උසස් පෙළ කරන්නේ මෙහෙමයි #දීර්ඝසටහනක්

පළවෙනි කාරණේ, ජීවිතය විඳින ගමන් උසස් පෙළ කරන්න බෑ. උසස් පෙළ කරන කාලෙ ජීවිතයක් නෑ. තිබිය යුත්තේ උසස් පෙළ විතරයි.

එහෙම තමයි හැම ගුරුවරයෙක්ම උසස් පෙළ උගන්වන්න පටන්ගන්නේ. හැම දෙනාම උසස් පෙළ පන්ති පටන් අරගෙන අඩුම වශයෙන් මාස තුනක් බොහොම උනන්දුවෙන් වැඩ කරනවා. ඒත් බහුතරයක් වැඩේ අතඇරලා දානවා. සමහර අය හිතාගෙන ඉන්නවා තමන් උසස් පෙළ වැඩ කරමින් ඉන්නවා ය, විභාග ලියන්න පුලුවන් වේවි කියලා. එහෙම බෑ. එහෙම බෑ කියල තේරෙන්නෙ විභාගෙ ලියද්දි. විභාගෙ ලියද්දි හැමෝටම තේරෙන කාරණයක් තියෙනවා…

ඒ තමයි, ප්‍රශ්න ලේසියි… ඉගෙනගත්තානම් හොඳට ලියන්න තිබුනා කියන එක.

ඇත්තටම, ඔය උසස් පෙළ අමාරුයි කියන එක ගොඩක් අය නිදහසට කියන කාරණයක්. ඒකට හේතුව විභාගය නෙවෙයි, තමන් ඒ අවුරුදු කිහිපය ගත කරන විදිහ. සාපේක්ෂව අවුරුදු දෙකක් ඉගෙනගත්ත දේවල් පැය දෙකක්, තුනක්, පහක්, ඇතුළත දී ගොනු කරලා ලියන එක.

සුදාරකට මේ වගේ සටහනක් ලියන්න තියෙන සුදුසුකම් මොනවාද? සුදාරක උසස් පෙළ පළමු උත්සාහය ෆේල්. විෂයයන් තුනම. සාමාන්‍යයෙන් උසස් පෙළට විෂයයන් තුනම ෆේල් වෙනවා කියන එක ලේසි පහසු වැඩක් නෙවෙයි. පළවෙනිපාරට විභාගෙ ලියන්නේ ගණිත අංශයෙන්. විභාගෙ ලියන මේසෙ ඉස්සරහම තමයි පන්ති කාමරේ ජනේලය තිබුනේ. ඉතින් කුරුල්ලො පියාඹන හැටි, ඉස්කෝලෙ හදල තිබුන කෘතිම ඔසු උයන වගේම උදේට ඉර එලියත් එක්ක වැටෙන ලස්සන මල් වැහි දකින්න පුලුවන් වුනා. මල් වැස්ස නම් මාර ලස්සනයි. ඊට අමතරව, මං රාජකීය විද්‍යාලයට හය වසරේදී ඇතුළත් වුන 6C පන්තියත් තිබුනේ ඉස්සරහින්. තමන් පාසල් ජීවිතය අවසන් කරන තැන සහ පාසල් ජීවිතය ආරම්භ කළ තැන එකට හමුවීම නම් හරිම මායාකාර යථාර්වාදීයි!

සුදාරක උසස් පෙළ ලියන කාලයේ ගෑනු ළමයි (එක්කෙනෙක්ට පස්සෙ එක්කෙනෙක් වශයෙන්) දෙන්නෙක්ට ආදරය කරනවා! ඔය අතරෙ එක එක සංගම් වල වැඩ කරනවා. සමහර වැඩ සාර්ථක වෙනවා, සමහර වැඩ කොට උඩට වැටෙනවා. නාගන්නවා. කවි ලියනවා. බැනුම් අහනවා. ගෙදර එනකොට රෑ 12යි. රස්තියාදු ගහනවා. ආසාවට පාර්ට් ටයිම් ජොබ් කරනවා. අන්තිමේ උසස් පෙළ අතඅරිනවා. ප්‍රතිඵල නැති නිසා කොළඹ විශ්ව විද්‍යාලයේ තොරතුරු තාක්ෂණ පදනම් පාඨමාලාව කරලා, #BIT උපාධියේ පළමු වසර සම්පූර්ණ කරනවා. ඊට පස්සෙ ශ්‍රී ලංකා තොරතුරු තාක්ෂණ ආයතනයේ (#SLIIT) පූර්ණ කාලීන ශිෂ්‍යයෙක් වශයෙන් උසස් පෙළ ප්‍රතිඵල පෙන්වන පොරොන්දුව මත ඇතුළත් වෙනවා. ඒ පොරොන්දුව මත මේ වෙද්දි මම උසස් පෙළ අවසානයි (එක ප්‍රශ්න පත්‍රයක් ඉතිරි වෙලා තියෙනවා). ඒ අතර උපාධියේ පළමු වසර අවසන් අර්ධය සම්පූර්ණ කරමින් සිටිනවා.

