නිදහසට 60යි!

Sri Lanka Flag

කැමිලස්ගේ සිරිබිරිස් කාටූනය

ශ්‍රී ලංකාවේ “නාමිකව පමණක්” සමරන 60වැනි නිදහස් උළෙළ යෙදී ඇත්තේ 2008 පෙබරවාරි මස 4වන දිනටයි. නිදහස ලංකාව ලැබෙන විට ලංකාවේ තිබූ ආර්ථිකමය හා දේශපාලනමය තත්ත්වය පිළිඹිඹු කෙරෙන මගේ සිත්ගත්ම කාටූනයක් මෙවර රිවිර පුවත්පතේ පලවුනා (කවුරුවත් හිතන්න එපා මම රිවිර පුවත්පතම මාර්කටින්ග් කරනවයි කියලා. අපේ ගෙදරට ඉරිදාට ගේන්නේ රිවිර පත්තරේ, එක නිසයි රිවිර පත්තරේ තියෙන ඒවා ගැනම කියන්නේ). එම කාටූනය මගේ මේ සටහනටත් එකතු‍ වෙනවා. එම කාටූනයේ සියළුම අයිතිය රිවිර පුවත්පත සතුවන බව මතකයේ තබාගන්න.‍ කාටූනයක් වුනාට මෙහි මතුපිට ඇත්තේ සම්පූර්ණ සත්‍යයක්. නිදහස ලැබෙන විට තිබූ තත්ත්වය අනුව මේ වන විට අප නිදහස ලබා‍ ගෙනත් කරමින් සිටින්නේ කුමක්ද යන්න විශාල ගැටළුවක්. අපිට පිටුපසින් සිටි සිංගප්පූරුව වැනි රටවල් ලංකාව පසු කරලා ගොඩක් දුර ගිහිල්ලා. මේවාට හේතු මොනවාද? කවුද මේවාට වගකියන්නේ? මේවා ගැන කතාකරන්නත් එපා වෙනවා. නිදහසට විවිධ අර්ථකථන තියෙන්න පුළුවන්. ඒත් රටේ ගැටළුවලට දෙන්න පුළුවන් නිවැරදිම අර්ථකතනය නම් රට කරවු, දේශපාලඥයින්ගේ වැරදි නිසා තමයි මේ රටට වෙලා තියෙන්නේ. රට ස්වයංපෝෂිත කරන්න ඕන තරම් පියවර මීට කලින් ගන්න ඕන තරම් නිදහස තිබුනා. ඒත් දැන් තමයි කට්ටියට මතක් වෙලා තියෙන්නේ “අපි වවමු රට නගමු” වගේ වැඩ පියවරවල් ‍ගන්නේ. පරක්කු වෙලා වුනත් කරන වැඩේ නම් හොඳයි. ඒත් අපේ රටේ මිනිස්සුන්ගේ ලොකු අවුලක් තියෙනවා. කට්ටියට මොකක් හරි හොඳ දෙයක් කරන්න මතක් වෙන්නේ විනාශ වෙලා ඉවර වුනාට පස්සේ. ඉතින් ඊට පස්සේ අපේම අය කියනවා අනේ ඉතින් මෙහේම කරානම් හොඳයිනේ අරකයි මේකයි කියලා. ඉතින් අපි 60වෙනි නිදහස සමරන මේ මොහෝතේදීවත් හිතාගමු. රටට මොකක් හරි ‍හොඳ වැඩක් කරලා මේ රට වැටිලා තියෙන අගාධයෙන් ගොඩ අරගන්න උදව් වෙමු කියලා. පෑනෙන් පුළුවන් අය පෑනෙන්, උදැල්ලෙන් පුළුවන් අය උදැල්ලෙන්… ඒ විතරක් නෙමෙයි කී බෝර්ඩ් එකෙන් පුළුවන් අය කී බෝඩ් එකෙන් වැඩ කරලා, ජාති බේද, කුළ බේද වලින් අයින් වෙලා එක ධජයක් යටතේ එකමතුව වැඩ කරලා අපේ රට සම්පූර්ණයෙන්ම නිදහස් කරගනිමු!

සිංහලයන් යනු කවුරුන්ද? – 2

මම කලින් සටහනක ලිව්වා. සිංහලයන් යනු යක්ෂ, නාග, දේව හා තවත් එක් ගෝත්‍රයක් යන බව. මම අර “තවත් එක් ගෝත්‍රයක්” ලෙස කලින් ලිව්ව දේ මම අද (2008-01-02) හොයාගත්තා ඒ රිවිර පත්තරේට (2008-01-03 දිනට පළවන පුවත්පත) ජයරත්න පතිර ආරච්චි මහතා ලියපු ලිපියක තිබිලා.

මෙන්න ඒ අනුව සිංහල යන ඒකීය ජන කොට්ඨාශය සැදුම් ලත් සිව් හෙළයන්
1. යක්ෂ
2. නාග
3. දේව
4. ගාන්ධර්ව

මේ පිළිබඳව තව ඉදිරියටත් විවිධ සොයා බැලීම් වලින් අනතුරුව ලිපි ලියන්න මම සූදානමින් සිටිනවා. දිගටම සුදාරකගේ අන්තර්ජාල සටහන සමඟ එක්වන්න. ඉහත පළ කර ඇති කරුණු තවදුරටත් විමසා බැලීමට http://www.rivira.lk/2008/02/03/rividahara3.htm වෙත පිවිසෙන මෙන් කාරුණිකව ඉල්ලා සිටිමි.

අතීත සිහිනය (කෙටි කතාවකි)

මේ කෙටි කතාව මම 8ශ්‍රේණියේ ඉගෙන ගනිද්දී ‍සිංහල ඇගයීමකට ඉදිරිපත් කරන්න ලියපු කෙටි කතාවක්.මේකේ පොඩි සංස්කරණයන් කරලා තමයි දැක් මගේ අන්තර්ජාල සටහනට දාන්නේ.

එදින රාත්‍රී ආහාරය නිමකොට නිමල් තම නේවාසිකාගාර සයනාගාරයට පැමිණයේ රාත්‍රී දහයට සියල්ලන්ම නින්දට ගියවිට සියල්ලන්ටම රහසේ ලිපියක් ලිවීමට සිතේ අදිටන් කරගෙනය. තමා එව වසරේදී ලංකාවේ සෑම 5ශ්‍රේණායේ සිටින්නාවූ සියළුම සිසුන්ට මුහුණදීමට සිදුවූ ශිෂ්‍යත්ව විභාගය ගැන කිහිප විටක්ම මෙනෙහි කළේය. රාත්‍රී නින්දට යන සීනුව වැදෙනු ඔහුට හොඳින් ඇසුණි. නිමල් සහ අනෙක් ළමෝ එම හඬට අවනත වී නින්දට යාම සඳහා තම තමන්ගේ ඇඳවල් වෙතට ළං විය.

