හැම දෙයක්ම ක්‍රමිකව විකාශනය වෙන්න ඕනෙ. එහෙම නැතිනම් ඒකෙ අගයක් නෑ. භෞතික විද්‍යා විෂය ගත්තොත් අපි ඔක්කොම දොහොත් මුදුන් දීල වන්දනා කරන අයිසැක් නිව්ටන්ට තමන්ගෙ ජනප්‍රිය නිව්ටන් නියම තුන ඉදිරිපත් කරන්න ලැබෙන්නෙ නැහැ ඇරිස්ටෝටල්ගෙ ඉඳල ගැලීලියෝගෙ මතවාද පර්යේෂණ ඉදිරිපත් නොවුනානම්. හැම දෙයක්ම ක්‍රමිකව විකාශනය වෙන්න ‍ඕනෙ. බොහෝ දෙනා මියගිහින් පළවෙනි ලෝක යුද්ධය නිමාවෙලා දෙවෙනි ලෝක යුද්ධයක් ඇති වෙන්නත්, ඊළඟට සීතල යුද්ධයක් ඇතිවෙන්නත්, එයට උපකාරයක් වෙන්න අන්තර්ජාලය නිර්මාණය වීමත් ක්‍රමිකව විකාශනය වුන දෙයක්. අන්තර්ජාලය නැතිනම්, මෙතන ඔබත් නෑ මමත් නෑ.

දහස් ගණනින් මියයාම හෝ මරණයට පත් කිරීම සාධාරණීකරණය කරා නොවෙයි. මම කිව්වෙ ‍මේ ලෝකයේ හැටි. හැමදෙයක්ම සාධාරණත්වයක් නෑ. ඒත් මිනිස්සු ජීවත්වෙනව, මැරෙනවා. සංසාර චක්‍රය කියන්නෙ ඒකයි.

ලංකාව ඒ අතින් පුදුම රටක්. ලංකාව කවදාවත් ක්‍රමිකව දියුණුවට පත් වුන රටක් ‍නෙවෙයි කියලයි හිතෙන්නෙ. ගණිතයට අනුව හැමදෙයකම කිසියම් රටාවක් (pattern එකක්) තියෙනව. ගණිතඥයෝ ගණිතය සම්බන්ධ රටා හොයද්දි, සමාජ විද්‍යාඥයෝ තවත් රටා හොයන රාජකාරි වල. ගල් යුග, වැඩවසම් යුග, කාර්මික විප්ලව යුග පහු කරගෙන අපි නූතන යුගයට ඇවිත්. ලංකාව අපි අත්දකින සිතුම් පැතුම් වෙනත් රටවල‍ට සාපේක්ෂව බොහෝ යල්පැන ගිය දේවල්. ඒකනෙ ලංකාව තවම ඉන්නෙ වික්ටෝරියානු යුගයෙ කියන්නෙ.

අපි මේ ජීවත්වෙන්නෙ පුදුමාකාර යුගයක. ආණ්ඩුවෙන් මොනවහරි කරාද, ඒකට විපක්ෂයෙන් විරුද්ධ වෙනව. එහෙම නැතුව ඒක විපක්ෂයක් නොවෙයි නෙ. ඒ වුනාට දැන් විපක්ෂයක් නැති ගානයි. හිතන්න. ලංකාව එහෙන් මෙහෙන් දියුණු වෙනව. වරායවල් හැදෙනව, අධිවේගී මාර්ග හැදෙනව, ගුවන් පාලම් හැදෙනව, අසබ්‍ය වෙබ් අඩවි තහනම් වෙනව, පෞද්ගලික විශ්ව විද්‍යාල පටන්ගන්නව, ෆේස්බුක් නිසා කෙල්ලො අනාථ වෙනව, මොබයිල් ෆෝන් නිසා ගෑනු ළමයි සියදිවි නසාගන්නව, ළමා අපචාර වැඩිවෙනව, සිරා නාට්‍ය වේදිකාගත වෙනව (උදා: කලම්බො ‍කලම්බෝ), පරණ නාට්‍ය අලුත් වෙලා එනව (උදා: ඒකාඅධිපති), ඉන්දියාවෙ චිත්‍රපටි ගෙඩි පිටින් කොපි කරල නිෂ්පාදනය කරනව (උදා: සුවඳ දැනුනා ජීවිතේ), ගස් බැදීමේ ‍වීදි නාට්‍ය සංදර්ශනය කරනව

ඉස්සර වුනේ බෝම්බ පිපිරුන එක විතරයි. (ඒකත් කිව්වෙ සාපේක්ෂව)

ඉස්සල්ල කියපු ලැයිස්තුවට අලුතෙන් යමක් එකතුවෙන්න ඕනෙ. ඒ අලුතෙන් “සිරා” චිත්‍රපටි නිෂ්පාදනය වෙන එක.

සිරා කිව්වෙ සාපේක්ෂව. බඹර වලල්ල චිත්‍රපටිය වටේට සෑහෙන්න ප්‍රතිචාර. තැන තැන සම්මන්ත්‍රණ. ඒ විතරක් නොවෙයි, අන්තර්ජාලයෙත් සෑහෙන්න කතා වෙනව. බඹර වලල්ල චිත්‍රපටිය ගැන මට කියන්න තියෙන්නෙ බොහොම ටිකයි. චිත්‍රපටිය හොඳ වුනත් ප්‍රචාරණය කෙරෙන තරමට චිත්‍රපටිය හොඳ නම් නැහැ. කො‍හොම නමුත් චිත්‍රපටිය හරිම තාත්විකයි. Realistic!

ඊළඟ චිත්‍රපටිය ඉර හඳ යට. චිත්‍රපටියේ සිනමාකරණය නම් උපරිමයි. සිංහල චිත්‍රපටි වලට සාපේක්ෂව අති විශිෂ්ඨයි! ඒත් දෙබස්. අහෝ! මං හිතන්නෙ දෙබස් ලියල තියෙන්නෙ ප්‍රබුද්ධ ලේඛකයෙක්. චිත්‍රපටිය බලන්න. බො‍හෝ තැන් වල කතා කරන්නෙ ලියන භාෂාවෙන්. එතකොට චිත්‍රපටියෙ තියෙන බොහොම සංවේදී තැන් වල ඒ හැඟීම දැනෙන්නෙ නෑ. මට හිනා වෙන්නත් වුනා එයාල අඬන තැන් වල. දෙබස් වලට ලකුණු බින්දුවක් දෙන්නවත් වටින්නෙ නැහැ. ඒත් කතාව, චිත්‍රපටියෙ බෙනට් රත්නායක සිංහල සිනමාව වෙනුවෙන් කරල තියෙන අලුත් පර්යේෂණ බොහොම වැදගත්. ඒ පර්යේෂණ බඹර වළල්ලට වඩා මේ චිත්‍රපටිය (ඉර හඳ යට) නිසා සිංහල සිනමාවට විශේෂ සේවාවක් වෙයි.

