ඊට පස්සේ දවසේ මම ආපහු ගිහිල්ලා ලියුම භාරදුන්නා ඔන්න දැන් සතියක් විතර හිටියා. ඊට පස්සේ ආපහු ගියා නුගේගොඩ ටෙලිකොම් එකට. ගියාම එතනින් කිව්වා ඔයාගේ ෆෝන් එක ඇරගෙන තියෙන්නේ හම්බන්තොටින්, ඒක නිසා හම්බන්තොටින් මෙහාට මුලින් මාරු කරගෙන ඉන්න කියලා. ඔන්න ඒකටත් ඉතින් ලියුම භාරදීලා සතියක් විතර ගියා එහෙම සතියක් ඉඳලා ඒකට ගිහිල්ලා CDMA එකේ අංකෙත් මාරු කරගෙන ආවා. එහෙමත් කරලා ආපහු අළුත් අංකෙත් දාලා ලියුමක් දුන්නා

ඔන්න ඉතින් ඊටපස්සේ තව ටික කාලයක් ගියා තාම නෑ කිසිම පිළිතුරක් ඉතින් ඒක නිසා ආපහු මම ගියා නුගේගොඩ, ඊට පස්සේ එතනින් කිව්වා loops බලන්න දාලා තියෙන්නේ තව සතියකින් විතර එන්න කියලා…ඔහොම ඔහොම සතියෙන් සතිය ගියා දැන් අප්‍රේල් මාසෙත් පටන් ඇරගෙන ඒත් තාම නෑ පිළිතුරක් දැන් මොකද කරන්නේ… මට නම් දැන් එපා වෙලා තියෙන්නේ.

සිංහල බ්ලොග්කරුවන්ගේ සංසදය දැන් ක්‍රියාත්මකයි!.

ශ්‍රී ලාංකේය බ්ලොග්කරණය ප්‍රචර්ධනය හා සිංහල බ්ලොග්කරුවන්ගේ උන්නතිය උදෙසා, සිංහල බ්ලොග් ලියන්නන්ගේ එකමුතුවෙන් නිර්මාණය වූ නවතම වෙබ් අඩවිය “සිංහල බ්ලොග්කරුවන්ගේ සංසදය“යි මෙම වෙබ් අඩවිය හරහා සිංහල භාෂාවෙන් බ්ලොග් ලියන්නන් වෙනුවෙන් විවිධ ඉසව් ඉදිරිපත් කිරීමට බලාපොරොත්තු වන අතර, ඒවායෙහි ප්‍රධාන අරමුණ වන්නේ තරඟකාරීත්වයක් ඇතිකිරීම නොව සිංහල බ්ලොග්කරුවන් අතර සුහදත්වයක් ගොඩනැගීම හා නිර්මාණශීලි බව වර්ධනය කිරීමයි. දැන් ඔබට http://www.sinhalabloggers.com වෙබ් අඩවිය හරහා මෙම ඉසව් සඳහා සහභාගී වීමට කටයුතු සලසා ඇත.
මෙම වෙබ් අඩවියෙන්…
+ සිංහල භාෂාවෙන් බ්ලොග් ලිවීම ප්‍රවර්ධනය කිරීම
+ බ්ලොග් ලියන්නන්ගේ අනන්‍යතාවය සුරැකීම
+ බ්ලොග් ලියන්නන්ගේ බ්ලොග් ලිවීම සම්බන්ධ ගැටළුවලදී සහයෝගය දැක්වීම
+ බ්ලොග් ලියන්නන් දිරිමත් කිරීම
+ බ්ලොග් ලියන්නන් අතර සුහදත්වය ගොඩනැගීම
+ සහ තවත් බොහෝ දෑ.

ඔබත් පහත් යොමු හරහා මෙම වෙබ් අඩවි සමඟ එකතු වී, සිංහල භාෂාවෙන් බ්ලොග් ලිවීම ප්‍රවර්ධනයට උපකාරී වන්න.
ප්‍රධාන වෙබ් අඩවිය – http://www.sinhalabloggers.com
සංසදය (Forum) – http://forum.sinhalabloggers.com

මෙම වෙබ් අඩවියට තවත් විශේෂාංගද එකතු කෙරෙමින් පවතින බැවින්, කරුණාකර එම විශේෂෘංග පිළිබඳ දැනුවත් වීමට සිංහල බ්ලොග්කරුවන්ගේ සංසදය වෙබ් අඩවිය සමඟ නිතිපතා රැඳී සිටින්න.

සිංහල සාහිත්‍යයේ “ඊ”ළඟ යුගය වැඩි ඈතක නොවේ!

