Categories
අන්තර්ජාලය විවිධ

එසේම වේවා…

ඔන්න “අවුරුදු අවසාන මහා පෝස්ට් රාජයා” ලියන්නයි මේ සූදානම් වෙන්නේ. ඇත්තටම මේ දවස්ටික නම් මට එපා වෙලා තියෙන්නේ. පන්තිත් නිවාඩු දීලා ලබන මුලු සතියෙම. වෙන අය නම් ඉතින් පන්ති එපා කියලා අඬනවා. මට පන්ති ඕනේ කියලා අඬනවා. කරන්නත් මහ ලොකු දෙයක්මත් නැති නිසාම කරන එකම වැ‍ඩේ තමයි Facebook අඩවිය මගේ Twitter අඩවියට හුවමාරු කරගත්ත එක. දිගට හරහට සිංහලෙන් Status Message දාන එක තමයි මේ දවස්වල මගේ විනෝදාංශය. යාලුවෝ ටික මට දැන් හොඳවයින් කුණුහරුපෙන් බනිනවාත් ඇති. ඉතින් මොනවා කරන්නද? කම්මැලි කමටම හිතට එන එක එක ඒවා ෆේස්බුක් එකේ Status Message එකට දාන එක තමයි කරන්නේ.

මේ දවස්වල ඇහෙන සිංදුවක් තමයි… “රම්බරී” කියන සින්දුව. ඇත්තටම මට නම් ඒක ඇහුවාම කරකවලා අතෑරියා වගේ මහා විකාර සින්දුවක් 😀 හැබැයි එකේ ශබ්ද රසයේ නම් පොඩි ගතියක් තියෙනවා. සිංදුවේ අයිතිකාරයා නම් කියන්නේ මේක බයිලා Style එකේ සින්දුවක් කියලා. ඒ වුනත් ඉතින් බයිලා වලත් යම් කිසි ‍තේරුමක් තියෙනවා නෙව. මේකේ නම් ඒ මොන‍ තේරුමක් වත් ඔලුවට එන්නේ නෑ…

මෙන්න මේ ගැන “මරණය” අයියාත් ලියලා තිබුනා…

ඉතින් ඔය අස්සේ තමයි FilmFare සම්මාන උළෙල බලන්න “SET” නාලිකාවෙන් අවස්ථාවක් ලැබුනේ. මේ සම්මාන දීම නම් මට එපා වුනා. මේ ගැන අවධානයෙන් ඉන්න අය නම් අනිවාර්යයෙන්ම දන්නවා ඇති මේ පාර හොඳම චිත්‍රපටිය සම්මානය ලැබුනේ “ජෝධා අක්බාර්” චිත්‍රපටියටයි. මේක නම් මාව කරකවලා අතඇරපු තවත් සිදුවීමක්. මේ චිත්‍රපටියත් එක්කම මේ හොඳම චිත්‍රපටිය සඳහා නිර්දේශ ‍වුන තවත් චිත්‍රපටි දෙකක් වුන “රබ් නේ බනා ඩි ජෝඩී” චිත්‍රපටියත් “ගජිනි” චිත්‍රපටිය ගැනත් තමයි වැඩිපුරම මගේ නම් අවධානය යොමු වෙලා තිබ්බේ. මේ චිත්‍රපටි දෙක ‍එක්ක “ජෝධා අක්බාර්” චිත්‍රපටිය චිත්‍රපටිය තිබ්බොත් “ජෝධා අක්බාර්” චිත්‍රපටියට අනිවාර්යයෙන්ම හිමිවෙන්නේ තුන් වෙනි ස්ථානය කියලයි මාත් ඇතුළුව මේ චිත්‍රපටි තුනම බලපු අයත් එක්ක මේ ගැන කතා කරද්දී කතා වුනේ.