චිත්‍රපටි දෙකට ලකුණු දෙන්න කිව්වොත් සමස්තයක් විදිහට අරගෙන මගෙන් බඹර වළල්ලට දහයෙන් හයකුත්, ඉර හඳ යට චිත්‍රපටියට දහයෙන් පහයි දශම පහකුත් දෙන්න පුලුවනි.

ඉඩ තියෙන වෙලාවක චිත්‍රපටි දෙක බලන්න යන්න. වියදම් කරන මුදල නම් නාස්තියක් වෙන්නෙ නෑ සිකුරුයි!

මේ තියෙන්නෙ තවත් අනාගත බලාපොරොත්තු තියාගන්න පුළුවන් චිත්‍රපටි දෙකක්. එකක් නිනෝ ලයිව්. අනිත් එක  “How I wonder what you are”. මේ චිත්‍රපටි ‍දෙකේම පූර්ව ප්‍රචාරක පට මේකට එකතු කරන්නම්. ඒත් එක්කම තව දෙයක් කියන්න ඕනෙ. මේ චිත්‍රපටි අතරට කඩාගෙන පනින සුපර් සික්ස් චිත්‍රපටිය Total Disaster එකක් වෙයි කියල අනාවැකි කියන්න පුලුවන්. ඒ වගේ චිත්‍රපටි දැන් Out of Fashion. නිනෝ ලයිව් චිත්‍රපටියේ තාක්ෂණය පර්යේෂණාත්මක අත්දැකීමක් වෙයි. ඒ ඇරෙන්න ආරන්චි විදිහට නියෝ ලයිව් කියන්නෙ The Truman Show චිත්‍රපටියේ කොපියක්! කොහොම නමුත්, හිතපු ඉක්මනින් විදූ චිත්‍රපටිය සිනමා ශාලා වෙත නිකුත් නොවීම නම් දුකට කාරණයක්.

How I Wander What You Are

Nino Live

Super Six (The Total Disaster)

–
මට ජීවිතේ ගැන ගොඩක් දේවල් ලියන්න තියෙනව. ඒත් ලියන්න හිතෙන්නෙ නෑ. වෙනද වගේ නෙවෙයි. දැන් ජීවිතේ හරි සංකීර්ණයි. ඒ ඇති දැනට.

බ්ලොග් අවකාශයේ නිහඬව ඉන්න තවත් හේතු වුනේ හෙන ගැහුව වගේ අන්තර්ජාල සම්බන්ධතාව බිඳවැටීමත්. ඒත් එක්කම බ්ලොග් අඩවිය බිම ඇදගෙන වැටීමත් හරි. ඔන්න ඒ ප්‍රශ්න ඉවරයක් වුනා කියමු‍කෝ. වර්ඩ්ප්‍රෙස් ඩොට් කොම් උඩ‍ට බ්ලොග් අඩවිය අරගෙන එද්දි, මට නිකමට වගේ හිතුන කවද්ද මුලින්ම බ්ලොග් එක ලියල තියෙන දවස කියල හොයල බලන්න. බැලින්නම් දෙදාස් අට අවුරුද්දෙ ජනවාරි 20. ඒක බ්ලොග් ලිපියක් නෙවෙයි. බ්ලොග් එක හදන මුල් කාලෙ නිකන් ‍විහිළුවට වගේ දාපු පොඩි සටහනක්. ඒ අර්ථයෙන් ගත්තම ඊට පහුවෙනිද ඕම් ශාන්ති ඕම් චිත්‍රපටිය ගැන ලියල තමයි මේ ලියවෙන සුදාරකගේ අන්තර්ජාල සටහන ලියවෙන්න පටන් අරගෙන තියෙන්නෙ.

මීට කලින් බ්ලොග්-ස්‍‍පොට් ඇතුළෙ මුලින්ම බ්ලොග් කෙරුවාව පටන්ගත්තත්. ඒක එතන තියාගෙන හිටියෙ නම් නැහැ. කෙලින්ම වර්ඩ්ප්‍රෙස් වලිනුයි වැඩේ පටන්අරගත්තෙ. ඉතින් එහෙම බලනකොටත්, ඕම් ශාන්ති ඕම් චිත්‍රපටියෙන් ලිවිල්ල ඇරඹුන දිනය 21වීමත්, මේ කියන හැම මාසෙම විසි එක්වෙනි දිනය ජීවිතයත් එක්ක මහ ගුප්ත විදිහට බැඳිල තියෙන නිසාත්. මමම බ්ලොග් අඩවියේ ආරම්භක දිනය විදිහට දෙදාස් අටේ ජනවාරි විසිඑක්වෙනි දිනය තීරණය කළා. ඒක තනිකර ඒකමතික ඒකාධිපති තීරණයක්!

එහෙම ගත්තාම 2010 ජනවාරි 21වෙනි දිනයට මේ බ්ලොග් අඩවියට අවුරුදු 2ක්. “සුදාරකගේ අන්තර්ජාල සටහන” කියන නම මේකට වැටුනෙ හිතාමතා නෙවෙයි. ඒක නිකම්ම ඔළුවට ආපු නමක් වෙන්න ඇති. කොහොමහරි මේ නම මේකට වැටෙන්න හේතුවක් වෙන්න ඇත්තෙ ඒ කාලෙ අන්තර්ජාලයේ තිබුන සීමිත සිංහල බ්ලොග් ප්‍රමාණයක් අතරින් නිතිපතා වගේ යාවත්කාල වුන, හැම වෙලාවෙම වගේ කියවපු “මලින්තගේ සටහන” වෙන්න ඕනෙ. “මලින්තගේ” නම කපල ඒකට “සුදාරක” දාලා, ඒ මැදට “අන්තර්ජාල” ඔබල තමයි බ්ලොග් අඩවියට නම හදාගත්තෙ. මට මතක විදිහට නම් වුනේ එහෙමයි.