අපි හිතමු… කන්දක් තියෙනවා කවුරුත් නගින්න ගියේ නැති. අන්තිමට කවුරුහරි මුලින් මේ කන්ද නැගලා ඉහළටම ගිහින් ඇවිත් කන්ද පහළ තියෙන පුවරුවක කන්ද නගින හැටි ලියනවා, තව කෙනෙක් ඒක අනුගමනය කරමින් කන්ද නගින අතරේ තමන් විසින්ම හොයාගන්න කෙටි මං ගැන නැවත පහළට ඇවිත් අර පුවරුවේ සමහර සටහන් මකලා සංශෝධනය කරනවා. මේකත් ඒ වගේ වැඩක්. 🙂

1. උසස් පෙළ හැර අනෙක් සියලු වැඩ

උසස් පෙළ කාලේ ආලේ ගැන පසුව කතා කරමු. මේ කතාරන්නේ පාසලේ සංගම් වැඩ ගැන. ඔබ උසස් පෙළ විද්‍යා අංශයෙන් පෙනී සිටිනවානම් හොඳම දේ තමයි සංගම් වැඩ අත්හරින එක. එහෙම නැතිනම් මූන පෙන්නලා ෂේප් න්‍යාය දාන එක. පාසල් සංගම් වල වැඩ කරන එකෙන් මොනවද වෙන සෙතේ?

• මිනිස්සු එක්ක වැඩ කරන හැටි / මිනිස්සු ගැන ඉගෙනගන්න පුලුවන්
• වැඩ වලින් ලැබෙන ආත්ම තෘප්තිය
• ඒ ඒ අදාළ ව්‍යාපෘති සඳහා ඇසුරු කරන්න ලැබෙන පාඨ ග්‍රන්ථ / සංදේශ / රූපණ / පුද්ගලයින් / ආයතන තුළින් ලැබෙන අත්දැකීම් හරහා උසස් පෙළට නොවැදගත් නමුත්, නොවිධිමත් අධ්‍යාපනයක් ලබාගන්න පුලුවන්.

ඒත්, කණගාටුවට කාරණය ඒ දේවල් වලට වඩා උසස් පෙළ විභාගය වැදගත්. හැබැයි ඔබ කලා විෂයන් හදාරන ශිෂ්‍යයෙක්නම්, ඔබ වැඩිපුර පාසල් සංගම් සමඟ හෝ ආයතන සමඟ සම්බන්ද වෙලා සිටින කාලය තුළ එකතු කරගන්නා අත්දැකීම් උසස් පෙළ විභාගයට බොහොම වැදගත්.

ඉතින් තරමක් ආත්මාර්ථකාමී වීම, බැහැ කීම මේ කාලයේ නරක දෙයක් නෙවෙයි.