චිත්‍රපටි ගැන කියද්දියි මතක් වුනේ මේ ළඟදී පෙන්නු‍වා නේ “Rang De Basanti” චිත්‍රපටිය ස්වර්ණවාහිනීයේ. මේක තමයි දැං මම කැමතිම අංක එකේ චිත්‍රපටිය. ඇත්තටම මේ චිත්‍රපටිය මට අර “මුඩුක්කුබලු ලක්ෂපති” (Slumdog Millionaire) චිත්‍රපටියටත් වඩා සිරා. වෙනස්ම කැමරාකරණ ක්‍රමවේදයක් භාවිතා කරමින් නිර්මාණය කරලා තියෙන මේ චිත්‍රපටිය ගැන නම් කතා දෙකක් නෑ සුපිරි වර්ගයේ චිත්‍රපටියේ චිත්‍රපටියක්. සංගීතය A. R. රහුමාන්ගෙනුයි. එහෙනම් ඉතින් සංගීතය ගැන අටුවාටීකා අවශ්‍ය නෑ නෙව. පුදුමය කියන්නේ මේ චිත්‍රපටිය අධ්‍යක්ෂකගේ දෙවැනි චිත්‍රපටිය. ඒ කියන්නේ පුදුම දැනීමක් තියෙන අධ්‍යක්ෂවරයෙක්. මේ චිත්‍රපටියේ අධ්‍යක්ෂකවරයා තමයි රාකේෂ් ඕම්ප්‍රකාශ් මෙහෙරා. මේ අධ්‍යක්ෂකවරයාගේ මේ ළඟදී නිකුත් වෙච්ච චිත්‍රපටිය තමයි “Delhi-6” ම්… මම චිත්‍රපටිය බැලුවේ නෑ. ඒ වුනාට මේ චිත්‍රපටියේ සින්දු වලට මම පිස්සු වැටිලා. ‍ඇයි ඒ විතරක් යැ? මම මේ චිත්‍රපටියේ ප්‍රධාන නිළිය (සෝනම් කපූර්) වගේ කෙනෙක්ටත් පිස්සු වැටිලා! (ඒවා ඕනේ නෑ නෙව. ඒවා පුද්ගලික දේවල් නේ… 😉 ) සංගීතය ගැන කිව්වොත්, මේ චිත්‍රපටියේ සංගීතයත් A. R. රහුමාන්ගේමයි. Googleට කියලා පොඩ්ඩක් හොයලා බලන්න. ඩවුන්ලෝඩ් කරගන්න තැනක් හම්බනොවෙන එකක් නෑ…

හරි. චිත්‍රපටි ගැන එච්චරයි. අපේ සිංහල භාෂා හා සාහිත්‍ය ඒකකයෙන් කෙරෙනවා අලුත් වැඩක්. (මොකක්ද මේ අලුත් වැඩේ කියලා ළඟදීම දැනගන්න බැරි වෙන එකක් නෑ). ඉතින් මේ වැඩේදී මටයි, අපේ සහෝදර බ්ලොග්කරු ඉද්දාටයි පොඩි වැඩ වගයක් බාරයි. ඉතින් ඒ වැඩේට සැලසුම් ගහන එකයි මේ දවස්වල අපේ වැඩේ. ඉතින් මේ වැඩේට හොඳ අනුග්‍රාහකයෙකුත් අවශ්‍ය නිසා ‍අපේ තේරීම වුනේ ICTA ආයතනය. අපරාදේ කියන්න බෑ හරිම සුහදශීලි කාර්යමණ්ඩලයක්. හැබැයි මට හරහට හිටියේ ඒකේ තියෙන ලි‍ෆ්ට් එකයි, දොරකුයි තමයි. ඒක නං ඉතින් විලි ලැජ්ජාවේ සංතෝසේ කියන්න බැරි කතාවක්. ඔන්න අපේ ඉද්දාගේ බ්ලොග් එක බැලුවානං මෙලහකට දන්නවා ඇති.

මේ පාර අවුරුදු මහ ඉහළින් සැමරුමක් කෙරෙන්නේ නෑ මං නම්. මොකද කියලා මගේ බ්ලොග් එකත් එක්ක ටික කාලයක් ඉඳලා එකතු වෙලා ඉන්න අය නම් දන්නවාත් ඇති. සමහර විට අමතකත් ඇති. අපේ මාමා‍ගේ වියෝව නිසා ‍මේ පාර අවුරුදු සැමරීමක් වෙන්නේ නෑ.

ඔව්, විභාග ප්‍රතිඵල තියෙන අයනම් මේ පාර යහමින්  අවුරුදු සමරනවා ඇති. කොහොමත් මට විද්‍යාවට B නිසා හිත ඇතුලෙන් පොඩ්ඩක් කචල්. ඇයි හත්තිලව්වේ A8ක්ම ඇරගෙන අරක ‍ගොඩ දාගත්තානම්… පට්ට නේ. ඔන්න A7කුයි B2කුයි වත් තිබ්බානම් අවුලක් නෑ. එක විෂයකට විතරක් කෙල වුනාම අස්පට් එක වැඩී. දැන් ඉතින් පහුගිය දේවල් ගැන කළකිරිලා ඇති වැඩක් නෑ, A/L ගොඩදාගන්න එකයි තියෙන්නේ. මම නිකමට කියන්න… මම උත්සාහ කරන කෙනාට A9යි කියලත් දැනගන්න ලැබුනා. දැන් නම් මාව ගනන් ගන්න එකක්ම ‍නෑ කියලාමයි මට හිතෙන්නේ. අපෝ මාත් දාගන්න ලෙඩ වාට්ටු.