ඒ කාලෙ මම පොඩි එකා. දැනුත් මහලොකු වෙනසක් නැහැ ඉතින් බැලුවම. තාමත් ඒ උස ඒ උසමයි, ඒ කොට ඒ කොටමයි! හැබැයි බ්ලොග් ලියන්න පටන්ගත්ත එකෙන් ජීව විද්‍යාත්මකව වෙන වැඩිවිය පැමිණීම ඉක්මවෙලා ගිහින් නියම විදිහට සිතිවිලි පරිණත කරගන්න ලැබුනෙ ‍මේ අවුරුදු දෙකක් වගේ සුලු කාලයක් ඇතුළත. ඒ කාලයේ බ්ලොග් ලිවීමත්, ඒකට එන ප්‍රතිචාරත්… ඒ වගේම අන්තර්ජාලය හරහා ඇසුරුකරන්න ලැබුන පුද්ගලයින් කිහිප දෙනෙක් නිසා හිතන විදිහ සෑහෙන්න මට්ටමකින් වෙනස් වුනා. ඒක අන්තර්ජාලයට පහසුවෙන් සිංහල එකතුවීම කියන කාරණය වෙන්න පුලුවන්. මම ඒකෙන් අදහස් කරේ, ‍කෙනෙක්ට තමන් හිතන භාෂා‍වෙන් වැඩකරන්න, අන්තර්ජාලයේ සැරිසරන්න වැඩිපුර අවස්ථාව ලැබුනොත් ඒකෙන් ලොකු ආකල්ප වෙනසක් කරන්න පුලුවනි. ඒක කෙලින්ම බලපාන්නෙ රටේ දියුණුවට. ඒකයි මොන මඩ ප්‍රචාර, දේශපාලනික, ‍අදේශපාලනික, වැඩිහිටි අන්තර්ගත අරව මේව තිබුනත් මේව බලෙන් වාරණය සහ පාලනය නොකර ඉන්න ඕනෙ. කුතුහලය තියෙනවානම් ඒවා සොයායෑමේ වරදක් දකින්න නැහැ. මේව වාරණය වුනොත් අපිට ඉතිරිවෙන්නෙ බබාලන්තයක් විතරයි. සමහරවිට මුකුත්ම ඉතිරිවෙන එකක් නැතිවෙන්නත් පුලුවන්!

ආයෙත් මාතෘකාව වෙනත් පැත්තකට හැරෙව්ව නෙව. ඒක මගේ හැටි.

මට කියන්න ඕනෙ වුනේ බ්ලොග් අවකාශය කෙනෙක්ව උපරිම වශයෙන් පරිණත කරනව. ඒ කියන්නෙ අපි හරිහැටි ප්‍රස්ථාරගත කිරීමක් කරොත් කෙනෙක් බ්ලොග් අවකාශයට ඇතුළත් වීමට පෙර හා පසු කියල. අහස උසට කඩාගෙන යන වර්ධන රේඛාවක් දකින්න ලැබෙයි. ඒක තමයි ඇත්ත.

ඉතින්‍ සුදාරකගේ අන්තර්ජාල සටහනට අවුරුදු දෙකයි. ඉස්සරහට පන කෙන්ද රැකුණොත් සහ 2012 ‍‍ලෝක විනාශය සිද්ධ නොවුනොත්, තව ඉස්සරහට ‍මොනවහරි ලියන්න ලැබෙයි. මතක තියාගන්න. මේ බ්ලොග් එකේ තියෙන්නෙ 100%ක්ම වල්-පල්. මුල ඉඳල අගට බැලුවොත් සමහර විට කියවපු දෙයක් ඇත්තෙ නෑ වගේ දැනෙන්නත් පුලුවනි. ඒක තමයි මේ ලිවිල්ලෙ හැටි.

ඒත් අද (2010.01.10) ඉරිදා , ලක්බිම පුවත්පතේ 18වෙනි පිටුවේ සිංහල බ්ලොග් අවකාශයේ පළ වන බ්ලොග් අඩවි තුළින් තෝරාගත් බ්ලොග් ලිපි ප්‍රමාණයක් පළ කරලා!

මේ ආකාරයෙන් තෝරාගෙන ඇත්තේ, (පහත දැක්වෙන) බ්ලොග් ලිපි හයක්. කොහොමවුනත් තවම ලක්බිම පුවත්පතේ වෙබ් අඩවිය නම් සිංහල යුනිකේත භාවිතා කිරීමට යොමු නොවී ඇති හැඩයි.

‍කැටපත් පවුර – එළුවාගේ සවුදම
සිතූගේ සිතුවිලි – නිවාඩුවට කලින් ගමට, මං එන්නද පියඹා…
මනුසත් උයන – අපි නැග්ගොත් පුවක් ගහෙත් දෙබලක් . . . හෆොයි . . .!
අරුණි ශපිරෝ වෙතින් – ගෙම්බාගේ දෘෂ්ටාන්තය
SANKALPANA – ඇගලුම් කම්හල ජිවිතයම කර කදුලු සගවනා රත්තරනේ..
අච්චාරු – මාරයා ගැහැණුන්ට කෝචොක් දාලා නෝන්ඩි වෙච්ච හැටි

බ්ලොග් අවකාශයේ ඉන් එහාට බ්ලොග් ලියන්නන් වෙත ප්‍රධාන පෙළේ සම්මත ජනමාධ්‍ය තුළ වේදිකාවක් නිර්මාණය වීම ඉතාමත් වැදගත් කාරණයක්. මෙහි සාධනීය පැති බොහොමයක් තියෙනවා. සිංහලෙන් බ්ලොග් ලියන්නන්ට තමන්ගේ බ්ලොග් අඩවිය තුළම වේදිකාව ඉබේම නිර්මාණය වීමත්, තමන්ගේ ලිපි තුළ ගුණාත්මක බව වැඩි‍වුනොත් බ්ලොග් අවකාශයෙන් එහාට තමන්ගේ ලිපි ප්‍රචාරණය කිරීමටත් අවකාශ ලැබෙන නිසා දැන්, බ්ලොග්කරණ අවකාශය තවත් ඉහළ මට්ටමට ගොඩනැගෙන්න පුළුවන්. පසුගිය අවුරුදු දෙක තුළ අලුතෙන්ම නිර්මාණය වුන සහ ක්‍රියාශීලි බ්ලොග් අඩවි ප්‍රමාණය 600කට ආසන්නයි! සිංහල බ්ලොග්කරුවන්ගේ සංසදයේ සිංහල බ්ලොග් සින්ඩිකේටරයේම ප්‍රදර්ශනය කරන ආකාරයෙන් ක්‍රියාශීලී බ්ලොග් අඩවි ප්‍රමාණය 587ක්! (2009.10.10 – 12:00) මාස තුනක් තුළ ක්‍රියාශීලී නොවන බ්ලොග් අඩවි සින්ඩිකේටරයෙන් ඉවත් වීම නිසා සමස්තයක් විදිහට අන්තර්ජාලය තුළ පවතින සිංහල බ්ලොග් අඩවි ප්‍රමාණය 600කට ආසන්නයි! මේ වසර අවසානය වන විට එම බ්ලොග් අඩවි ප්‍රමාණය දෙගුණ තෙගුණ වනු ඇති!