සියල්ලන්ම තමන්ගේ සයන වල දිගාවී ඔවුනොවුන්ගේ ඕපාදූප කීමට පටන් ගත් අතර එහෙන් මෙහෙන ඇහෙන සිනා හඬවල් වලට කන් නොදුන් නිමල් වෙනදා මෙන් නොව නිහඬව කල්පනාවේ යෙදී සිටියේය.

එක්වරම සියල්ලලෝම නිහඬ විය. එයට හේතුව වූයේ හිටිගමන් සයනාගාරයට කඩා වදිනා ශිෂ්‍ය නායකයා පැමිණීමේ සංඥ්‍යව බව නිමල් සහසුද්දෙන්ම දත්තේය.

“කෝ මේකේ මොනිටර්!”
ඒ ශිෂ්‍ය නායකයාගේ හඬය.

අඩි සද්දයක් නැඟී එක්වරම නැවතිණ.

“ආ තමුසෙද මොනිටර්?”…
“ඇයි යකෝ තාම ලයිට් දාලා? අපි තමුසෙලට කියලා තියෙනවා නේද නමයයි කාලට ලයිට් නිවන්නයි කියලා? ආ? කතා කරපන්! මොකද ගොළු වෙලා?”
ශිෂ්‍ය නායකයා‍ගේ කට හඬ ඉතාමත් දැඩි විය.

චටාස්! පටාස්! හඬට බියවූ නිමල්ගේ දෑස් ඉබේම විවෘත විය. නිමල් දුටුවේ තම සයනාගාර නායකයාව කමිස කොලරයෙන් අල්ලාගෙන සිටින ශිෂ්‍ය නායකයාය.

නැවත වරක් දෑස් වසාගෙන ඔහුට මුනින් අතර හැරී නිදා ගන්නට සිත් වූවත් ඔහුට රාතුයේ කිරීමට වැඩ කිහිපයක් ඉතිරිවී තිබුණි. සයනාගාරයේ තත්ත්වය සන්සුන් වූ අතර සයනාගාර නායකයා ආලෝකය නිවා දැමූ අතර මුළු සයනාගාරයම නිහඬතාවයට පත් විය.

මඳ වේලාවකට පසු තම කොට්ටය යත අතපත ගා විදුලි පන්දම සොයාගෙන දල්වාගත් නිමල්, කොට්ටය යට තිබූ තනිරූලි පොත ගෙන මැද පිටුව ඉරා ගත්තේය.

පෑන අතට ගත් නිමල් මෙසේ පිටුවේ සටහන් කරන්නට විය

“නේවාසිකාගාරයේ සිට ලියමි,
බුදු සරණයි!
ආදරණීය අම්මා සහ තාත්තා වෙත,

අම්මා ඊයේ මාව බලන්න මෙහේ ආවේ නැත්තේ ඇයි? ඊයේ කෝල් එකක්වත් නොදුන්නේ ඇයි අද හරි දෙන්න තිබුනනේ… “

තව මොනවාද ලියන්නේ… නිමල් කල්පනා කරන්නට පටන් ගත්තේය. නොදැනීම ඔහු අතීතයට දිව ගියේය…

ගමේ පාසලෙන් ඉගෙනීමට පියවර තැබූ නිමල් පළවන ශේණියේ සිටම සෑම විෂයකින්ම පන්තියේ පළමු වැනියා වීමට තරම් දක්ෂයෙක් විය. ලංකාවේ සෑම සිසුවෙකුගේම ප්‍රථම කඩඉම වූයේ 5ශේණි ශිෂ්‍යත්වයයි. නිමල් 5වසරේ ශිෂ්‍යත්වය සඳහා පන්ති ගියේද නැත, ඔහුට පන්ති යාමට අවශ්‍ය වූයේද නැත. දෙමව්පියන් කිසිදු බල කිරීමක් කළේද නැත. ඔහුට අවශ්‍ය වූයේ සතිපතා ළමා පුවත්පතත්, අසල්වැසි ළමෝ සමඟ සෙල්ලම් කිරීමටත්, රූපවාහිනිය නැරඹීමටත් පමණි.

පාසලේ වැඩ අකුරටම කළ ඔහුට පාසලේ ලබාදුන් ශිෂ්‍යත්ව පෙරහුරු ප්‍රශ්න පත්‍ර වලට සියයත්, අසූවත් අතර ළකුණු ප්‍රමාණයක් ලැබුණත්, සමහරක් විට ළකුණු හැට හැත්තෑව නොලැබුනා නොවේ. පන්තියේ පිරිමි ළමුන්ගේ නායකයා වූ නිමල්ට කාගේත් පුසාදය හිමිවුන අතර පන්තියේ සෑම ළමයෙක්ම ඔහුට මිතුරන් වූ අතර එයින් එක් විශේෂ මිතුරියක්ද නොසිටියා නොවේ.

ඒ ශිෂ්‍යත්ව දිනය විය. උදේ පාන්දරම නින්දෙන් පිබිදු නිමල් කෙළින්ම ගියේ තමන්ගේ මේසය වෙතය. ඔහු පාසලේදී කළ සියළුම ප්‍රශ්න පත්‍ර පරික්ෂා කර බැලුවේය. මුහුණ සෝදා ගත් නිමල්, උදේ ආහාරය ගෙන උදේ නවයයි තිහ වනවිට විභාග ශාලාවට ඇතුල්විය. ප්‍රශ්ණ පත්‍රය අතට ලැබිණ එය දුටු විට නිමල්ට එය කජු කනවා මෙන් ලෙහෙසි විය. නිමල්ය එය එදානම් සතුටට කාරණයක් විය. ඒත් අද?

ප්‍රතිඵල අන්තර්ජාලයට මුදා හැර ඇති බව දැනගත් නිමල්, පාසල් නොගොස් පියා සමඟ නගරයට ගොස් අන්තර්ජාල පහසුකම් ඇති ස්ථානයකින් ළකුණු දැනගනීමට ගියේය. ළකුණු දැනගත් ඔහුගේ ඉහේ මලක් පිපුනා මෙන් විය. ළකුණු 178ක් නිමල් ලබා තිබුණි. ඔහු පාසලේ අවසන් වාර පරීක්ෂණ විභාගයෙන්ද පළමු තැන ලබාගෙන සිටි‍යේය.

අතීත ආවර්ජනයක යෙදුනු නිමලු යෙදී දිටි කාර්යයට හිත යොමා නැවත ලිපිය ලියන්නට පටන් ගත්තේය

“… අනේ අම්මේ මාව මෙහෙන් එක්ක යන්න. මට නම් අම්මයි තාත්තයි නැතුව මෙහේ ඉන්න බෑ. ඊයේ ටී ටයිම් එකේදී වැඩිපුර බිස්කට් ඉල්ලුවයි කියලා මගේ හොඳම කමිසේ කොලර් එකෙන් අල්ලලා ඉස්සුවානේ, උඩ බොත්තම් දෙකක්ම ගැලවුනා. දවසක් මගේ යාළුවාගේ ඇද හරියට හදලා නැතිව පොඩ්ඩක් රැළි තිබ්බයි කියලා එයාගේ කනෙන් ලේ එන්න ප්‍රෆෙක්ට් අයියා කම්මුලට ගැහුවා. මට නම් මෙහේ ඉන්න බෑ බෑමයි…”

එක්වරම නිමල්ගේ දෑසීන් කඳුලු කැට ගලා එන්නට විය. කදුළු බින්දු ලියුමේ තැනින් තැනට ‍වැටෙන්නට විය. එනිසා ලියුමේ තැනින් තැන බොඳවන්නට විය. වමෙම විද්‍යාලයට පැමිණීමට ලැබුනේ නිමලුගේ පෙර පිනකින් බව කලින් පාසලේ ගුරුතුමා එදා පැවසූ බව මතකයට නැඟුනු නිමල්ට සිතුනේ මේ නේවාසිකාගාරයට පැමිණියේ මහා පවකට බවයි.

