මේ දුටු හද කම්පිත ජනතාවගේ අනාගත නායකත්වය උසුලන පාසල් සිසුන්ගේ සියදිවි නසාගැනීමේ ප්‍රවනතාව උච්ඡත්වයට පත් වෙමින් පවතින මේ මොහොතේ ඔවුන්ගේ අභිවෘද්ධිය උදෙසා ඔවුන්ව දැනුවත් කිරීමට ප්‍රථමයෙන් ක්‍රියාත්මක නොවී, ඊටත් වඩා අති සාර්ථක වූ ක්‍රමෝපායන් මඟින් පාසල් සිසුන්ගේ සියදිවි හානි කරගැනීම වලක්වාගනු ලැබේ.

‍මේ සඳහා වූ අති සුවිශේෂී ක්‍රියාමාර්ග මෙසේය…
පාසල් තුළට ප්‍රථමයෙන් ජංගම දුරකථන රැගෙන ඒම තමනම් වන අතර ඒත් සමඟම පාසල් තුළ ප්‍රධාන වශයෙන් ටයි පටි තහනම් කෙරෙනු ලබයි. එමෙන්ම වහාම ක්‍රියාත්මක වන පරිදි වැසිකිලි වසා දැමීමට කටයුතු කළ යුතුය. පාසල් තුළ වීදුරු බෝතල් හා විද්‍යාගාර උපකරණ වහාම ඉවත් කළ යුතු අතර. ආපන ශාලා සහ විද්‍යාගාර ලෑලි ගසා වසා දමන්නේ නම් මැනවි. අවසාන වශයෙන් පාසල් ගේට්ටුවද වසා දමා. පාසල් භූමිය බහු ජාතික සමාගමක විකුණා දැමීම ඉතාමත් යෝග්‍ය කරුණකි.

මෙම මරණ ඉහළ යෑම සඳහා ප්‍රධාන වශයෙන් හේතු සහගත වන ප්‍රේම සම්බන්ධතා ඇතිවීම වලක්වා ගැනීමට බල කෙරෙනු ලබන අතර. ඒ සඳහා පිරිමින්ට කාන්තාවන් නොපෙනෙන, කාන්තාවන්ට පිරිමින් නොපෙනෙන ඇස් කණ්ණාඩි “හැරී ‍‍පොටර් සහ ඔහුගේ පුත්‍රයෝ” සමා‍ගමෙන් මේ වන විටත් ඇනවුම් කර ඇත. එමෙන්ම දැනට විවාහ වී සිටින පවුල් නැවතත් ලියාපදිංචි කෙරෙනු ලබන අතර. ඔවුන් විවාහ වූ ක්‍රමය එහි සටහන් කිරීමට අත්‍යවශ්‍ය වේ. එහි,

ආදර විවාහයක් ලෙසින් සටහන් වී ඇත්නම් ඔවුන්ව වෙනම ලැයිස්තු ගත කොට පසුව දික්කසාද නඩු දමා දික්කසාද කරවනු ලැබේ. එමෙන්ම දික්කසාද කරවනු ලබන පුද්ගලයින් එලෙස දික්කසාද කරවනු ලැබූ වෙනත් පුද්ලයින් සමඟ කසාද බන්දවනු ලැබේ.

සෑම විවාහ සම්බන්ධතාවක්ම යෝජනා විවාහ විය යුතු අතර. මංගල දැන්වීම් පුවත්පත්වල හෝ “අනුමත” කරනු ලැබූ වෙබ් අඩවි වල මුදල් ගෙවා ප්‍රචාරය කර, මඟුලක් සොයා ගත යුතුය. ජනතාව ගමන් කරනු ලබන පදික මාර්ග තුළ සෑම පුවත්පතකම මංගල දැන්වීම් අතිරේකය නොමිලයේ බෙදා හරිනු ලැබේ. පුද්ගලික මංගල කපුකම් ආයතන දිරිගන්වනු පිණිස ඔවුන්ට ණය හා වෙනත් දීමනා ලබාදේ.