2. උසස් පෙළ පන්ති සහ පාසල

ප්‍රසිද්ධ පන්ති තෝරාගැනීම හැකි තරම් අඩුකරන්න. මොකද ඇත්තටම සමහර පන්ති නිවාඩු කාල වලදී උදේ අටේ ඉඳලා හවස හයාමාරවත් වෙනකන් තියෙනවා. ඉතින් ළමයි හැම දෙනාම එක වගේ නැති නිසා ගුරුවරයා බොහොම දරදඬු උපක්‍රම වලින් ශිෂ්‍යයාව පාලනය කරලා තියාගන්න එයාගේ පෞරුෂය පාවිච්චි කරනවා. ඈනුම් අරින්න බැහැ, ළඟ කෙනා එක්ක කතා කරන්න එපා, නිදාගන්න එපා වගේ දේවල් වලින්. නිදාගෙන අහුවුනොත් ඉස්සරහට ගෙනැවිත් දෙනෝදාහක් ඉදිරියේ “බයිට්” කරන නිසා, ළමයි මේ දේවල් කරන්නත් බයයි. මේකෙන් ඇත්තටම තමන්ගේ සිතීමේ නිදහස සීමා වෙනවා. විවිධ වර්ගයේ ගැටලු වලට එකම ක්‍රමය ආදේශ කරන්න පුරුදු වෙනවා. මේකෙන් ඇතිවන ආතතිය නිසා ගෙදර ගිහින් වැඩ කරන්න පෙළඹෙන්නෙත් නැහැ. ඒ වගේම වඩාත්ම භයානක දේ, තමන් පැය සෑහෙන්න ප්‍රමාණයක් පන්තියේ හිටියා කියල හිතන නිසා ඒකෙන් තමුන් සෑහෙන්න දේවල් ඉගෙනගත්තා, ඒක ඇති කියල හිතන එක. මනසට සහනයක් දෙන්න අර ඉගෙනගත්ත කාලයට වඩා සෑහෙන්න කාලයක් වැය කරන්න ඒකෙන් පුරුදු වෙනව.

ඒක නිසා ගෙදරට ළඟ, අඩු ප්‍රමාණයක් ඉන්න, තරමක් ප්‍රසිද්ධ නැති පන්ති තෝරාගන්න. මේ වගේ පන්තියකදී තමන්ට කම්මැලි වුනාම අඩුම තරමේ මුහුන හෝදාගෙන එන්නවත් පුලුවන්. ගුරුවරයා ඔබ කොතරම් අදක්ෂ වුනත් ඔබට හිතවත් යැයි හැ‍ඟෙනවා. ඒක සෑහෙන්න හිතට නිදහසක්.

පාසල් වේලාව මඟ අරින්න එපා. මේ කාලය ආයෙ එන්නෙ නෑ. ඔබේ උසස් පෙළ කාලයේ යාලුවන් ඔබේ ජීවිත කාලයටම මතක හිටීවි. පන්තියේදිත් ඉන් එළියෙත් ඇති තරම් විනෝද වෙන්න, වලි වලට යන්න “හිතෙනවානම්” යන්න! පාසලේ විශ්වාස කරන්න පුලුවන් ගුරුවරුන්ගෙන් පුලුවන් තරම් ඉගෙනගන්න.

3. මානසික පීඩන තත්ව – ගෙදරට කියන්න බැරි ප්‍රශ්න

ගැහැනු ළමයින්ටනම් ඇත්තටම මේ වයස වෙද්දි සම වයසේ පිරිමි ළමයින්ගෙන් සෑහෙන්න බලපෑම් එනවා. ඒක ඇත්තටම සෑහෙන්න ලොකු සමාජ අර්බුදයක් බවට පත් වෙලා ඉවරයි. අපිට මේ මොහොතේ සමාජය එකපාරටම හදන්න අපහසු නිසා, අපි හොඳ මානසික තත්වයක් සහ පෞරුෂයක් ගොඩ නගාගන්න වෙනවා. සමහරවිට තමන් කැමතියි කියපු ගෑනු ළමයා බෑ කියන්න පුලුවන්, එහෙම නැතිනම් තමන්ට ආදරෙයි කියපු ගෑනු ළමයා තමන්ගෙන් වෙන් වෙලා ටික දවසකින් වෙන කෙනෙක් අතින් අල්ලගෙන පුස්තකාලයට යනවා ඇහැටම දකින්න ලැබෙන්න පුලුවන්! මේ වගේ ගැටලු නිසා ගොඩක් දෙනෙක් මාස ගණන්, අවුරුදු ගණන් කාලය නාස්ති කරනවා.

පළවෙනි කාරණය: ඔබ තනිවෙලා නෑ! මේ සිදුවීම් වලට මුහුනදෙන පළමු හෝ අවසාන කෙනා ඔබ නෙවෙයි. ඒ සමහරවිට තමන් soul mate කියලා හිතන කෙනා වෙන්න පුලුවන්. ඒත්, උසස් පෙළ විභාගය අත්හරින්න එපා. ඔබට අපහසුනම්, ඔව්… උසස් පෙළ අත්හරින්න. තමන් නැවත යථා තත්වයට එනකන් උසස් පෙළ අත්හරින්න . මෙතැනදී තමයි, මම මුලින් කී යාලුවෝ උදව්වට උන්නේ.