නැවතවරක් කල්පනාවට පිවිසි නිමල්ගේ දැහැන බිඳුනේ නේවාසිකාගාර පාලකයාගේ කට හඬිනි…

“කවුද 6වසරේ නිමල් කියන්නේ?”
“සර් මම!” යැයි කියමින් තමා නිදා සිටි සයනයෙන් බැස පාලක තුමා ළඟට ගියේය.

“ආ, ඔයාද? මේ දැන් ටිකකට කලින් කෝල් එකක් ආවා” පාලක තුමාට ඉතිරි ටික කීමට නිමල් ඉඩ දුන්නේ නම් නැත.

“මේ දැන්? මට? කවුද කතාකළේ? අම්මාද? තාත්තාද? මොකක්ද කිව්වේ?”
ප්‍රශ්න වැලෙන් හෙම්බත්වූ පාලක තුමා…
“ඔව්, ඔයාට, පොඩ් ආරංචියක්, ඒත්,”
“ඇයි? ඒත්?” නිමල්ට ඉවසිලි නැති විය.
“ඒ…ත්…. ඔයාගේ තාත්තා… කිව්වා… ඊයේ ඔයාගේ… අම්මා…”
“ඊ…යේ මගේ අම්මා? ඔව්… ඉතින්….?”
“ඊ…යේ ඔයා..‍ගේ… අම්ම… ඔයා…ව බලන්න… එද්දී බස්… එකට… අ… අනතුරක්… වෙලා…..”
“මොනවා…!! වෙන්න බෑ….!” මේ වන විටත් නිමල්ගේ දෑසින් කඳුලු බිඳු එකින් එක වැටෙන්නට පටන්ගෙන තිබුණි.

නිමල්ට ඒ දිනය මහා මූසල දිනයක් විය. වේලාව සෙමෙන් ගෙවී ගියේය තමාගේ මිය ගිය මව ගැන සිතමින් ඔහු නින්දට ගිය අතර ඒ වන විටත් ඔහුගේ සයනය ඔහුගේ කඳුළු වලින් තෙමී තිබිණ. පැය කිහිපයකිව් ඔහු වෙත කෙමෙන් කෙමෙන් නිදි දෙව් දුව ළඟා විය.

“නිමල් මහත්තයා, තව ලෙඩෙක්”
ඒ කටහඬ රෝහල් සේවක සිරිපාලගේය. එම හඬින් අවදිවූ නිමල් දොස්තර මහතා ඒ රෝගියාට බෙහෙත් කිරීම සඳහා තම අසුනෙන් නැඟිට ශල්‍යාගාරය වෙතට පිය මැන්නේය.

නිමි.

සුපිරි තරු සිහිනය සැබෑවූ වගයි!

ලොව පුරා වෙසෙන ශ්‍රී ලාංකික ජනතාවගෙන් 80%ක් පුල පුලා බලා සිටි දෙවැනි අදියරේ පළමු සුපිරි තරුව ලෙස ඊයේ (2007ක්වූ ඔක්තෝම්බර් මස 27 වෙනි දින) අපේ දොස්තර පුතා හෙවත් ප්‍රදීප් රංගන අභිෂේක ලැබුවා. ගණනය කළ නොහැකි විවෘත හා පෞද්ගලික පැසසුම් ගැරහුම් මධ්‍යයේ දැන් දෙවැනි සුපිරි තරුවද තෝරා අවසන්. මීළඟ සුපිරි තරුව වන්නේ ඔබද මමද? මමත් ඊළඟ සුපිරි තරුව තේරීමේ තරඟයට ඉල්ලුම් පත්‍රයක් යවන්නයි ඉන්නේ… මගේ පළමු වටේ තියෙන දවසට ජාතික සත්තු වත්තෙන් ආවොත් ශ්‍රී ලංකාවට ආවේණික ගැරඬි විශේෂ ඉතාමත් පහසුවෙන් අල්ලා ගන්න පුළුවන් වේවි (සමහරවිට). ගණන් ගන්න එපා විහිළුවක් කරේ (හිනාගියාද දන්නේ නෑ). ඔන්න ඔන්න ට්‍රැක් එකෙන් පිට ගියා. හරි හරි ආපහු මෙවර සුපිරි තරුව ගැන කතාකරමු. ඇත්තටම මට මේ සිරස සුපර් ස්ටාර්ස් 2වැනි අදියර (Season 2) පළමු අදියරට වඩා අති සාර්ථක යැයි හැ‍‍ෙඟනවා. මම නම් මුල ඉඳලම හිතුවේ සුරේන්ද්‍ර පෙරේරා සුපිරි තරුව වේවි කියලා. ඒත් ඉතින් අපි හිතන දේ හැම වෙලාවෙම වෙන්නේ නෑනේ මම මේ ජායාරූප උපුටා ගත්තේ සිරස මාධ්‍ය ජාලයේ ඊතලය වෙබ් අඩවියෙන් එහි සුපිරි තරු අතර දිදිලූ තරු 11ක ජායාරූප තියෙනවා. ඇයි එක්කෙනෙක්ගේ විතරක් නැත්තේ? සුපිරි තරු අනුශූරයා වූ සුරේන්ද්‍ර පෙරේරා ගැන කිසිම සඳහනක් නෑනේ. හිතට නම් ටිකක් දුකයි. මොනවා කරන්නද? සුපිරි තරුව වූ ප්‍රදීප් රංගන අනාගතයේ හදවතට (භෞතිකමය හදවත නොවෙයි) වෙද කම් කරන හදවතේ දොස්තර කෙනෙක් වෙන බවට නොඅනුමානයි. ඔහු දැන් තාරුණ්‍යයේ අයිතමයක් වී හමාරයි. මගෙන් ඔහුට උණුසුම් සුභ පැතුම් තවත් රස බර සිරස සුපර් ස්ටාර්ස් අදියරක් එන තෙක් මා හදවතේ දෑස් නොවසා බලාගෙන ඉන්නවා
ගීතමය දෙයක් පිළිබඳ කතාවක ඉඳිද්දී කාව්‍යමය අදහස් ඉබේම නැගෙනවා. මේ පහතින් මා දක්වා ඇත්තේ මාත් මලින්තත් [ඔහුගේ බ්ලොග් අඩවියට පිවිසෙන්න] අතර ඇතිවූ ජාලගත සංවාදයක (Online Chat) කොටසක්
Supun: කෙසේද සැපදුක්?
malinthe: වරදක් නැත දැන්
Supun: ඇසීමත් වේය සතුටක්
සුපිරි තරුව ගැන ඔබේ අදහස්?
Supun: කිසිවෙක් පැරදුනේ නැත බං
🙂
Supun: මාත් කරනව බ්ලොග් එකක් දැන්
http://www.ssudaraka.blogspot.com
malinthe: සිංහලද?
Supun: නැතුව නැතුව…
malinthe: හොඳා
හිතුවේ නෑ ප්‍රදීප් දිනයි කියා
Supun: මාත් එසේමැයි
සිතූ දේ නොම වේය සැමවිට
ගැසුවා කෙ.ප.සේ 4ක් (පසුව එකතු කරමි – කෙ.ප.සේ කියන්නේ කෙටි පණිවිඩ සේවය හො‍‍ඳේ)
😀
වැඩක් නම් නොම වුනේ
අපරාදේ රු20ක්
malinthe: අපි යැව්වා ප්‍රදීප්ට විසිපහක්!
Supun: මට නම් නැතේ එච්චර මුදල්