වර්තමානය වන විට සිංහල භාෂා මාධ්‍යයෙන් නිර්මාණය කරන ලද බ්ලොග් අඩවි හා වෙබ් අඩවි අනෙකුත් භාෂාවන්ට සාපේක්ෂව ඉතාමත් අඩු ප්‍රමාණයකිනුයි පවතින්නේ. නමුත් මෙම බ්ලොග් අඩවි හරහා මේ වන විට සිංහල සාහිත්‍යයේ නව මානයක් විවෘත කරමින් සිටිනවා. මෙය අප හැමදෙනාටම ඉතාමත් අවශ්‍ය කරන්නාවූ දෙයක්. කලින් වැඩිහිටියන්ට පමණක් සීමාවී තිබූ අන්තර්ජාලය මේ වන විශේෂයෙන්ම කොළඹ මධ්‍යගත කරගෙන පාසල් සිසුන් අන්තර්ජාලයට යොමුවෙලා තියෙනවා. නමුත් සාපේක්ෂ වශයෙන් අන්තර්ජායේ ශ්‍රී ලංකා‍වට වැදගත් වන, ශ්‍රී ලංකාව ප්‍රවර්ධනය කිරීමට ලබාදෙන දායකත්වය ඉතාමත් අඩුයි. ඔවුන් වැඩිපුරම යොමු වෙලා තියෙන්නේ සමාජ ජාල (Social Networking) වෙබ් අඩවි වෙතයි. කෙසේ නමුත් මා මුලින් පැවසූ ආකරයට අන්තර්ජාලයේ මේ විවෘත වන නව ශ්‍රී ලාංකීය අනන්‍යතාවය රටක් වශයෙන් අපට බොහෝ සෙයින් වැදගත්. සෑම දෙයකම හොඳ පැතිකඩ හා නරක ප්‍රතිඵල තිබෙන්නා මෙන්ම මෙහිදීද හොඳ සහ නරක මිශ්‍රව පවතිනවා.

මේ වන විට ශ්‍රී ලංකාව පුරා සැලකිය යුතු ප්‍රදේශවල නැනසල වැනි ආයතන බිහිවී තිබෙන නිසාත්, සිංහල යුනිකේත තාක්ෂණය භාවිතය සාපේක්ෂව වැඩිවී තිබෙන නිසාත් එම නැණසල මධ්‍යස්ථාන හරහා ගම්බද ශිෂයින්ට නිතිපතා තාක්ෂණය සමඟ යාවත්කාල වෙමින් තම දැනුම පුළුල් කර ගැනීමට හැකියාව තිබෙනවා.

නමුත් ඔන්න විශාල අර්බුදයක් ඇතිවීමට හැකියාව තිබෙනවා. එයට හේතුව වන්නේ මෙයයි. තවමත් ගම්බද ප්‍රදේශ වල ඉංග්‍රීසි දැනුම පවතින්නේ යහපත් මට්ටමක නොවේ. එමෙන්න සාමාන්‍ය ඉංග්‍රීසි දැනුම ලබා ගැනීමට අවශ්‍ය තරමේ ගුරුවරුන්ද සොයාගැනීමට අපහසුයි. එමනිසා අන්තර්ජාලය තුල දැනුම බෙදා දීම සඳහා සිංහල හෝ දමිළ මාධ්‍ය වෙබ් අඩවි ප්‍රමාණය වැඩිවිය යුතුයි. මේ වන විට දමිළ මාධ‍යයේ වෙබ් අඩවි ප්‍රමාණය වැඩි අගයක් ගත්තත් සිංහල මාධ්‍යයේ වෙබ් අඩවි ප්‍රමාණය ඉතාමත් අවම ප්‍රමාණය තිබෙනවා. ඒ අනුව වාණිජ හෝ වාණිජ නොවන පරමාර්ථයකින් සිංහල මාධ්‍ය වෙබ් අඩවි නිර්මාණය කිරීම ආරම්භ කිරීම කළ යුතුයි.

මේ වන විට තමන්ගේ බ්ලොග් අඩවි හරහා ජ්‍යෝතිෂ්‍ය වැනි විශයන්ද සිංහල භාෂාව මාධ්‍යයෙන් අද්‍යාපනික වැදගත්කමක් සහිත ආකාරයකින් නිර්මාණ වෙලා පවතිනවා. එමෙන්ම තමන්ගේ අදහස් උදහස් පළකරන ආකාරයෙන්ද තවත් බ්ලොග් අඩවි තුළ තාමන්ගේ විද්‍යා දැනුම අන් අයට ලබාදීම සඳහා ක්‍රියාත්මක වෙමින් පවතිනවා. තවත් බ්ලොග් අඩවි වල තමන්ගේ හිතට නැගෙන සිතුවිලි කවි හෝ නව කතා, කෙටි කතා බවට පත් කොට ප්‍රචාරණය කරමින් සිටිනවා. මේ සියල්ලම අනාගතයේදී අපගේ සාහිත්‍යට විශාල බලපෑමක් කරනු නියතයි. එමෙන්ම මෙම බ්ලොග් අඩවි තුළින් සිදුවන සේවාව ඉතා ඉහළින්ම ඇගයීමකට ලක් කල යුතුයි.