මේ ආකාරයෙන් බ්ලොග් අවකාශය වෙත අවධානය ක්‍රම ක්‍රමයෙන් අවධානය ලබාගැනීමට ප්‍රධාන පෙළේ ජනමාධ්‍ය තුළ බ්ලොග් අවකාශය සඳහා ඉඩක් ලැබීම වැදගත්. එවිට පුවත්පත් පාඨකයින් හා, පුවත්පතකට ලිපියක් ඇතුළත් කරගැනීමට වෙහෙස වන පිරිස විකල්ප මාධ්‍යයක් වශයෙන් බ්ලොග් අවකාශය භාවිතා කිරීමට පෙළඹේවි. ඒ ආකාරයෙන් වක්‍රව බ්ලොග් අවකාශය ප්‍රසාරණය වීම අනාගත ජනමාධ්‍යකරණ යුගයට සාමාන්‍ය ජනතාව සූදානම් කරනු ඇති. ශිෂ්‍යයින්, වෘත්තිකයින්, ගුරුවරුන්, නළු නිළියන්, වෘත්තීය ජනමාධ්‍යකරුවන්, දේශපාලකයින් ඉතාමත් පහසුවෙන් බ්ලොග් අවකාශය වෙත විවෘත වීම නිසා ඔවුන්ගෙන් බ්ලොග් අවකාශයටත්, බ්ලොග් අවකාශය නිසා ඔවුන්ටත් අන්‍යෝන්‍ය වශයෙන් වටිනාකම් එකතු කරගැනීමට පුළුවන්. වි‍ශේෂයෙන්ම බ්ලොග් අවකාශයේ සැරීසැරීම සුවිශේෂී අත්දැකීම් රැසක් එකතුකරගැනීමක්!

කොහොම නමුත් බ්ලොග් අවකාශය, බ්ලොග් අවකාශය විදිහටම හඳුනාගැනීම වැදගත්. 90%ක්ම බ්ලොග් අඩවි ලියවෙන්නෙ පෞද්ගලික උවමනාවන් මත. ඒක නිසා ගල්, මුල්, මල්, මඩ, බාල්දි මේ හැම එකක්ම අපේක්ෂා කරන්න පුළුවන්. ඒ අපිට පුද්ගලික සිතුම්පැතුම් වලට වැට බඳින්න බැහැ. ඒක නිසා, කියන්නා කෙසේ කීවත්… අසන්නා සිහි බුද්ධියෙන් ඇසිය යුතුයි!

බ්ලොග් අවකාශයට වැඩ බැඳිමේ හැකියාවක් තියෙනවානම්, ඒ ප්‍රාදේශීය මට්ටමෙන් විතරයි. ඒ wordpress, bloggger වැනි සේවාවන් අවහිර කිරීමෙනුයි. ඉදිරි අනාගතය ගැන අපිට දැන්ම කියන්න බැහැ. පුවත්පත් හරහා විවෘත වන අවධානය නරක පැත්තටත් යොමුවෙන්න හැකියාව තියෙනවා කියන දේ ගැන අවධානයෙන් සිටීමයි වැදගත්!

එහෙමනම්,
සිංහල බ්ලොග් අවකාශයට ජයවේවා!

මේ කතා කරන්න සූදානම් වුනේ ඇය ගැන හෝ එම ඡායාරූප ගැන නෙවෙයි. ෆේස්බුක් වෙබ් අඩවිය ගැන. ෆේස්බුක් වෙබ් අඩවිය හරහා පුද්ගලිකත්වය ආරක්ෂා කරගැනීම පිළිබඳ ඇතිවන ගැටලු විශේෂයෙන්ම සලකා බැලීමට අවශ්‍යයි. ෆේස්බුක් වෙබ් අඩවිය නිසා ‍මිතුරු-මිතුරියන්, පෙම්වතුන්, අඹු-සැමියන් සහ ඥාතීන් අතර ඇතිවූ අර්බුද අතුරින් සමහරක් අර්බුද නිමා වී තියෙන්නේ බො‍හොම ශෝචනීය මරණයක් දක්වා දුරදිග යාමෙන්!

මෑතකදී නැවත වතාවක් වෙනස් වුන ෆේස්බුක් පුද්ගලිකත්වය පිළිබඳ අදාළ වෙනස්කම්, එසේත් නැතිනම් Facebook privacy settings හරහා බොහෝ දෙනෙක්ගෙ ෆේස්බුක් ගිණුම් ඇත්තේ අවදානම් සහිත මට්ටමේ. බොහෝවිට අර මුලින් පවසපු නිරූපණ ශිල්පිණියගේ ඡායාරූප අන් අය වෙතට පත්වීමටත් මෙය ප්‍රධාන වශයෙන් බලපෑවා වෙන්න වෙන්න පුළුවන්. දැන් නිවැරදි ලෙස තම ෆේස්බුක් ගිණුමේ පුද්ගලිකත්වයට අදාළ වෙනස්කම් යාවත්කාලීන කර නොමැති 90%ක් දෙනාගේ පුද්ගලික තොරතුරු ඉතාමත් පහසුවෙන් ලබාගැනීමට හැකියාව තියෙනවා.

ලංකාවෙ (විතරක් නොවෙයි, වෙනත් බොහෝ රටවල) බොහෝමයක් අන්තර්ජාතික පාසල්වල, ඉහළ පෙළේ පාසල් වල සිසුසිසුවියන්ගේ හැසීරීම අධ්‍යයනය කිරීමට අවශ්‍යනම් ෆේස්බුක් වෙබ් අඩවිය සුවිශේෂී ස්ථානයක්. ප්‍රශ්නය ඇතිවන්නේ එසේ හැසීරීමේ නොවෙයි. ඔවුන් තමන්ගේ පෞද්ගලික හැසිරීම් දෙනෝ දාහක් දෙනාට ප්‍රදර්ශනය කිරීමෙන්.