ශ්‍රී ලංකාවේ රූපවාහිනී මාධ්‍ය ක්‍රියාකාරීත්වය මගේ ඇසින්.

ශ්‍රී ලංකාව තුළ මේ වන රූපවාහිනී නාලිකා (චන්ද්‍රිකා මඟින් පමණක් විකාශය වන නාලිකා හැර) ආසන්න වශයෙන් 13ක් පමණ සිය විකාශන කටයුතු එකිනෙකා පරයමින් කරගෙන යනු ලබන අතර, එම නාලිකා වලටම සුවිශේෂී වැඩසටහන් මෙන්ම වෙනත් රටවල නාලිකා වල වැඩසටහන් වලට අයත් මොඩල යොදාගනිමින් නිර්මාණය වූ වැඩසටහන්ද ඔවුන් විකාශනය කරනු ලැබේ.

ශ්‍රී ලංකාව තුළ මාගේ ඇසට ගෝචර වූ නාලිකා 13 පහත පරිදි වේ.
ජාතික රූපවාහිනී
නේත්‍ර ටී.වී
චැනල් අයි
ස්වාධීන රූපවාහිනී
සිරස ටී.වී
T. N. L (ටෙලිෂාන් නෙට්වර්ක් ලංකා)
ස්වර්ණවාහිනී
මැක්ස් ටී.වී
දෙරණ
චැනල් වන් එම්. ටී. වී
ඊ.ටී.වී
ටී. වී ලංකා
ආ(ර්)ට් ටී.වී

මෙම නාලිකා අතුරින් චැනල් අයි හා නේත්‍ර ටී. වී එකම නාලිකාව තුළ නාළිකා 2ක් ලෙස මේ වන විට ක්‍රියාත්මක වන අතර. මෙයින් නේත්‍ර ටී. වී තුළ දෙමළ මාධ්‍ය වැඩසටහන් ක්‍රියාත්මක වන අතර චැනල් අයි තුළ ඉංග්‍රීසි මාධ්‍යයෙන් වැඩසටහන් ක්‍රියාත්මක වේ. මේවාට අමතරව දෙමළ මාධ්‍යයෙන් ක්‍රියාත්මක වන නාලිකාවක් ලෙසින් ශක්ති T. V. පෙන්වා දිය හැක. ඉංග්‍රීසි මාධ්‍ය‍යෙන් විකාශනය වන නාලිකා ලෙස ඊ. ටී. වී (ETV), ආ(ර්)ට් ටී. වී. (ART TV) හා Channel One MTV හැඳින්විය හැක. අනිකුත් සියළුම නාලිකා සිංහල භාෂා මාධ්‍යය ‍ඔස්සේ සිය වැඩසටහන් විකාශනය කරනු ලබයි.

මෙම නාලිකා ප්‍රධාන වශයෙන් කොටස් 2ක කට පැහැදිලිව වෙන් කිරීමට හැකි අතර ඒවා නම්,
රජයේ මාධ්‍ය හා පෞද්ගලික මාධ්‍ය වේ. ජාතික රූපවාහිනී, Channel Eye, Nethra TV හා ස්වාධීන රූපවාහිනී ප්‍රධාන වශයෙන් රජයේ මාධ්‍ය ලෙස පැහැදිලිව වෙන් කිරීමට හැකියාව ඇති අතර අන් සියළුම නාලිකා පෞද්ගලික නාලිකා වේ.

ජාතික රූපවාහිනී නාලිකාව පිළිබඳ…
ජාතික රූපවාහිනිය මීට කාලයකට පෙර අති උසස් අන්දමින් සිය වැඩසටහන් විකාශනය කරන ලද අතර, මේ වන විට සිය තත්ත්වය පහත මට්ටමකට ගෙන ගොස් ඇති අතර මේ වන සිය ප්‍රේක්ෂකයින්ගේ සංඛ්‍යාව සීඝ්‍රයෙන් පහත වැටීමකට ලක්වී ඇති බව එක් එක් සමීක්ෂණ වාර්තා වලින් පැහැදිලි වේ. රට පුරාම පැහැදිලිව නැරඹීමේ හැකියාව ඇති වීම විශේෂත්වයක් වන අතර, සාමාන්‍යයෙන් මෙම නාලිකාව වැඩි වශයෙන් නරඹනුයේ කොළඹ දිස්ත්‍රික්කයෙන් බැහැර වූ වැඩිපුර නාගරීකරණයට ලක් නොවූ දිස්ත්‍රික්ක වල වේ. තාක්ෂණය යොදා ගෙන ඇසට ප්‍රිය අන්දමින් වැඩසටහන් ඉදිරිපත් කිරීමට තරම් හැකියාවක් නොමැති බව පෙන්නුම් කරන අතර එනිසා වෙනත් නාලිකා වලට සැලකිය යුතු පිරිසකගේ යොමුවීම නිසා එය ඔවුන්ගේ ග්‍රාහකයින් අඩු වීමට තවත් එක් හේතුවකි. නමුත් මෑතකදී තිරගත වූ චිත්‍රපටි ඔවුන්ගේ නාලිකාව තුළින් විකාශනය කිරීම ප්‍රේක්ෂකයින්ගේ සතුටට කාරණයකි. කලකට පෙර ඔවුන්ගේ ළමා වැඩසටහන් වල තිබූ ගුණාත්මක භාවය මේ වන විට ගිලිහී ගොස් ඇති අතර, එම ‍පෙර තිබූ ගුණාත්මක භාවයට සම කළ හැකි කිසිදු වැඩසටහනක් දැන් පවතින් අනෙකුත් නාලිකා වල පවා විකාශය නොවීම තවත් එක් විශේෂ කරුණක් වේ. එමෙන්ම මෙම නාලිකාව දැඩි ලෙස (ඕනෑවටත් වැඩියෙන්) රජයට පක්ෂපාතී ලෙසට ඔවුන්ගේ වැඩසටහන් සියල්ලම හසුරුවයි.