ඔය අතරේ මගේ සාමාන්‍ය පෙළ ප්‍රතිඵලත් එක්ක ඔළුවට ආපු දෙයක් තමයි කෙටි චිත්‍රපටියක් හදන වැඩේ. අපේ “LÉ ROYALÉ” කණ්ඩායමට කිව්වා නම් වැඩේ ගොඩ. මෙන්න මේකයි අයිඩියා එක… ඔන්න දැං හිතින් මවා ගන්න

ඔන්න දර්ශණ තලය විවෘත වෙනවා…
දර්ශණ තලයේ තියෙන්නේ මේසයක් මත තියපු දුරකථනයක් (ජංගම දුරකථනයක් නෙවෙයි Land Phone එකක් 😉 )  ඒ මේසයට පිටිපස්සෙන් පුටුවක් තියලා තියෙනවා…

ඔන්න ඒ පුටුව පිටිපස්සෙන් දර්ශණ තලය හරහා (මේසයටයි, පුටුවටයි පිටිපස්සෙන්) කවුදෝ යනවා. යට කොටස විතරයි පෙන්නන්නේ… එයා දර්ශන තලයේ මැදට එද්දී, ඔන්න දුරකථනය නාද වෙනවා.

ට්‍රීං… ට්‍රීං…
ට්‍රීං… ට්‍රීං…

මිනිහා සිනාමුසු මුහුනින් යුතුව පුටුවේ වාඩිවෙලා රිසීවරය එක අතට ඇරගෙන…

හෙලෝ…
ආ… ඔව් මිස්. ප්‍රතිඵල හොඳයි මිස්. ඒ අටයි බී එකක් තියෙනවා මිස්.
බී තියෙන්නේ විද්‍යාවට මිස්. (මූන පොඩ්ඩක් ඇඹුල් වෙයි)
ඔව් අපරාදේ මිස්
ඔව් මිස් රී කරෙක්ෂන් දාලා බලන්න ඕනේ…
හරි මිස්.

ඔන්න ‍ඔහොම කියලා රිසීවරය තියලා පුටුවෙන් නැගිටිනකොටම ආපහු දුරකථනය නාද වෙනවා.
මෙයා ආපහු පුටුවේ වාඩි වෙලා රිසීවරය අතට ඇරගන්නවා.
හෙලෝ…
ආ මචන්!
උඹට කොහොමද?
ආ එළනේ…
මට මචන් ඒ අටයි… බී එකයි මචන්.
බී එක සයන්ස් වලට මචන්
ඔව් බං
ආ හරි පස්සේ කතා කරමු.
මිනිහා ‍ආපහු රිසීවරය තියනවාත් එක්කම තව කෝල් එකක් එනවා. මිනිහාට තද වෙනවා…
මිනිහා රිසීවරය ඇරගෙන ගත් කටටම වේගයෙන්…
A8යි බී එකයි
බී එක සයන්ස්
රිසිවරය තිව්වා
ට්‍රී…
A8යි බී එකයි
බී එක සයන්ස්
රිසිවරය තිව්වා
ට්ර
A8යි බී එකයි
බී එක සයන්ස්
රිසිවරය තිව්වා
ට්
A8යි බී එකයි
බී එක සයන්ස්
රිසිවරය තිව්වා
එහෙම වෙලා තිරය අඳුරු වෙලා තිරය වැහිලා ගිහිල්ලා
ආපහු තිරය ‍විවෘත වෙනකොට මිනිහා හොඳටම හෙම්බත් වෙලා. මූන පැත්තට හරවාගෙන මේසේ උඩ ති‍යාගෙන රිසීවරේ මූන ඉස්සරහින් තියාගෙන…
ඒ….
ආපහු තිරය අඳුරු වෙලා තිරය වැහිලා ගිහිල්ලා තිරය විවෘත වෙනවා. එතකොට දුරකථනය ෆෝන් එකේ තියලා… දුරකථනය ඔහේ නාද වෙනවා. මිනිහාට හොඳටම නින්ද ගිහිල්ලා…
නිමි.