අනෙක් කරුණ නම්, භාෂාව. භාෂාව අපගේ මව් හා සමාන දෙයක් එනිසාම තමයි අපිට මව් භාෂාව යන වදන පරිහරණය කරනු ලබන්නේත්. භාෂාව විනාශ කිරීම අපගේ මව් විනාශ කිරීම තරම්ම සමානයි. නමුත් අන්තර්ජාලය තුලදී සිංහල භාෂාව භාවිතයේදී තාක්ෂණික ගැටළු නිසාම හා තමන්ගේ භාෂා දැනුමේ ඇති දුර්වල භාවය නිසාවෙන් ඇති වන වියරණ ගැටළු සාමාන්‍ය දෙයක් ලෙස සැලකීමට හැකි වුවත් අප අපේම විද්‍යුත් සාහිත්‍යක් නිර්මාණය කිරීමේදී හැකි තාක් දුරකට අක්ෂර පිළිබඳ සැලකිලිමත් වීම වැදගත්. මන්දයත්, යම් කිසි සංස්කෘතියක, රටක පැවැත්ම සඳහා භාෂාව ඉතාමත් වැදගත් නිසා. සියළු දෙයහි පැවැත්වෙන අනිත්‍ය ස්වභාවය සිංහල භාෂාවටත් පොදුයි. එම නිසා සිංහල භාෂාවට සිදු වන්නාවූ වෙනස්කම්, වඩාත් හරවත්, ධනාත්මක ආකාරයට යොදා ගත යුතුයි. භාෂාවක් විනාශයට පත් වූවහොත් නැවත ගොඩනැගීම ඉතාමත් අපහසු කාරණයක්.

විවෘත ලෝකය සමඟින් ගනුදෙනු කිරීමේදී ජාත්‍යන්තර භාෂාවක් වශයෙන් ඉංග්‍රීසි භාෂාව ප්‍රමුඛත්වයක් ගන්නා නිසා. හැකි තාක් දුරට ඉංග්‍රීසි භාෂාව රට පුරා සිටින සෑම අයෙකුටම ලබා දීම වැදගත්. ශ්‍රී ලංකා‍ව කුඩා රටක් නිසා ඉංග්‍රීසි භාෂාව ප්‍රවර්ධනයට අවශ්‍ය පහසුකම් නැංවීටමට ඉතා විශාල හැකියාවක් තිබෙනවා. එමෙන්ම අප රටෙහි ක්‍රියාත්මක වන නිදහස් අධ්‍යාපනය නිසාවෙන් මෙය සිදු කිරීම පහසු කාර්යයක්. නමුත් ඉංග්‍රීසි භාෂාව නිසා ලංකාවේ භාවිත සිංහල හා දමිළ භාෂාවන් අමතක කිරීම නම් ඉතාමත් අවැදගත් වැඩක්. අප හොඳින් හඳුනනා අරිසෙන් අහුබුදු මහතා පවසන ආකාරයෙන් අධ්‍යාපනයේ මුල් කාලය තුළ හැකි උපරිම අයුරින් තම තමන්ගේ මව් භාෂාව සම්පූර්ණයෙන්ම ඉගැන්වීම සිදුකළ යුතුයි.

ඒ අනුව අප අපගේ විද්‍යුත් සාහිත්‍ය යුගය (E-සාහිත්‍ය) ඇරඹීමෙන්. වඩාත් යහපත් අනාගතයක සුභ ළකුණු දකින. දෙස බස රකින් තාක්ෂණයෙන් පිරිපුන් නිර්මාණශීලි අනාගත පරපුරක් බිහිකිරීමට හැකිවනු ඇත.

තරු පෙනෙන තරු

දැන් ශ්‍රී ලංකාවේ මාධ්‍ය වල අළුත්ම ප්‍රවනතාවය වෙලා තියෙන්නේ තරු බිහි කිරීමනේ. ඔන්න ඉතින් තවත් තරු පෙන්නන වැඩ සටහනක් ආරම්භ කරලා ඒකේ නම නම් දෙරණ ඩ්‍රීම් ස්ටාර්! අර සිරස සුපර් ස්ටාර්ස් වගේම තමයි. ළඟදීම දවසක දෙරණ රූපවාහිනිය හරහා අපිට තරු බලාගන්න පුළුවන්. කොහොම හරි ඉතින් SMS යවලා වියදම් වෙච්ච ගාන බැලුවම ඉතින් කාට කාටත් හොඳ හැටි තරු පෙනේවි!