මෙම නාලිකාවෙන් ඉදිරිපත් වූ හා ඉදිරිපත් වන වැඩසටහන් අතුරින් මා සිත් ගන්නේ…
මීට වසර කීපයකට පෙර විකාශය වූ ප්‍රවෘත්ති වැඩසටහන්.
මායා බන්ධන (1 හා 2 කොටස්)
රොබින් හුඩ් (සිංහල උපසිරැසි)
කද මල්ල
නවයයි පහ
පිස්සූ පූසා (කාටූන් – සිංහල හඬ කැවීම්)
දොස්තර හොඳ හිත (කාටූන් – සිංහල හඬ කැවීම්)
හසරැලි රසාර (මපට් ෂෝ)
X-Files Series (සිංහල උපසිරැසි – මේ වන විට නම් විකාශය වන්නේ නැවත විකාශයන් ලෙසය)
බදාදා සැඳෑ නිම්නය (3to5ලෙස මීට වසර කිහිපයකට පෙර විකාශය වූ)
සෙනසුරාදා (ශනිදා) හා ඉරිදා ආයුබෝවන් වැඩසටහන් (මීට වසර 4කට පමණ පෙර විකාශය වූ)
ඉලක්කය

නමුත් මේ ලියන අවස්ථාව වන කාලයට පෙර ගතවී ගිය වසර 2 තුළම “ඉලක්කය” වැඩසටහන හැර කිසිදු අළුත් ගුණාත්මක වැඩ සටහනක් ‍දැක ගැනීමට නොහැකි විය.

නේත්‍ර ටී. වී හා චැනල් අයි නාලිකා පිළිබඳ…
මෙම නාලිකා ඉහත කී ශ්‍රී ලංකා රූප‍වාහිනී ආයතනයට අනුබද්ධ නාලිකා 2ක් වන අතර රූපවාහිනී නාලිකාවේ කලින් විකාශය වූ වැඩසටහන්ද විකාශය කෙරේ. කිසිදු සිත් ගත් වැඩසටහනක් නොමැත.

ස්වාධීන රූපවාහිනී පිළිබඳව…
ස්වාධීන රූපවාහිනී නාලිකාව ශ්‍රී ලංකාවේ පැරණිතම රූපවාහිනී නාලිකාවයි. මෙම නාලිකාව මේ වන විට සීඝ්‍ර වර්ධනයක් ලබා ගැනීමට හැකිවී ඇති නමුත්, රජයට දැඩි ලෙස පක්ෂපාතී වන නිසාවෙන් ඔවුන්ගේ අති විශිෂ්ටම දේශපාලනික වැඩ සටහන වූ “තුලාව” දේශපාලනික වැඩටහන රජයේ නියෝජිතයින්ට පමණක් සීමා වීම අතිශය කණගාටුදායක කාරණයකි. ජනතා විමුක්ති පෙරමුණෙහි නියෝජිතයින්ද මෙම ‍වැඩසටහනට එකතු කරගන්නේ නම් ඒද ජනතා විමුක්ති පෙරමුණ රජයට පක්ෂපාතී වන අවස්ථාවකදී පමණකි. UNP එකේ කුමන හෝ නියොජිතයෙක් දැක ගැනීම හරිම අපහසු කාරණයකි. ඒ අනුව “තුලාව” වැඩසටහනෙහි ඇති ගුණාත්මක භාවය 100%කින් පහතට හෙලී ඇත. කෙසේ නමුත් “දොරමඬලාව” සංවාද වැඩසටහන එදත් අදත් මගේ සිත් ගත් වැඩසටහනක් වන අතර එහි ඇති ගුණාත්මක භාවය, වටිනාකම දිනෙන් දින ඉහලට යාම ඉමහත් සතුටකි. ප්‍රවෘත්ති වලින් විකාශය වන දේශීය ප්‍රවෘත්ති වලින් 75%ක්ම යුධමය හා ආරක්ෂක ප්‍රවෘත්ති වීම විශේෂයක් වේ. නව තාක්ෂණය යොදාගනිමින් ඇසට ප්‍රිය ලෙස වැඩසටහන් ඉදිරිපත් කිරීමට ඔවුන්ගේ ඇති හැකියාව ඇගයීමකට ලක් කළ යුතුය.

සිත් ගත් වැඩසටහන්…
දොරමඩලාව
මීට වසර කිහිපයකට පෙර විකාශය වූ “තුලාව” වැඩසටහන්
අටපට්ටම

සිරස නාලිකාව පිළිබඳ…
සිරස නාලිකාව යනු ලාංකීය සම්ප්‍රදායට, සංස්කෘතියට දැඩි ලෙස බලපෑම් කරන ලද බටහිර නාලිකා අනුගමනය හෝ අනුකරණය (මේ වචන 2න් ඕනෑම වචනයක් යොදාගත්තත් ගැටළුවක් නැත) කරමින් ලාංකීය ප්‍රේක්ෂකයින්ට දැඩි ලෙස බලපෑම් කරන ලද, දේශපාලනික වශයෙන් වැදගත් මාධ්‍යක් වූ නාලිකාවක් වන අතර. බොහෝ පිරිස් ඉහත කී කරුණු නිසාම එල්. ටී. ටී. ඊ සංවිධානයට මෙම නාලිකාව සම්බන්ධ බවට චෝදනා එල්ල කරයි. ලාංකීය මාධ්‍ය ක්ෂේත්‍රයේ දැවැන්ත භූමිකාවක් හොබවන මෙම නාලිකාව අනුකරණය හෝ අනුගමනය කිරීමටද සමහරක් නාලිකා පෙළඹී ඇත. ඇත්ත වශයෙන්ම මෙහි විකාශය වන වැඩසටහන් වෙනත් බටහිර නාලිකා වල වැඩසටහන්වල මොඩලයන් භාවිතා කරමින් සිය වැඩසටහන් ඉදිරිපත් කරයි. උදාහරණයක් වශයෙන් American Idol වැඩසටහන “Sirasa Super Stars” ලෙසත්, Larry King Live සංවාද වැඩසටහන “කෙලින් කතාව” ලෙසත් ශ්‍රී ලංකාවට ගැළපෙන ලෙස ඉදිරිපත් කරයි. විවිධ සමීක්ෂණ වාර්තාවන් අනුව වැඩියෙන්ම නරඹන රූපවාහිනී නාලිකාව ලෙස සිරස වාර්තාගතවී ඇත. මෙම නාලිකාව වැඩි වශයෙන් නරඹනුයේ කොළඹ දිස්ත්‍රික්කය ඇතුළු වෙනත් නාගරීකරණය වූ ප්‍රදේශ වල බව නොරහසකි. මොවුන්ගේ බහුතරයක් වැඩසටහන් Reality ආකාරයෙන් විකාශනය වීම නිසා වැඩි ප්‍රේක්ෂක ග්‍රහනයක් ලබා ගැනීමට සමත් වී ඇත. කෙසේ වෙතත් ඉන්දියාවේ නිෂ්පාදනය වන බොළඳ ලාබාල වර්ගයේ ටෙලි නාට්‍ය විකාශනය කිරීම නම් කිසිසේත්ම මා අනුමත නොකරන නමුදු කිසිදු රසඥතාවකින් තොර හින්දි මෝස්තර දැක බලාගැනීමට කැමති (විශේෂයෙන්ම කාන්තාවන්ගේ) අයගේ සිත් ඇදගැනීමට මෙම නාට්‍ය සමත්වී ඇත. මෙම නාට්‍ය වලින් දේශීය නාට්‍ය වලට එල්ල වූ තරඟකාරීත්වය නිසාවෙන් දකුණු ඉන්දීය ටෙලි නාට්‍ය ශිල්පීන් ගෙන්වා ලංකාවේ රංගන ශිල්පීන් යොදා ගනිමින් දීර්ඝ කතා පෙළක් සහිත නාට්‍ය නිපදවීමට වෙනත් නාලිකා යොමුවීම අ‍පගේ දේශීය නාට්‍ය ක්ෂේත්‍රයට විශාල බලපෑමක් එල්ල කරනු ලැබේ.මෙම නාලිකාව තුළ රජය විසින් ක්‍රියාත්මක කරනු ලබන ව්‍යාපෘති පිළිබඳව විකාශය වීම අවම ප්‍රතිශතයක් ගන්නා නමුත් රජයට විපක්ෂ අදහස් කෙරේ වැඩි යොමුවීමක් දක්නට ලැබේ. ප්‍රවෘත්ති යම් කිසි ගුණාත්මක භාවයකින් ඉදිරිපත් කරන නමුත් ඔවුන්ගේ සමබර භාවය පිළිබඳව ගැටළු පැන නැගී ඇත. බොහෝ විට අපට දැක ගත හැකි විශේෂයක් වන්නේ මෙම නාලිකාවට ආචාර්ය මර්වින් සිල්වාගෙන් එල්ලවන චෝදනා ප්‍රමාණයයි. සමහරු මෙම නාලිකාව වෙත බැඳී ඇති අතර සමහරු වෙනත් නාලිකාවල නැරඹීමට යමක් නැති නිසාවෙන් හෝ මෙම නාලිකාවට බැන බැනම මෙම නාළිකාවන නැරඹීම තවත් විශේෂත්වයක් වේ. එමෙන්ම මෙම නාලිකාව දේශපාලනික වැඩසටහන් පිළිබඳව වැඩිපුර අවධානය යොමු කර නැති අතර විනෝදාස්වාදය සඳහා සිය විකාශන කාලය වැඩි වශයෙන් යොදාගනී.