“මිතුරු තොමෝ දුක සැප දෙකෙහිම පැවතී බිතු සිවම් රූ මෙනි පිටු නොපාවිතී” කියන්නේ කට කහනවට නොවෙයි. මේ වගේ දේවල් වලට මුහුන දෙන්න නම් හොඳ පෞරුෂයක් හදාගන්න ඕනේ. මෙහෙම දෙයක් වුනාම හිත හදාගන්න අපහසු නිසා, ඒ වගේ දෙයක් වෙන්න කලින් වලක්වාගන්න උත්සාහ කරමු. ඒ ගැන තමයි අපි ඊළඟට කතා කරන්නේ….

4. උසස් පෙළ ආදර කතා

උසස් පෙළ කාලයේ අලුත් ආදරයක පැටලෙන්න හිතන්න එපා. කාලය ගන්න. හොඳ මිතුරන් වෙන්න. ඒත්, ආදරය කරන්න නම් එපා! ඒත්, ඔබ දැනටමත් ආදර සම්බන්ධතාවක ඉන්නවානම්, උසස් පෙළ නිසාම ඒකෙන් අයින් වෙන එකත් නුවණට හුරු දෙයක් නොවේ.

ආදර සම්බන්ධතාවක් නැතිනම් ඔබ නිදහස්. මීට කලින් ආදර සම්බන්ධතාවක ඉඳලත් නැතිනම්, ආදර සම්බන්ධතාවක් නොමැති වීම පිළිබඳ එතරම් අමුත්තක් දැනෙන්නෙත් නෑ. ඒක නිසා ඒ තත්වය දිගටම තියාගන්න.

ආදරය සම්බන්ධයක් කලින් තිබිලා මේ වෙනකොට නැතිනම් ඔබ කිසියම් පීඩනයක ඉන්නවා වගේ දැනෙන්න පුලුවන්. හොඳම දේ මිතුරන් සමඟ හැකිතරම් වේලා ගත කිරීම, ඉගෙනීමට අවධානය යොමු කිරීම. හිත ගිය කෙනෙක් ඉන්නවානම් ආදර සම්බන්ධයක් දක්වා දුර යෑම නම් නුවණට හුරු දෙයක් නොවෙයි. ඇය/ඔහු සමඟ මිතුරුකම මිසක් (Friendzone!) ඊට වඩා දුර යන්න එපා. ඒත්… හැඟීම් කියන දේ සමහර වෙලාවට ඉස්සරහට එනවා… ඒක හරි සංකීර්ණ තත්වයක්. එහෙනම් හැඟීම් පාලනයත් අවශ්‍යයි කියලා තේරුම්ගන්න පුලුවන් නේද?

ඔබ ආදර සම්බන්ධතාවක ඉන්නවානම්, උසස් පෙළ ඔබගේ ආදර සම්බන්ධතාවට බාධාවක් යැයි සිතන්න එපා. මම නැවත කියනවා, “සිතන්න එපා!” එහෙම හිතුවාම ඔබට නැති ප්‍රශ්න පේන්න ගන්නවා, අන්තිමට… ආදර සම්බන්ධතාව වදයක්ම වෙනවා. මේ තත්වය ඔබට විතරක් නෙවෙයි සහකරු/සහකාරියටත් සෑහෙන්න ගැටලු ඇතිකරවනවා. අනවශ්‍ය ගැටුම් නිසා අනවශ්‍ය හිත් රිදවීම් ඇතිවෙනවා. සමහර වෙලාවට තමන්ටම හෝ අනෙකාට රිදවන්න උත්සාහ ගන්නවා. ඉතින් අන්තිමේ උසස් පෙළත් නැහැ. ආදරයත් නැහැ. උසස් පෙළත් එක්කම ආදරය ගෙනයමින් සාර්ථක වූ බොහොම සුලු ප්‍රමාණයයි ඉන්නේ. සියයට දශම පහක් වගේ. 0.5% ඉතින් ඒ අතළොස්ස අතරට යන සොඳුරු යුවල ඔබද, නැතිනම් සියල්ලම නැතිකරගත් පුද්ගලයා ඔබද පිළිබඳ තීරණය කිරීම ඔබේ අතේ.

ප්‍රධාන කරුණු කතා කරලා ඉවරයි.