එක්තරා ආකාරයකින්, තමන්ගේ නරක හැසීරීමකට අදාළ ඡායාරූප පමණක් නොවෙයි, ඕනෑම ආකාරයක ඡායාරූප අන්තර්ජාලයට නිකුත් කිරීම එක්තරා ආකාරයක අවදානමක්. තාක්ෂණය ගැන නැවත නැවතත් පැවසීම නිරර්ථකයි. ඕනෑම අයෙකුට ඉතාමත් පහසුවෙන් ඒ ඡායාරූප වෙනස් කිරීමට හැකියාව තියෙනවා. දැනට බොහෝ කලින් ෆේස්බුක් ‍හරහා සංවාදගත වුන මගේ මිතුරෙකු මගෙන් උදව්වක් ඉල්ලුවා මතකයි. ඒ, ගැහැණු ළමයෙකුගේ පින්තූරයක් නිරුවත් ඡායාරූපයක් සමඟ සම්බන්ධ කරන ලෙස. එම ඉල්ලීම නෙයෙකුත් හේතු ඉදිරිපත් කරලා ප්‍රති‍ක්ෂේප කරාට පස්සෙ, අද වෙනකන් මම වැඩිපුර කතා බහ කරන්න ගි‍‍යේ නැත්තෙ, තව මොන විදිහේ උදව් ඉල්ලාවීදැයි බයෙන්.

ෆේස්බුක් වෙබ් අඩවිය බොහොම වටිනා කියන මෙවලමක්. සමාජ මාධ්‍ය වෙබ් අඩවියක් වශයෙන් බොහොමයක් අවශ්‍යතාවන් ඉටුකරගැනීමට සුවිශේෂී‍ වෙබ් අඩවියක්. මිතුරු මිතුරියන් අතර සම්බන්ධතාව වර්ධනය කරගැනීම කෙසේවෙතත්, ඊට වඩා ඉහළ මට්ටමකට යන ජනමාධ්‍ය වටිනාකමක් ඇති වෙබ් අඩවියක්. අවශ්‍ය කරන්නේ නිවැරදි ෆේස්බුක් භාවිතයයි. ඔබ මිතුරන් වැඩි වැඩියෙන් එකතු කරගන්නවානං පුද්ගලික භාවිතය සඳහා ෆේස්බුක් භාවිතය අවම කළ යුතුයි. පුද්ගලික තොරතුරු ෆේස්බුක් වෙබ් අඩවිය හරහා ප්‍රසිද්ධ නොකළ යුතුයි. එහිම අනිත් පැත්ත, ඔබ පුද්ගලික තොරතුරු නෑදෑ හිත මිතුරන් සමඟින් හුවමාරු කරගැනීම සිතනවානම්, වහාම වැඩි වැඩියෙන් මිතුරු මිතුරියන් ඇතුළු කරගැනීමෙන් වැලකී. හොඳින්ම දන්නා මිතුරු මිතුරියන් ඇතුළත් කරගැනීම කළ යුතුයි. එමෙන්ම නිති පතා ෆේස්බුක් වෙබ් අඩවියේ පුද්ගලිකත්වය සඳහා අදාළ වෙනස්කම් (Facebook Privacy Settings) පිළිබඳව අවධානයෙන් සිටිමින් එය නඩත්තු කිරීම අතිශයින්ම වැදගත්! නිරතුරුවම පුද්ගලිකත්වය පිළිබඳව අවධානයෙන් කටයුතු කිරීම වැදගත්. ෆේස්බුක් විතරක් නෙවෙයි, ඕනෑම දෙයක් අන්තර්ජාලයට එකතු කිරීමට පෙර දෙවරක් සිතන්න. මේ ලියන මටත් තියෙන්නෙ හොඳ හොඳ අත්දැකීම්!

කාලයට හරියන ආප්තෝපදේශකින්ම සටහනට නැවතීමේ තිත තියන්නම්…

පනින්න පෙර සිතා බලනු!

අන්තර්ජාල පරිශීලකයින් වශයෙන් මෙන්ම, දුරකථන, ජංගම දුරකථන භාවිතාකරුවන් ලෙසින් අද අපට සුවිශේෂී දිනයක්. මාතෘකාවේ යොදා ඇති ලෙසින්ම අද (2008 මැයි මස 17 වැනිදා) ජාත්‍යන්තර විදුලි සන්දේශ දිනයයි.

කෙසේවෙතත් ලංකාවේ තොරතුරු සන්නිවේද‍නයේ වේගවත් භාවය හා නිති පතා වර්තාවෙන සබඳතා බිඳ වැටීම් නිසාවෙන් බොහෝ පාරිභෝගිකයින් අපහසුතාවයට පත්වෙලා තිබෙනවා. නමුත් විදුලි සන්දේශන සේවයේ වැදගත්ම අංශය වන අන්තර්ජාල පහසුකම පිළිබඳව නම් යම්තාක් දුරකට (100% ක් නොවේ) සෑහිමකට පත්විය හැකියි.