සිත් ගත් වැඩසටහන්…
කෙලින් කතාව
සිරස සුපර් ස්ටාර්ස්
සූර පප්පා (සිංහල හඬ කවන ලද කාටූන්)
News 1st
විවාද
ආර්ට් එක

T. N. L. (ටෙලිෂාන් නෙට්වර්ක් ලංකා) නාලිකාව පිළිබඳව…
මෙම නාලිකාව ශ්‍රී ලංකාවේ ක්‍රියාත්මක නාලිකා අතුරින් සිය වැඩසටහන් සිය ග්‍රාහකයන්වෙත ගෙනයාම සඳහා ‍තාක්ෂණය අවම වශයෙන් යොදා ගන්නා නාලිකාවක් වේ. දේශපාලනික වැඩසටහන් සමබර ලෙස ඉදිරිපත් කිරීම පිළිබඳව නම් මෙම නාලිකාවට විශේෂ ගෞරවයක් හිමි විය යුත්තේය. ‍‍”ජන හඬ” දේශපාලනික වැඩසටහන ඉතා උසස් ගණයේ දේශපාලනික වැඩසටහනක් ලෙස නම් කළ හැක.

සිත් ගත් වැඩසටහන්…
ජන හඬ

ස්වර්ණවාහිනී නාලිකාව පිළිබඳ…
ආදරණිය ස්වර්ණවාහිනිය ලෙස තමන්වම හඳුන්වාගන්නා මෙම නාලිකාව දේශපාලනික වශයෙන් සමතුලිත භාවයක් පෙන්වන, රසවින්දනාත්තමක වැඩසටහන් වල ගුණාත්මක භාවයක් පෙන්වන හා විටෙක අසාර්ථක වූ රසවින්දනාත්මක වැඩමටහන් ප්‍රචාරණය කරන ලද, කිරීමට ඉඩ තිබෙන නාලිකාවක් වේ. ඔවුන්ගේ සාර්ථක හා අසාර්ථක වූ වැඩසටහන් දෙස විමර්ශනාත්මක ඇසකින් ලබන විට පෙනෙන්නේ මෙම නාලිකාව විවිධ පරීක්ෂණ සමීක්ෂණ හරහා සිය ප්‍රේක්ෂක ප්‍රමාණය අඩු හා වැඩි කර ගන්නා බවයි. තරඟයට නිර්මාණය කරන ලද “ශක ලක බේබී”,”ගෞතමී”හා “ෆ්‍රෙන්ඩ්ස්” යන ටෙලි නාට්‍ය අසාර්ථක ගණයට වැටුනු නමුත් “නිලංජනා” ටෙලි නාට්‍යය හරහා යම් කිසි සාර්ථකත්වයක් ලැබීමට සමත් විය. නව තාක්ෂණය උපරිම ලෙස යොදාගනිමින් ආකර්ෂණීය ග්‍රැෆික් නිර්මාණය කිරීම හා කාල සටහනකට තමන්ගේ වැඩසටහන් විකාශනය කිරීම නිසා මෙම නාලිකාවට ජනතා ප්‍රසාදය වැඩි වශයෙන් හිමිවී ඇත. “රතු ඉර” දේශපාලනික වැඩසටහන ඉතාමත් සමබර දේශපාලනික වැඩසටහනක් වන එය වැඩසටනට උපරිම ජන ප්‍රසාදය හිමිවී ඇත.කෙසේ වෙතත් මෙම නාලිකාව විසින් විකාශනය කරනු ලැබූ බහුතරයක් දේශීය ටෙලි නාට්‍ය වලට ජනතා ප්‍රසාදය හිමිවී ඇත.

