සිංහල යුනිකේතයේ දියුණුවත් සමඟම සිංහල භාෂාවෙන් නිර්මාණය වන වෙබ් අඩවි සහ බ්ලොග් අඩවි සඳහා විශාල අවධානයක් යොමුවෙන් පවතින කාල සීමාවකි මේ. මේ පිළිබඳව ඔබ දැනටමත් හොඳින් දන්නවා ඇති. මේ කියන්නට යන්නේ “සස්රුත” වෙබ් අඩවිය පිළිබඳවයි. සිංහල යුනිකේතය භාවිතයෙන් අන්තර්ජාලයේ නිර්මාණය වී ඇති වෙබ් අඩවි සෙවීමේදී අන්තර්ජාලයට නවකයින් මුහුනදෙන ගැටළුවක් තමයි සිංහල භාෂාවෙන් යතුරුලියනය කිරීම. මෙහිදී එම බාධකයට ඉතාමත් සාර්ථක පිළිතුරක් ලබාදී ති‍බීම සතුටට කාරණයක්. සිංහල යුනිකේතය යතුරුලියනය කිරීමට “කිසිවක්” (මෙහිදී කිසිවක් යන්නෙන් අදහස් කරේ කෙටි ක්‍රමද ඇතුලුවයි) නොදන්නා ඕනෑම පුද්ගලයෙකුට සස්රුත වෙබ් අඩවිය ලබා‍දීමෙන් කිසිදු අමතර සෙවීමකින් තොරව එම වෙබ් අඩවිය තුලම හිඳිමින් තමන්ට සෙවීමට අවශ්‍ය කරන සෙවුම් වදන් ඉතාමත් පහසුවෙන් ඇතුලත් කළ හැකියි. මෙහි නිර්මාණය කර ඇති On-Screen යතුරු පුවරුව ඉතාමත් දැකුම්කලු, නිර්මාණශීලි එකක් වීම වි‍ෙශ්ෂයි.
On Screen Keyboard
සිංහල යුනිකේතය ප්‍රවර්ධන කිරීම සඳහා මෙවැනි වෙබ් අඩවියක ප්‍රයෝජනය වචන වලින් පැවසීම අපහසු කාර්යයක්. දැන්, වාණිජමය මෙහෙයුම් පද්ධති වන Windows Vista, Windows7 වැනි මෙහෙයුම් පද්ධති සමඟ කිසිදු අමතර මෘදුකාංග පිහිටුවාගැනීමෙන් තොරවම සිංහල යුනිකේතයට භාවිතා කළ හැකි නිසාවෙන්, එම මෙහෙයුම් පද්ධතියක් භාවිතා කරන සාමාන්‍ය අන්තර්ජාල භාවිතාකරුවෙකුට සිංහල යුනිකේතයේ ප්‍රයෝජනවත් බව පෙන්නුම් කිරීමට මෙම වෙබ් අඩවියට පිවිසෙන්න යැයි දැනුවත් කිරීම ප්‍රමාණවත් බවයි මගේ හැඟීම. නිර්මිත දැකුම්කළු නිමාවත්, සරල බවත් නිසාවෙන් එය වෙබ් අඩවි පරිශීලකයා ඉතාමත් ඉක්මනින් ග්‍රහණය කරගන්නවාට කිසිදු සැකයක් නැහැ. මේවන විට සස්රුත වෙබ් අඩවිය පවසන අයුරින් ඔවුන්, බිලියන දොළහකට ආසන්න වෙබ් පිටු සංඛ්‍යාවක තොරතුරු සස්රුත සෙවුම් යන්ත්‍රයට අන්තර්ගත කොට තිබෙනවා.
මෙහි නිර්මාණකරුවා විදේශයක සිටිමින් වුවත් සිංහල භාෂාව පිළිබඳව තම අවධානය යොමු කරමින් මෙවැනි සද්කාර්යයකට දායක වීම අප අගය කර යුතුයැයි හැඟුනෙන් මෙසේ මෙම බ්ලොග් සටහන ලියැවුනා.
එසේනම්…
ඔබත් පිවිසෙන්න “සස්රුත” සෙවුම් යන්ත්‍රයට
ඔබේ මිතුරන් මෙම වෙබ් අඩවිය පිළිබඳව දැනුවත් කරන්න.
—
මේ පිළිබඳව ලියැවුනු වෙනත් බ්ලොග් ලිපි.
සස්රූත ~ සිංහල සර්ච් එන්ජිම
සංගීත වීඩියෝවක් හරහා ජනප්‍රියත්වයට පත්වුන එක්තරා නිරූපණ ශිල්පිනියකගේ පෞද්ගලික ඡායාරූප විශාල ප්‍රමාණයක් අන්තර්ජාලයට නිකුත් වෙලා කියල ලොකු සංවාදයක් මීට දින කිහිපයකට කලින් අන්තර්ජාලයේ ඇතිවුනා. ඇය සතුව ඇත්තේ නරක චරිතයක් ආකාරයෙන් ඇයගේ චරිතය පිළිබඳව නොයෙකුත් දෙනා ඒ ගැන කතාබහ අරගෙන ගිහිල්ල තිබුන බවයි පෙනුනේ. පසුව මේ ඡායාරූප නිකුත් වීම පිළිබඳව තොරතුරු සෙවීමෙන් දැනගැනීමට ලැබුණ කාරණයක් වුනේ, මේ ඡායාරූප නිකුත් වෙලා තියෙන්නෙ ෆේස්බුක් වෙබ් අඩවිය හරහා බව. ෆේස්බුක් වෙබ් අඩවියේ ඇයගේ ෆේස්බුක් ප්‍රොෆයිල් එක සමඟ සම්බන්ධ ඡායාරූප ඇයගේ ෆේස්බුක් මිතුරන්ගේ ලැයිස්තුවේ කෙනෙක් අතට හෝ, මිතුරු ලැයිස්තුවෙන් බැහැර පුද්ගලයෙකුගේ අතට පත්වීම නිසා දැන් වැඩේ තරමක් දුර දිග ගිහින්!