ඔන්න ඕකයි කෙටි චිත්‍රපටියකට හිතිවිල්ල. ඕන්නං තව අඩුම කුඩුම දාලා කරන කෙනෙක් හදලා බලන්න ‍කොහොමද කියලා. මේකෙන් පෙන්නන්න උත්සාහ කරන්නේ A8යි B1යි ගත්ත මං වගේ කෙනෙකුගේ 😉 මානසික පීඩනයක තරම. හැබැයි මට නං ඔච්චරටම කෝල් ආවේ නෑ 😉

ඉතින් ඔහොම තමයි ජීවිතේ. ගමේ යන්නත් ඕනේ. වෙලාවක් නෑ මේ ව්‍යාපෘතියකට හිර වෙලා නිසා. ඒ මොනවා වුනත් ගම පැත්තේ අනිවාර්යයෙන්ම කරක්ගහලා එන්න ඕනේ මේ දහජරා කොළඹ, නුගේගොඩ, මහරගම පීඩ‍නයෙන් මිදෙන්න…

ඉතින් ‍එහෙනම් ඔන්න අවුරුදු අවසාන මහා පෝස්ට් රාජයා ලියලා අහවරයක් කරා.
ඔබ සැමට එසේම වේවා!!!

ආ එහෙම කියන එක හරි නෑනේ. ඔබ සැමට සාමය සතුට සෞභාග්‍යය පිරි ශ්‍රී සුබ නව වසරක් වේවා! ආ ඒ විතරක් නෙවෙයි, බඩු මිල අඩුවෙන… පඩි වැඩි වෙන. සක්විති බැංකු බිහි නොවෙන… අලුත් අලුත් ගැජට් බැජට් අතගාන්න ලැබෙන දේශපාලන හා ආර්ථික අර්බුද ඇති නොවෙන සුබම සුබ පට්ට ආතල් අවුරුද්දක් වේවා!

17 replies on “එසේම වේවා…”

ඇත්තටම Rang de Basanti චිත්‍රපටය ගැන නම් කියන්න වචන නෑ. මං ඒක බැලුවේ ආපු දවස්වලම. සුදාරක දන්නවද ඒක ඒ වසරේ (2006) ෆිල්ම්ෆෙයාර් හොඳම චිත්‍රපටය උනා. අමුතුම විදියේ තේමාවක් ගත් චිත්‍රපටයක්.

මල්ලි ඔයාගේ කෙටි චිත්‍රපට පිටපත නං මැක්සා 😀

අම්මට සිරි නියම idea එක. හැබැයි A එකක්‌ වත් ගත්තෙ නැති කට්‌ටියගෙන් කන්න බලාගෙන කරන්න. 😆 ඕක ඔච්චර ගන්න ගණන් එපා මලයා. ඔය හොදට කරල තියෙන්නෙ. මට B ආවෙ පාඩම් නොකරපු හින්ද නෙමෙයි (හැබැයි ඇත්තටම කරපු පාඩමක්‌ නෑ 😀 ) paper එකෙන් බාගයක්‌ ගෙදර ගෙනාපු හින්ද. හික්‌ හික්‌. 😆 ඔය කියන විදියට ඕයාට එහෙම වුනානම් අපේ Main Hall එකේ වහලෙන් රණවිරු ස්‌මාරකේට පනියි වගේ. 😆

මම නම් scene එක දන්නෙ නෑ ඒත් results බලන කෙල්ලෙක්‌ නම් පැත්ත පලාතක යන්න එපා, අමාරුවෙ. තට්‌ටු කරන්නාට දොර ඇරේ නෙ. අවුරුදු කාලෙ හින්ද කැවිලි පිගානක්‌ අරගෙන ගිහින්ම තට්‌ටු කරන්න. අවුරුදු කුමාරය කියලවත් හිතුවොත්… 😀

එහෙනම් සියලු ප්‍රාර්ථනා මල් ඵල ගැන්වූ, ඒ මල් කඩන්නටත් හැකි, සුබම සුබ පට්ටම ආතල් අළුත් අවුරුද්දක්‌ වේවා!

😀

එළ එළ! මහ විසාල පෝස්ට් රාජයෙක් නොවැ. අවුරුද්දත් සමරන්න යාළුවා.
එහෙනං, සාමය සතුට සෞභාග්‍යය පිරි සුබම සුබ අළුත් අවුරුද්දක් වේවා!!

හික්.. සෝක් චිත්‍තර පටිය..