දිවයින පුරා නැනසළවල් බිහිකිරීමේ ව්‍යාපෘතිය ඉන් වැදගත් දෙයක්. ඒ වාගේම දකුණු ආසියාවේ වේගවත්ම HSDPA ජාලය ශ්‍රී ලංකාව සතුවීමද එක්තරා ජයග්‍රහණයක්. ඒ වාගේම දැනට ලංකාව තුල සාපේක්ෂව ADSL, WiMAX, DSL මෙන්ම චන්ද්‍රිකා රූපවාහිනී/අන්තර්ජාල සේවාවන් ව්‍යාප්ත වී තිබීම වැදගත්. නමුත් එයින් නිසි ප්‍රතිඵල ලබාගන්නේදැයි යන්න සැකයක්. උදාහරණයක් ලෙස පාසල් පරිගණක විද්‍යාගාර තුල අන්තර්ජාල පරිශීලනය වැඩි වශයෙන් සිදුවන්නේ නැති බවයි වාර්තාවන්නේ. නිසියාකාර ‍ෆිල්ටර් (පෙරහන්) භාවිතා කරමින් නුසුදුසු වෙබ් අඩවි ‍වලක්වාලමින් අන්තර්ජාල භාවිතා කිරීමට අවස්ථාව සිසුන්ට සැලැස්වීම වැදගත්. එමෙන්ම ලංකාවේ බ්ලොග්කරුවන්ගේ ප්‍රමාණය හා වෙබ් අඩවි නිර්මාණය වීමේ වර්ධනයකුත් දක්නට ලැබෙනවා. අන්තර්ජාලයට සිංහල යුනිකේත සම්මතය ආගමනය නිසාවෙන් එහි ‍අගය දෙගුණ තෙගුණ වී ඇති බව අතිශයෝක්තියක් නම් නොවෙයි. එමෙන්ම මෙම සේවා සපයන්නන්ගේ පාරිභෝගික සේවාව පිළිබඳවත් සෙවිය යුතුයි. නිසියාකාර පාරිභෝගික සේවාවක් ලබානොදීම නිසා හැමදේම අතඇරලා දාන්න තරම් පාරිභෝගිකයින්ට සිතෙනවාත් ඇති (මට නම් හොඳටම අත්දැකීම් තියෙනවා ඒ ගැන) ශ්‍රී ලංකාව තුල ප්‍රමුඛතම විදුලි සංදේශ ‍සේවා සම්පාදකයන් වන ශ්‍රී ලංකා ටෙලිකොම්, ඩයලොග් හා ටෙලිකොම් අනුබද්ධිත මොබිටෙල් යන සේවාදායකයින් ගැන කතාකරන්නම ඕනේ. ශ්‍රී ලංකා ටෙලිකොම් හා මොබිටෙල් යන සේවා සම්පාදකයින් සේවාවන් සපයන්නේ එකිනෙකට අනුබද්ධිතවයි. පාරිභෝගික සේවා සැපයීම පිළිබඳව නම් විවිධ විවේචන ඇති නමුත් ‍සේවාව අ‍නිකුත් සේවා සම්පාදයකටයින් වඩා සාපේක්ෂව අඩු මුදලකට ලබා ගැනීමට හැකිවීම සහනයක්. නමුත් මොබිටෙල් Broadband පරිශීලකයින්ට මොඩමය වෙනුවෙන් රු 20,000කට වැඩි මුදලක් වැය කිරීමට සිදුවීමත්, සීමාසහිත බෑන්ඩ්විඩ්ත් එකත් (දත්ත පරාසය) නිසා මඳ අපහසුතාවයකට පත්වෙලා තිබෙනවා. ඩයලොග් Broadband සඳහා භාවිතා කරන්නේ WiMAX තාක්ෂණයයි. සීමා රහිත බෑන්ඩ්විඩ්ත් එකක් ලබාදුන්නත්, ඔවුන්ගේ Fair Usage Policy නිසා පාරිභෝගිකයින් තුළ යම්කිසි සැකයක් ඇති වෙලා තියෙනවා. ඒකට ‍හේතුව තමයි ඔවුන් වැඩිපුර දත්ත භාවිතා කරන්නන්ගේ කුලකයට ඇතුල්වීමට සිදුවු‍නොත් වේගය ඩයල්අප් සම්බන්ධතාවයකටත් වඩා අඩු වෙන බවට මතයක් ඉදිරිපත් වීමයි. එහි ඇත්ත නැත්ත නම් මා දන්නේ නෑ. මේ කතාව මට දැනගන්නට ලැබුනේ, ලැබුනු විද්‍යුත් ලිපි වලින් හා අන්තර්ජාල ‍ෆෝරම මාර්ගයෙන්. ඉ

තින් ඔන්න ඕක තමා තත්වේ. අන්තර්ජාල සම්බන්ධතා කෙසේවෙතත් මේ වන විට සේවා සපයන්නන් තුල ධනාත්මක තරඟයක් ඇතිවී තිබීම පාරිභෝගිකයින්ට නම් වාසියක් වේවි කියලා තමයි මගේ බලාපොරොත්තුව නම්. ඔබ මොනවාද අපේ විදුලි සන්දේශ සේවා ගැන හිතන්නේ? ප්‍රතිචාරයක් සටහන් කරන්න නම් අමතක කරන්න එපා…

ඔන්න වෙබ් අඩවියක් හදලා, ඩොමේන් නාමයකුත් ඇරගෙන, වෙබ් අඩවිය අන්තර්ජාලයේ ස්ථාපනය කරා කියමුකෝ. ඒත් වැඩක් නෑ ඒ වෙබ් අඩවියට යම් කිසි ග්‍රාහක සංඛ්‍යාවක් පිවිසෙන්නේ නැතිනම්. ඉතින් ඔබේ වෙබ් අඩවියට ග්‍රාහකයින් ගෙන්වා ගැනීමට නම් ක්‍රම ගණනාවක්ම තියෙනවා. ඒ අතුරින් පළමු ලෙහෙසිම ක්‍රමය තමයි කටින් කට මේ වෙබ් අඩවියට ප්‍රචාරණය ලබාදීම, ඔබේ මිතුරන්ට පවසන්න ඔබේ වෙබ් අඩවියට පිවිසිලා බලන්න කියලා. ඔබේ වෙබ් අඩවියේ අන්තර්ගතය හොඳ නම්, ඔබේ මිතුරන්, ඔවුන්ගේ මිතුරන්ටත් පවසයි ඔබේ වෙබ් අඩවියටත් පිවිසෙන්නට කියලා.

මේ එක ක්‍රමයක් විතරයි. මැරතන් වෙලාව ඇතුලතදී තව කියන්නම්… දිගටම සුදාර‍කගේ අන්තර්ජාල සටහන සමඟින් රැඳී සිටින්න.

ඔබේම කියලා වෙබ් අඩවියක් නිර්මාණය කරගැනීමට නම් ඔබට යම්තාක් දුරකට වෙබ් පිටු නිර්මාණය කිරීමට යොදාගනු ලබන භාෂාවක් පිළිබඳ දැනීමක් තිබීම වැදගත්. මේ වෙබ් පිටු නිර්මාණයට යොදා ගන්නා භාෂාවන් කිහිපයක් HTML, PHP, ASP ලෙස දැක්විය හැකියි. මේ අතුරින් HTML සරල, පහසු භාෂා ක්‍රමයක්. PHP හා ASP භාවිතයට නම් යම් කිසි විශේෂ දැනුමක් තිබීම වැදගත්. එමෙන්ම Database පිළිබඳ දැනීමක්ද ඔබ සතු වනවානම් එය ඔ‍බේ වෙබ් අඩවියට වටිනාකමක් එක් කිරීමට සමත් වේවි.

වෙබ් අඩවි නිර්මාණයට විශේෂ මෘදුකංග අත්‍යවශ්‍යම නෑ. ඔබගේ පරිගණකයේ නෝට්පෑඩ් (NotePad) මෘදුකාංගය භාවිතයෙන්ම වෙබ් පිටු නිර්මාණය කරගැනීමට හැකියාව තිබෙනවා. එමෙන්ම වෙබ් අඩවි නිර්මාණය සඳහා ඔබට Adobe / Macromedia Dreamweaver මෘදුකාංගයද මයික්‍රෝසොෆ්ට් ෆ්‍රන්ට්පේජ් මෘදුකාංගයද භාවිතා කිරීමට හැකියාව තිබෙනවා. ඩ්‍රීම්වීවර් මෘදුකාංගය තුලින් නම් ඔබට විශේෂාංග රැසක් ලබා ගැනීමට හැකියි.