සිත් ගත් වැඩසටහන්…
රතු ඉර
ඇන්ඩ් කොම්පැණි
නාන කාමරේ
ෆැමිලි ඩොක්ටර්
Live @ 8
පරණ හපන් පැදුර
හත්දින්නත් තරු
මහා සිංහලේ වංශ කථාව

මැක්ස් ටී. වී පිළිබඳව…
මෙ ලියන අවස්ථාව වන විට ශ්‍රී ලංකාවේ නවතම නාලිකාව වනුයේ මැක්ස් ටී. වී නාලිකාව වේ. වැඩි විස්තර මෙම නාලිකාවට පිළිබඳව පැවසීමට නැතත් සුභ අනාගතයක් ඇති නාලිකාවක් ලෙසට පැවසීමට කිසිදු පැකිලීමක් නම් මගේ නොමැත. එයට හේතුව ඔවුන්ගේ වැඩසටහන් අතුරින් දේශපාලනික වශයෙන් වැදගත් වන “හතරවෙනි තට්ටුව” වැඩසටහන හා රසාස්වාදය, වින්දනය පිළිබඳ සැලකීමේදී ” Cinemato” වැඩසටහන පිළිබඳව ප්‍රසාදයක් මසිත තුළ ඇති අතර, විචාරක් කිරීමට තරම් ඔවුන්ගේ නාලිකාව පරිණත නොවන බැවින් විචාරයෙන් වැලකී සිටිමි. කෙසේ වෙතත් යම් කිසි අළුත් දෙයක් කළ හැකි නවකයින් පිරිසක් හා චමුදිත සමරවික්‍රමගෙන් සන්නද්ධ ව මේ නව නාලිකාව පිළිබඳව මැදහත් සිතින් බලා සිටීම මේ අවස්ථාවේ කිරීමට ඇති එකම දෙය වේ.

සිත් ගත් වැඩසටහන්…
හතර වෙනි තට්ටුව
Cinemato

දෙරණ නාලිකාව පිළිබඳ…
වෙනත් නාලිකාව වල විකාශය වූ වැඩසටහන් ඔවුගේම නවමු ආකාරයකින් ඉදිරිපත් කරන මෙම නාලිකාව මේ වන විට ප්‍රේක්ෂකයින් ඉතාමත් සීඝ්‍රයෙන් ග්‍රහණය කර ගැනීමට සමත් වී ඇත. ඔවු‍න්ගේම අනන්‍යතාවයකින් යුතුව විකාශය වන වැඩසටහන් ලෙස සැලකිය හැක්කේ “සිකුරු සෙනසුරු” ජෝතිෂමය වැඩසටහන, තවත් ජෝතිශමය වැඩසටහනක් වන “පාර කියන තාරුකා” වැඩසටහන හා “Colombo Fashion Show” යන වැඩසටහන් වන අතර, “වාද පිටිය”, “Star in minute” වැනි වැඩසටහන් මෙන්ම “360” සංවාද වැඩසටහන වෙත දැඩි ප්‍රේක්ෂක අවධානයක් යොමුවී ඇත. එමෙන්ම “අද දෙරණ” නමින් ගෙන එන ඔවුන්ගේ ප්‍රවෘත්ති විකාශයට තාක්ෂණය මුසු කරමින් සිය ග්‍රාහකයින්ට ළඟා වීමට ඔවුන්ට හැකිවී ති‍බීම විශේෂයක් වේ. සාපේක්ෂව අළුත් නාලිකාවක් වුවත් ඔවුන්ගේ විකාශයන් සිදුවූ කාලය තුළ ඉතාමත් ඉහල මට්ටමකට පැමිණීම විශේෂත්වයකි.

සිත් ගත් වැඩසටහන්…
අද දෙරණ
Bid 2 Win
වාද පිටිය
360
වාණිජ විත්ති
හනු මෑන්
වැ‍ටෙන් එහා ටෙලි නාට්‍යය

අනෙකුත් නාලිකා 4 පිළිබඳව පැවසීමට යමක් නොමැති බැවින් ඒ පිළිබඳව ලිවීමට කාලය යොමු නොකොට මෙම නාලිකා වලට මවිසින් ලබා දෙන ළකුණු පහත පරිදි වේ.

දෙරණ – 85%
සිරස – 83%
ස්වාධීන රූපවාහිනී – 79%
ස්වර්ණවාහිනී – 79%
චැනල් වන් MTV – 75%
ජාතික රූපවාහිනී – 73%
ශක්ති TV – 70%
MAX TV – 69%
T. N. L – 68%
Channel Eye සහ Nethra TV – 60%
ETV – 58%
ART TV – 55%
TV ලංකා – 55%

සුපුන් සුදාරක – http://blog.sudaraka.com

සැබෑ සිංහලයන් යනු කවුරුන්ද? (සංවාදයට අනිවාර්යයෙන්ම විවෘතයි)

මා සතුව ඇති ඉතිහාසය පිළිබඳව දැනීම මඳ වූවත් මෑතකදී මවිසින් පරිශීලනය කරන ලද පොත් පත් හරහා මට පෙනී ගියේ දැනට අප විසින් සාමාන්‍යයෙන් විශ්වාස කරනු ලබන මතය වන සිංහලයන් යනු විජය රජුගෙන් පැවත එන්නන් යන විශ්වාසය බිඳ හෙලිය හැකි බව යන්නයි. මාගේ හා තවත් ඉතිහාසඥයින් කිහිප දෙනෙකුගේ මතයන් වනුයේ සිංහලයින් යනු ඊටත් වඩා පුරාණ ඉතිහාසයක් සහිත වූ ජාතියක් යන්නය. කෙටියෙන්ම පැවසුවහොත් ශ්‍රී ලංකාව යනු ලෝකයේ කේන්ද්‍රස්ථානය වන්නේය.

මුලින්ම සිංහලයන් යනු කවුරුන්දැයි විමසා බලනු කැමැත්තෙමි. සිංහලයන් යනු සිව් හෙළයින් වේ. එම සිව් හෙළයින් මෙසේ දැක්වීම හැකියාව ඇත

  1. යක්ෂ ගෝත්‍රිකයින්
  2. නාග ගෝත්‍රිකයින්‍
  3. දේව ගෝත්‍රිකයින්
  4. තවත් එක් යම්කිසි ගෝත්‍රික කණ්ඩායමක්

මේ අනුව මෙම ගෝත්‍ර හතරේ එකමුතුවෙන් සෑදුනු ඒකීය ජන කණ්ඩායම සිව් හෙළයින් හෙවත් සිංහලයින් වේ. මෙම සිංහලයින් සතුව ඉතාමත් ප්‍රෞඩ ඉතිහාසයක් ඇති අතර එම ඉතිහාසය අවම වශයෙන් වසර 10,000කටවත් ඈත අතීතයකට හිමිකම් කියයි. මෙම ඉතිහාසය පිළිබඳ දැනට ඇති මූලාශ්‍ර ඉතාමත් අවම වන නමුත් මෙම මතය ඉදිරිපත් කිරීමට පෙන්විය හැකි ප්‍රධානතම සාධකය වනුනේ රාමායනය නම් වන වීර කාව්‍යයයි. එමෙන්ම මෙම ඉතිහාසය පිළිබඳ සනාථ කළ හැකි ප්‍රාග් ඓතිහාසික සාධකද මේ වන විට හමුවී ඇති අතර, හමුවෙමින්ද පවතින බව මා හට ජනමාධ්‍ය හරහා විටින් විට දැක ගැනීමට හැකියාව ලැබිණ.