අවසාන වශයෙන් ජංගම දුරකථන භාවිතා කරනු ලබන පුද්ගලයින්ට තිර පහසුකම් නැති “ගඩොල් භාග” ලෙසින් හැඳිවෙන දුරකථන භාවිතයට දිරිගන්වනු ලබන අතර. දැනට භාවිත දුරකථන වලට “ග‍ඩොල් භාග” හුවමාරු කරනු ලැබේ. කාන්තාවන්ගේ ආරක්ෂාව පිණිසඳ ගඩොල් භාග වැනි “ගඩොල් භාග” දුරකථන වක්‍රකාරයෙන් ප්‍රයෝජනවත් බැවින් SLS සහතික යට‍තේ විවිධ හැඩයෙන් යුක්ත ගඩොල් භාග සියරට තුළම නිෂ්පාදනය කරනු පිණිස කර්මාන්ත ශාලා බහුජාතික සමාගම් විසින් සිය ප්‍රාග්ධනය යොදවා ඇති කරනු ලැබේ.

මේ සමඟ මිල ඉහළ යන ගඩොල් සෑදීමේ අමුද්‍රව්‍ය මිලට ස්ථාවර මිලක් යෝජනා කරනු ලැබේ.

අද ප්‍රවෘත්ති මෙයින් අවසානයි. අසා සිටි ඔබ සැමට සියදිවි හානිකරගැනීමකටවත් දිවියක් නොමැති සුභ දිවියකට සුභාසිරි!

–
ක්ෂණික පුවත් වැඩිදුරටත් – http://micro.sudaraka.com

මේ ප්‍රවෘත්තියට හිනාවෙන්නද… අඬන්නද කියලා මට නම් හිතාගන්න බෑ. හිනාවුනත්, අඬලත් වැඩක් නෑ. සමහර විට මේක අපිටත් වෙන්න බැරිකමක් නෑ!. වැඩි අටුවාටීකා අවශ්‍ය නෑ. සමහර අය නම් මේ ගැන දන්නවා ඇති. ‍ෆේස්බුක් වෙබ් අඩවියේ තමන්ගේ profile එකේ තමන්ගේ සම්බන්ධතාවයන්ගේ තොරතුරු එකතු කරන්න පුළුවන්. ඒ කියන්නේ තමන් බැඳලාද?, එහෙම නැත්තන් තමන් සම්බන්ධතාවයක ඉන්නවාද? නැත්ද කියලා අනිත් අයට දැනගන්න ලියන්න පුළුවනි. ඉතින් හිතන්න පුළුවන්ද ඒක මාරු කරා කියලා තමන්ව මරන්න කවුරුහරි බලාගෙන ඉන්නවා කියලා? අහ්! බලාගෙන ඉන්න දෙයක් නෑ!! ඇත්ත‍ටම මරලා! අන්තර්ජාලය මිනිස්සුන්ගේ ජීවිතයත් එක්ක දැන් දැන් ගනුදෙනු කරන ආකාරය ගැන නම් හිතාගන්න බෑ.

ඔව් මේකයි කතාව

තමන්ගේ Relationship Status එක විවාහකයි (Married) කියන එකෙන් තනිකඩයි (Single) කියන එකට මාරු කරපු එකට තමන්ගේ බිරිඳ, තමන්ගේ දරුවන් දෙදෙනාගේ මවව සැමියා විසින් ඝාතනය කරලා. ‍හපෝයි!

වැඩි විස්තර මෙතැනින් ලබාගන්න
මේක නම් මාර ලෝකයක්! සමහර විට තමන්ගේ බිරිඳට උමතු ප්‍රේමයෙන් හිටියාද මන්දා…

දෙවෙනි ප්‍රවෘත්තිය

ලංකාවේ තවත් ශ්‍රේෂ්ඨ සංගීතඥයෙක් වන ප්‍රේමසිරි ‍කේමදාසයන් ඊයේ (2008.10.24) අපෙන් සමුගත්තා. ඉතින් ලංකාවේ සංගීතයට එතුමාගෙන් පස්සේ සේවය කරන්න ඉන්නේ තව කීයෙන් කීදෙනාද? මේක නම් කණගාටු දායක තත්ත්වයක්.