ඒකෙ නෙවේ මචං.. උඹට ගමට යන්න “හිත හදාගන්න” පුළුවං ද ? 😛

@ප්‍රවීන්- ආ ඔව් ඔව්. ඒක මතක් කරපු එක හොඳයි. තව අඩුම කුඩුම ටිකක් එකතු කරොත්… මේක ඒ අවුරුද්දේ (2006)බැ‍ෆ්ටා සම්මාන උළෙලේ හොඳම විදේශ චිත්‍රපටියටත් නිර්දේශ වුනා. ඉන්දියාවෙන් ඇකඩමි සම්මාන වලටත් ඒ අවුරුද්දේ ඇතුලත් වුනේ මේ චිත්‍රපටියමයි. ඒ වගේම ෆිල්ම් ෆෙයාර් සම්මාන උළලේ හොඳම නලුවා සම්මානයත්, විචාරක අංශයෙන් ‍හොඳම නලුවා සම්මානයටත් ආමීර් ඛාන් තේරී පත්වුනේ මේ චිත්‍රපටියටමයි.

@දිලින- අයියාතේ සාපෙදී මරු වැඩක් නෙව කරගෙන තියෙන්නේ 😀 ප්‍රතිචාරයටයි සුබ පැතුමටයි දෙකටම බොහොම ස්තූතියි
@අන්ජු- ඔව්, අ‍පේ අවුරුද්දේ අන්තිම දවසත් නිසා ඉතින් වැඩිපුර එව්වා මෙව්වා දාලාම ලියන්ඩ හිතුනා. ඔබටත් “එසේම වේවා!” 🙂
@බුධාජීව- යකෝ ගමට යන්නේ “හිත හදාගන්න” තමයි 😛

ඇති ඔයින් ගියා. විදුලි සෝපානයකින් කෙසේ වෙතත් බස් එකකින් හරියට බැහැගන්න බැරුව නෙව පහුගිය ටිකේ හිටියෙ 😀

ආ ඒ අතර…

සුබ අලුත් අවුරුද්දක් වේවා! පැතුම් ඉටු වේවා 😉 සිනා බෝ වේවා.

Rang De Basanti was one of the most atrocious movies I have ever seen – saw it only on small screen on a flight. Typical BJP/VHP/RSS sh^t. What message it gives? One should take arms – towards a suicidal end – just because a politician is corrupted? Should be good stuff for suicide bombers, not for the civilized people.

මල්ලී, ඔයා ප්‍රතිපල ගැන ඕනවට වඩා හිතන්න එපා…ඔයා දන්නවද මට ඒ කාලේ C එක තිබ්බේ සමාජ අධ්‍යයනයට.. අනිත් ඔක්කොම D.. මටත් ඔය ලෙඩේ තිබ්බා…ඒත් ඔය විලි ලැජ්ජාව පොඩි දවසයි.. හොදට අනිත් විහාග කර ගන්න..

ඔය ප්‍රතිපලෙ‍් හොදටම අැති . A/L කර ගන්න

සුබ අලුත් අවුරුද්දක් වේවා!

අනේ මල්ලි විභාග ප්‍රථිඵල බලන ගෑනු ළමයි නම් වැඩක් නෑ හොඳේ 🙂 කොහොම උනත් ඔයාගෙ රෙසල්ට් එක හොඳයි නෙ. අනික රස්සාවකට ගියත්, කැම්පස් යන්න උනත් O/L රිසල්ට්ස් බලන්නෑ නෙ. හැබැයි ඔන්න A/L නම් සෑහෙන්න පේවෙලා කරන්න වෙයි…ඒකට බුද්ධිය විතරක් මදි උත්සාහයත්, විනයත් ඕනෙ (ඉහළම ප්‍රථිඵල අරන් කැම්පස් යන්න නම්. නැත්නම් ඉතින් C 3 වගේ දාගන්න නම් අමාරු නෑ. ඒත් ඔයාට ඊට වැඩිය දුරක් යන්න හැකි බව හිතෙනවා).
කොහොම උනත් ඔබටත් සුභම සුභ අලුත් අවුරුද්දක් වේවා!

කෝ බං මම දාපු කමෙන්ට් එක? උඹෙ සදාචාර ස්ටෑන්ඩ’ඩ් වලට ඒකත් කැපුනද?

මොකක්ද බං මේ?? %&*(**

OpenID Authentication Error

සුදාරකටත් හැපිම හැපි නිව් year එකක් වෙන්න ඕනෑ‍…….මලයගේ බ්ලොග් එකනම් නියමයි…..රිසල්ට්ස් බලන කෙල්ලෝ නම් දාගන්න එපා…. කාන්තාරෙ ඔටුවෙක් ඊට වඩා හොදා

රන්බරී සින්දුවේ තේරුම මම හිතන විදිහට මුඩුක්‌කුවක හැන්දෑ වෙලා කියවන ඕප දූප ගැන කියලයි .

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.