වෙබ් පිටු නිර්මාණය කරාට විතරක් නම් මදි. මේ වෙබ් අඩවි අන්තර්ජා‍ලයේ ස්ථාපනය කරන්නත් ඕනේ. අන්තර්ජාලයේ ස්ථාපනය කිරීමට ඔ‍බට ඔබේ පරිගණකය වුනත් පාවිච්චි කරන්න පුළුවන්. ඒත් ඒක ටිකක් කරදරකාරී වැඩක්. මේ සඳහා ඔබේ පරිගණයක අවුරුද්ද පුරාම, පැය 24පුරාම අන්තර්ජාලය සමඟ සම්බන්ධ කරන්න අවශ්‍යයි. ශ්‍රී ලංකාවේ ජීවත් වෙන සාමාන්‍ය පුද්ගලයෙක්ට නම් මේක හරිම අමාරු අපහසු දෙයක්. පැය 24 පුරාම අන්තර්ජාල සම්බන්ධතාවය තිබුනත්, ඔබට පැය විසි හතර පුරාවටම විදුලිය ලබාගැනීම අපහසු දෙයක්. මේ නිසා හොඳම ක්‍රමය තමයි, ඔබේ වෙබ් අඩවිය පැය 24 පුරාවටම අන්තර්ජාලයට සම්බන්ධ, නොකඩවා විදුලිය ලබාගන්නා අන්තර්ජාල සේවාදායකයක් (Server) මෙම සේවා වලට භාවිතා කරන වදන තමයි වෙබ් සංග්‍රාහක සේවා එහෙමත් නැත්නම් වෙබ් හෝස්ටින්ග් සේවා (Web Hosting Services). වර්තමානයේ වෙබ් ‍හෝස්ටින්ග් සේවා විශ‍ාල ප්‍රමාණයක් දැකිය හැකියි. මෙම සේවාවන් අතුරින් සමහරක් සේවාවන් ඉතාමත් උසස්ගණයේ සේවාවන් වන අතර සමහරක් නම් සේවාව අතින් අන්තිමයි. ලාභයි වගේ පෙනුනාට මෙම සේවාවන්හි, පාරිභෝගික සහය අන්තිමයි. එමෙන්ම සේවාදායකය ක්‍රියාවිරහිත වීමේ කාල පරාසය, (Downtime) සම්භාවිතාවය අධිකයි. එම නිසා වඩා ‍හොඳ වෙබ් හෝස්ටින්ග් සේවාවක් තෝරාගැනීම වැදගත් වෙනවා. ඔබ ගූගල් හෝ එවැනි සෙවුම් යන්ත්‍රයක Web Hosting වදන යොදා සෙවූ සැනින් ඔබට වෙබ් අඩවි සපයන ආයතන ගනනාවකම වෙබ් ලිපින දැක ගැනීමට හැකියි. එම නිසා ‍ඔබේම වෙබ් අඩවියක් ආරම්භ කිරීමට කලින්, වෙබ් හෝස්ට්න්ග් සේවා ගැන හොඳින් දන්නා මිතුරෙකුගෙන්, ඔබ මිළදීගැනීමට අදහස් කරන ආයතනය පිළිබඳ විමසා දැනගැනීම වැදගත් වෙනවා. වර්තමානයේදී ඔබේ වෙබ් අඩවි ස්ථාපනය සඳහා මුදල් අය නොකරන සමාගම් රාශියක් බිහි වෙලා තිබෙනවා. මෙම සේවාවන් මුළදී කිව් ආකාරයේ මුදල් ගෙවා ලබාගන්නා සේවාදායක වලට වඩා සාපේක්ෂව අඩු පහසුකම් තමයි ලබා දෙන්නේ. මෙම නොමිලේ වෙබ් ඉඩ සපයන ආයතන මුදල් සපයාගනු ලබන්නේ. ඔබට ලබාදෙන වෙබ් අඩවියේ ඔවුන්ගේ දැන්වීම් ප්‍රදර්ශනය කරමිනුයි එසේත් නැතිනම් ඔවුන් ඔබට සපයන වෙබ් අඩවි Control Panel එක තුල ඔබට දැන්වීම් ප්‍රදර්ශනය කරනු ලබනවා. එහෙමත් නැතිනම් ඔබේ විද්‍යුත් තැපැල් ලිපිනයට නිතිපතා දැන්වීම් යොමු කරනවා. එසේත් නැතිනම්, ඔබේ විද්‍යුත් තැපැල් ලිපිනය ස්පෑම් කිරීමකටද ලක් කර හැකියි. මෙනිසා නොමිලේ වෙබ් ඉඩ සපයන වෙබ් අඩවි පිළිබඳ මඳක් සොයා තෝරාගන්නවානම් හොඳයි.