මගේ තුන්වෙනි ප්‍රවෘත්තිය
තුන්වෙනි ප්‍රවෘත්තිය මේ කලින් කියපු පළවෙනි ප්‍රවෘත්තියයි, දෙවැනි ප්‍රවෘත්තියක් එකට සම්බන්ධ කරන එකක්. ප්‍රේමසිරි කේමදාසයන් ඊයේ දිනයේ අභවප්‍රාප්ත වීම ඔබ හැමදෙනාටම වගේ මටත් හරිම සංවේගදායක ආරන්චියක්. පුද්ගලයා නැතිවුනාම හා සමාන දුකක් තමයි මට ‍ඒ වෙලාවේ ලංකාවේ සංගීත ක්ෂේත්‍රය පිළිබඳ ඇතිවුනේ. ඉතින් ලංකාවේ සංගීතය දියුණු කරන්න තව කීයෙන්‍ කීදෙනාද ඉතිරි වෙලා ඉන්නේ? ඉතින් ඒක නිසා මම ෆේස්බුක් එකේ status message එක මේ විදිහට මාරු කරා.

Supun Sudaraka is really really sad about the future of Sri Lankan Music කියලා…

ඒත් දෙවෙනි ප්‍රවෘත්තිය දැනගන්න බැරිවෙච්ච අය මගෙන් අහලා තිබ්බා ඒ ඇයි කියාලා… ඒ අයට එතැනදී පිළිතුරු දුන්නා. ඒ ව‍ගේම එක්තරා කෙනෙක් වැඩේ වරදවා තේරුම් ගෙන. මම කලින් සටහනේ කිව්වා නේ ලිට්ල් චෑම්ප්ස් ගැන… ඉතින් ඒකේ බාබී ගැනත් කිව්වානේ… ඉතින් එයා අහලා තිබුනා මෙන්න මෙහෙම…

ඔච්චර ඉක්මනට ශ්‍රී ලංකාවේ සංගීතය එපා වුනාද? බාබී සින්දු කියනකොට එයාගේ සින්දුවත් ලස්සනයි එයත් ලස්සනයි. ඒ නිසා‍ එහේ සංගීතෙත් හිතට ඇල්ලුවාද? අනේ ඒකනම් හොඳ ආරන්චියක් වෙන්න බෑ…

කියලා…

ඔන්න ඕකයි තත්වේ. ෆේස්බුක් කියන්නේ දැන් නම් දෙපැත්ත කැපෙන ආයුධයක් වගේ කියලා හොඳටම තේරුනේ එදා තමයි! දැන් නම් ෆේස්බුක් පාවිච්චි කරන්නේ හොඳට තේරුම් ඇරගෙන තමා…

ප්‍රවෘත්ති සාරාංශය

අන්තර්ජාලය මිනිසුන්ගේ ජීවිතයට මෙතෙක් කල් යම් යම් වශයෙන් බලපෑම් කරන ලද්දේ වුවද ඉදිරියේදී ඔබ ඝාතනය වීමටද ‍වුවද අන්තර්ජාලය හේතුවක් වනු නොඅනුමානය. එබැවින් අන්තර්ජාල පරිහරණයේදී ප්‍රවේශම් වනු…

සුදාර‍කගේ ප්‍රවෘත්ති ප්‍රකාශනය මෙයින් අවසානයි. අසා සිටි ඔබ සැමට ස්තූතියි…

මූලාශ්‍ර – දෙරණ හා ස්වර්ණවාහිනී

මේ අතර ම‍ාස්ටර් ඔෆ් නිවුස් වෙබ් අඩවියේ වාර්තාවන්නේ අම්පාර බස්නැවතුම් පොල අසල අධි බලැති බෝම්බයක් පුපුරා ඇති බවයි.

වැඩිදුර විස්තර බලාපොරොත්තුවන්න…

යාවත්කාලීන වීම (රාත්‍රී 7.00)

පුද්ගලයින් 8ක් ජීවිතක්ෂයට පත්වී ඇත (මූලාශ්‍රය ස්වර්ණවාහිනී)