ඉගෙනගන්න තමන්ගෙම ක්‍රම පාවිච්චි කරන්න. දැනටමත් ඔබ සාමාන්‍ය පෙළ වෙනකන් ඉගෙනගෙන අවසන් නිසා ඔබට ඔබගේ ඉගෙනුම් හැකියාවන් ගැන තේරෙනවා ඇති. හැබැයි සාමාන්‍ය පෙළ වගේ කලින්දා රෑ පාඩම් කරලා හොඳ ප්‍රතිඵල උසස් පෙළදී බලාපොරොත්තු වෙන බෑ. මේ විභාග දෙක සහමුලින්ම වෙනස්. මමම උදාහරණයක් අරගෙන පෙන්වන්නද? මට සාමාන්‍ය පෙළට A8යි B 1යි. ඒත් පළමු උසස් පෙළ පෙනී සිටීම සියලු විෂයයන් අසමත්!

ඔබ මත්පැන් පානය කරනවාද? මට ඒ ගැන පැහැදිලි උපදෙසක් දෙන්න බැරි, මම උසස් පෙළ ලියන වයසේදී මත්පැන් සමඟ කිසිදු ආකාරයක සම්බන්ධයක් නොතිබුන නිසා. නමුත් මම හිතනවා මත්පැන් පානය සහ සිගරට් පානය කරනා අය ඒ සඳහා දරුණු ඇබ්බැහියකින් තොර ස්වයං පාලනයක් තියෙනවානම් එතරම් ගැටලුවක් නැහැ. මේ කියන ස්වයං පාලනය ඔබට තියෙනවා කියල ඔබ හිතාගත්තාට, ඇත්තටම වෙන කෙනෙක්ට ඒක ඇබ්බැහියක් වගේ පේනවානම්, වහාව වෛද්‍ය උපදෙස් ලබාගන්න. ඒ අය මේ වගේ වෙලාවකදී සෑහෙන්න උදව් කරනවා. ඒත් කොහොමටවත් ජෙල් පැකට් විකන්න, සිරප් බොන්න, ටැබ්ලට් ගහන්න වගේ ආතල් ගන්නනම් තියාගන්න එපා.

මම මෙතැන ඉන්නේ මගේ දෙමව්පියන් නිසා. ඔවුන්ට ඒ හැටි නොවුනත්, මාව #SLIIT (ස්ලිට් එක වෙනත් උසස් අධ්‍යාපන ආයතන වලට වඩා ගෙවිය යුතු මිලට සාපේක්ෂව සෑහෙන්න දේවල් ලබාගතහැකි තැනක්. මුදල් ගෙවා හෝ නෙගෙවා කිසියම්ම හෝ ඉගෙනගන්නා තැනකට යනවානම්, එතැනින් උපරිම ප්‍රයෝජන ගැනීම සම්පූර්ණ ඔබේ වගකීමක්) එකට යවන්න ඔවුන්ගෙ රජයෙ රැකියාව නිසා හැකියාව තිබුනා. නමුත් මම තවම රජයේ විශ්ව විද්‍යාලයකට යන්න නොලැබීම පිළිබඳ සිතේ යම් දුකක් තියෙනවා. මේක කිව්වෙ මගේ දෙමව්පියන්ට සල්ලි තියෙනවා ය කියන්න නොවේ. සමහර විට ඔබේ පවුලේ තවත් සහෝදර සහෝදරියන් ඉන්නවා වෙන්න පුලුවන්. එහෙම වෙලාවේදී වඩා වගකීම් සහගතව වැඩකරන්න වෙනවා. උසස් පෙළම නෙවෙයි ජීවිතය. උදාහරණයක් විදිහට ඔබට උසස් පෙළ නොමැති වුනත් දැන් සහනාදායී මිලකට BIT වැනි පිළිගත් උපාධි හැදෑරීමට අවස්ථාව තියෙනවා. එහෙම නොමැතිවුනත් ස්ව අධ්‍යයනයෙන් උසස් පෙළ සමත් හෝ උපාධිධාරීන්ට හෝ වඩා ඉහළ තැනකට ගිය අය ඕනෑ තරම් මා දැක තිබෙනවා. ඒ තමුන්ගේ හැකියාව මත. මේ හැමදේම තීන්දු වෙන්නේ ඔබ විසින් ගන්නා තීන්දු මත. කොහොමනමුත් මට අවශ්‍යවුනේ උසස් පෙළ කළ යුතුයැයි සිතා සිටිනා අයට කිසියම් දෙයක් ලිවීම.

ඉතින් ඔබට ජය!