එමෙන්ම මෑතකදී සොයාගන්නා ලද ප්‍රාග් ඓතිහාසික සොහොනක්ද (මට එය පිහිටා ඇති ස්ථානය නම් නම් මතකයේ නෑ. කොහොම හරි ලංකාවේ තමයි පිහිටලා තියෙන්නේ) අපගේ සාධක වන සත්‍ය භාවය වඩාත් තීව්‍ර කරයි. එය දැනට අප විසින් පිළිගනු  ලබන ප්‍රථම රජු වන විජය රජු පැමිණිමට පෙර කාලයකට අයත් වන්නක් වේ. ප්‍රාග් ඓතිහාසික සොහොනක් තුලින් පෙන්නු‍ම් කෙරනුයේ එකල සමාජය තුළ තිබූ ක්‍රමවත් භාවය වන අතර එයින්ම පෙන්නුම් කරනුයේ එම සමාජය තුළ තිබූ ක්‍රමවත් භාවය බැවින්, අප හ‍ට පිළිගැනීමට හැකිවන්නේ විජය රජු පැමිණීමට පෙරද අප සතුව අතිශයින් ක්‍රමවත් සමාජ පද්ධතියක් තිබූ බවයි.

තවත් ලිපි ඉදිරියේදී බලාපොරොත්තු වන්න. යම් කිසි අදහසක් ලබා ගැනීම සඳහා 2008-01-27 දින පළවූ ජයරත්න පතිර ආරචිචි මහතාගේ රාවණ රජ සමයේ පුරා විද්‍යාත්මක සාක්ෂි (http://www.rivira.lk/2008/01/27/rividahara1.htm) ලිපිය කියවන්න. සැබෑ සිංහලයින් කවුරුන්දැයි අපි අන්තර්ජාලය හරහා සොයා බලමු.

සුපුන්  සුදාරක – http://blog.sudaraka.com

ඕම් ශාන්ති ඕම්

ඔව්, හින්දි චිත්‍රපටි රසිකයින්ට නම් මේක හොඳ ආරංචියක්. හින්දි චිත්‍රපටි බැලුවේ නැති වුනත් කමක් නෑ මම නම් ඔබට 100%ක්ම නිර්දේශ කරන චිත්‍රපටියක් තමයි ඕම් ශාන්තී ඕම්. හින්දු ආගමේ විශ්වාසයක් වන පුනුරුප්පත්තිය පදනම් කරගනිමින් මෙම චිත්‍රපටිය අති ආකර්ශනයකින් යුක්තව නිර්මාණය කිරීමට මෙම චිත්‍රපටියේ අධ්‍යක්ෂක වරිය මෙන්ම තිර රචකාවිය වන ෆාරා ඛාන් සමත් වී තිබීම වි‍ශේෂත්වයක්. එමෙන්ම මෙම චිත්‍රපටියට තමන්ගේ උපරිම රංග කුසලතාවය දායක කරමින් ඒ ඒ රූපරාමු වලට උචිත වන අන්දමින් අතිවිශිෂ්ට ද්විත්ව චරිත නිරූපනයක නියැලීමට මෙහි ප්‍රධාන චරිත හොබවන ෂාරුක් ඛාන් සමත් වී තිබෙනවා. සංගීතයක් ඉතා උසස් අන්දමින් චිත්‍රපටියට යොදා ඇති නමුත් චිත්‍රපටියේ අඩංගු ගීත නම් මට එච්චර හරි ගියේ නෑ. නමුත් චිත්‍රපටියේ සමහරක් ගීත නම් ඉතාමත් උසස් ඒ මොනවාදැයි ඔබම චිත්‍රපටිය නරඹා තීරණය කරනවා නම් වඩාත් හොඳයි. චිත්‍රපටියේ කතාව නම් මම ඔබට කියන්නේ නෑ මොකද මම කලින්ම කිව්වා වගේ ඔබම මෙම චිත්‍රපටිය නැරඹිය යුතුයි. මෙම චිත්‍රපටියේ ඇති සුවිශේෂම අවස්ථාව නම් මෙහි එන එක් සංගීතමය ජවනිකාවකට බොලිවුඩ් පුරයේ තරු රුසක්ම ආරාධිත රංගනයෙන් දායක වෙනවා. ඒ අතර සල්මාන් ඛාන්, සායිඩ් ඛාන්, සයිෆ් අලි ඛාන්, ප්‍රීති සින්ටා, රාණි මුඛර්ජි, විද්‍යා බාලන්, ප්‍රියංකා චොප්රා, උර්මිලා, ජුහී චව්ලා, කාජල් දේව්ගන් සමඟ තවත් බොහෝ දෙනෙක් සිටිනවා.ආහ්, තව පොඩ්ඩෙන් අමතක වෙනවා මේ චිත්‍රපටියෙන් බොලිවුඩ් රංගනයට පිවිසෙන අළුත්ම නිළිය දීපිකා පාදුකෝන් ඉතා දක්ෂ අයුරින් තමන්ගේ කාර්යයේ නියැළෙන බව දැකීම ඉතාමත් සතුටක්. ඒත් දුක තමයි ලංකාවේ ආධුනික නිළියන් කාටවත් ඒ තරම් දක්ෂ ලෙස රංග‍නයේ නියැළීමට අපහසු වීම. (අනේ කවුරුවත් තරහා වෙන්නනම් එපා) කෙසේ වෙතත් ඇයද ඉතාමත් ආකර්ෂණීය ලෙස මෙම චිත්‍රපටියට තම දායකත්වය සපයනවා.

එමෙන්ම ඕම් ශ‍ාන්තී ඕම් චිත්‍රපටිය ප්‍රදර්ශනයට පැමිණ එක් සතියකින්ම ඉන්දියාවේ බොක්ස් ඔෆීස් වාර්තා කඩා බිඳ හෙලීමද විශේෂත්වයක්.
චිත්‍රපටිය ප්‍රදර්ශනයට පැමිණ පළමු සතිය තුළ ලැබූ ආදායම් වාර්තාව පහත දැක්වෙනවා
ඇමෙරිකාව – US$ 2,892,773
එක්සත් රාජධානිය – GB£ 518,845
ඕස්ට්‍රේලියාව – AU$188,784
(විකීපීඩියා ඇසුරෙනි)

එමෙන්ම මෙම චිත්‍රපටියට ලැබෙන විචාර ප්‍රතිචාරද ඉතාමත් ඉහළයි. එයට හේතු ලෙස ඔවුන් දක්වන්නේ මෙම චිත්‍රපටිය නැරඹීමට අසුන්ගත් විට නැවත නැගිටීමට සිදුවන්නේ චිත්‍රපටියේ අවසානයේ වන බවත්, මෙම චිත්‍රපටිය තුළ හාස්‍ය, ආදරය, භීතිය, ක්‍රියාදාම හා අද්භූත යන භාවයන් එකකට එකක් පරයන සේ අඩංගු වීමයි.

වැඩි විස්තර සඳහා…
විකීපිඩියා – http://en.wikipedia.org/wiki/Om_Shanti_Om
වෙබ් අඩවිය – http://www.omshantiomfilm.com
IMDB – http://www.imdb.com/title/tt1024943/


මෙම චිත්‍රපටිය ඔබත් නරඹන්න. එවිට ඔබට සමහරක් ආදර කතාවලට එක් ජීවිත කාලයක් මදි වන බව අනිවාර්යයෙන්ම හැ‍ඟෙනු ඇත