මීළඟට වැදගත් වෙනුයේ ඩොමේන් නාමයයි. උදාහරණයක් විදිහට ඔබ ඔ‍බගේ ඔබ ගැන එහෙමත් නැත්නම් ඔබේ පුද්ගලික වෙබ් අඩවියක් නිර්මාණය කරනවානම් ඔබේ නම ඇතුලත් කර ඩොමේන් නාමයක් ලබා ගැනීමට හැකියි. උදාහරණයක් විදිහට මගේ වෙබ් අඩවියේ ඩොමේන් නාමය වන www.sudaraka.com හා මලින්ත සමරකෝන්ගේ අයියාගේ වෙබ් අඩවියේ ඩොමේන් නාමය වන www.malinthe.com දැක්විය හැකියි. එමෙන්ම ඔබට පුළුවන් ඒ ඩොමේන් නාමයට තවත් සබ් ඩොමේන් නාමයන් එකතු කරගන්න. සබ් ඩොමේන් නාමය කෙටියෙන් හැඳින්වුවොත් හරියට ඩොමේන් නාමයක් ඇතුලේ ඩොමේන් නාමයක් වගේ එකක්. ඒ කියන්නේ ඔබට ඔබේ අඩවියට තවත් උප අංශයක් ඇතුලත් කොට එයට පහසුවෙන් පිවිසීමට අන් අයට උපකාරී වීමක් තමා සාමාන්‍යයෙන් සබ් ‍ඩොමේන් නාමයක් තුලින් කෙරෙන්නේ. මේ සඳහා උදාහරණයක් විදිහට ඔබ දැන් පිවිසී සිටින මගේ පුද්ගලික බ්ලොග් අඩවිය වන http://blog.sudaraka.com හා මලින්‍තගේ සටහන http://blog.malinthe.com දැක්වීමට හැකියි. මේ ඩොමේන් නාම සාමාන්‍යයෙන් නොමිලේ නම් ලැබෙන්නේ නෑ. ඩොමේන් නාම වල විවිධ extension තියෙනවා. උදාහරණ වශයෙන් .com , .net, .info, .org, .asia, .lk ලෙස දැක්විය හැකියි වර්තමානයේ ‍ඩොමේන extension විශාල ප්‍රමාණයක් දැකීමට හැකියි. නමුත් වැඩියෙන්ම ජනප්‍රිය extension එක වෙලා තියෙන්නේ මොකක්ද කියලා ඔබ දන්නවාද? ඔව් ඔබ හරි! .com තමයි වර්තමානයේ ජනප්‍රියම Domain Extension එක වෙලා තියෙන්නේ.  විවිධ රටවලට මේ වන විට Domain Extension වෙන වෙනම දක්නට ලැබෙනවා. ඒ අතුරින් අපේ ශ්‍රී ලංකාවට ලැබිලා තියෙන .Domain Extension එක තමයි .lk කියන extension එක. චීනයට .cn, ඉන්දියාවට .in විදිහට ඒ ඒ රටවලට ආවේණික extension තිබුනත්, මෑතක් වෙනතුරුම අමෙරිකාවට නම් වෙනම extension එකක් තිබුනේ නෑ. අමෙරිකාව කෙලින්ම භාවිතා ‍කරේ .com කියන extension එකම තමයි. ඒකට හේතුව වුනේ අමෙරිකාවේ තමයි මුලින්ම අන්තර්ජාලය භාවිතයට පැමිණීම. නමුත් මේ ඩොමේන් නාම එක් එක් අයට බෙදී යාමේ සීඝ්‍රතාවය නිසාම අමෙරිකාවත් තමන්ගේම ඩොමේන අනන්‍යතාවක් නිර්මාණය කරගෙන තිබෙනවා. ඔවු‍න්ගේ ඩොමේන extension එක තමයි .us කියන්නේ. ඒ වගේම ඩොමේන් නාමය තමයි වෙබ් අඩවියක තියෙන අනන්‍යතාවය සනිටුහන් කිරීමේ ප්‍රධාන සාධකය. ඒ කියන්නේ ඩොමේන් නාමය තමයි වෙබ් අඩවියක හැඳුනුම්පත. සාමාන්‍යයෙන් බොහෝ වෙබ් ඉඩ සපයන සමාගම් තමන්ගේ පාරිභෝගිකයින්ට ඩොමේන් නාම ලියාපදිංචි කරදෙනවා. සමහර ආයතන තමන්ගේ සේවාවන්ට පාරිභෝගිකයින් ඇද ගැනීමට ඔවුන්ගේ වෙබ් ඉඩ ලබාදීමේ පැකේජ සමඟ අමතර ගාස්තුවකින් තොරවම ඩොමේන් නාමයන් ලියාපදිංචි කර ලබාදෙනවා. නමුත් ඔබට හැකියාවක් තියෙනවානම් ඔබටම පුළුවන් ඔබේ ඩොමේන් නාමය ලියාපදිංචි කරගන්න. ඔබටම එය එසේ ලියාපදිංචි කරගත හැකිනම් එය ඉතාමත් වැදගත් වනවා. එසේ ඔබම ඔබේ ඩොමේන් නාමය ලියාපදිංචි කරගැනීම තුලින් ඔබේ ඩොමේන් නාමයේ පාලනය ඔබ අතට පහසුවෙන් ලබාගත හැකියි. අන්තර්ජාතිය ඩොමේන් නාම ලියාපදිංචියේදී නම් පෙරමුණෙන්ම සිටින්නේ ගෝඩැඩී (GoDaddy) හා නේම්චීප් (NameCheap) යන ආයතන තමයි.  .lk ඩොමේන නාම ලියාපදිංචි කරගැනීමට අවශ්‍ය නම් www.nic.lk වෙතට පිවිසෙන්න.  (.lk ඩොමේන් නාම ලියාපදිංචියේ ක්‍රමවේදය නම් මගේ කිසිම පැහැදීමක් නෑ. මම ඒ ගැන පසුව ලියන්නම්.) ඔබට ඩොමේන් නාමයක් මිළදී ගැනීමට අපහසු නම් ඔබ පුළුවන් www.co.cc සබ් ඩොමේන් නාමයක් නොමිලේම ලබාගන්න. මෙහිදී ඔබට මුදල් දී ලබාගන්නා ඩොමේන් නාමයක ඇති පහසුකම්ම ලබාගැනීමට හැකියාව තිබෙනවා. මෙයට අමතරව බොහෝ නොමිලේ වෙබ් ඉඩ සපයන වෙබ් අඩවි තුලින්ද නොමිලේ සබ් ඩොමේන් නාම ලබා දෙනවා. උදාහරණක් විදිහට නොමිලේ වෙබ් ඉඩ ලබාදෙන http://www.freelk.info වෙබ් අඩවිය වෙතින් ඔබට http://you.freelk.info හෝ http://example.freelk.info වැනි නොමිලේ සබ් ඩොමේන් නාමයක් ලබාගැනීමට හැකියි.

මේ ලිව්වේ මූලික කරුණු කිහිපයක් විතරයි. මේ ක්ෂේත්‍රය මතුපිටින් සරල වුනාට, ටිකක් බැරෑරුම් දෙයක්. වෙබ් අඩවියක් නිර්මාණය කරලා, ඩොමේන් නාමයක් ඇරගෙන, වෙබ් ඉඩත් ඇරගෙන වෙබ් අඩවිය පටන්ගත්තායි කියමුකෝ. එ‍තකොට ඔක්කොම ඉවරයි දැන් හරි කියලානම් හිතන්න එපා. නියම යු‍ද්දේ පටන් ගන්නේ එතකොට තමයි. ඒවා ගැන මම පසුවට ලියන්නම්. එතෙක්  http://www.w3schools.com වෙබ් අඩවියට පිවිසිලා වෙබ් අඩවි නිර්මාණය හා අනෙකුත් දෑ පිළිබඳ දැනුවත් වෙන්න. හොඳ හොඳ දේවල් එළිවෙන ජාමෙට කිව්වාලු!